| ← Numbers 20/36 → |
| بئرئنجي آي بوتون ائسرايئل اؤولادلارينين جاماعاتي سئن صحراسينا گلدي. اونلار قِدِشده دايانديلار. مريم اورادا اؤلدو و اِله اورادا دا باسديريلدي. | .1 |
| جاماعات اوچون سو يوخ ائدي، اونا گؤره موسا و هارونون ضئدّئنه ييغيلديلار. | .2 |
| خالق موسايا ناراضيليق ادئب ددي: "کاشکي بئز ده هموطنلرئمئزله بئرلئکده ربّئن قاباغيندا اؤلَيدئک! | .3 |
| ربّئن جاماعاتيني بو صحرايا نه اوچون گتئردئنئز؟ گتئردئنئز کي، بئز و حيوانلاريميز بورادا اؤلک؟ | .4 |
| نه اوچون بئزي مئصئردن چيخارديب بله پئس يره گتئردئنئز؟ بورا نه اَکئن، نه انجئر، نه اوزوم، نه ده نار يري‌دئر. ائچمه‌يه بِله، سو يوخدور." | .5 |
| موسا و هارون جاماعاتين قاباغيندان حوضور چاديرينين گئرئشئنه گلدئلر و اوزو اوسته يره دوشدولر. ربّئن جلالي اونلارا گؤروندو. | .6 |
| رب موسا ائله دانيشيب اونا ددي: | .7 |
| "عصاني گؤتور، سن و قارداشين هارون جاماعاتي ييغين و اونلارين گؤزو قاباغيندا قايايا ديئن کي، سو ورسئن. قايادان اونلارا سو چيخارت، جاماعاتا و حيوانلارينا ائچئرت." | .8 |
| موسا امر اولوندوغو کئمي عصاني ربّئن قاباغيندان گؤتوردو. | .9 |
| موسا و هارون جاماعاتي قايانين قاباغينا ييغديلار و اونلارا ددئلر: "ای ياغي‌لار، ائندي اشئدئن؛ بو قايادان سئزه مگر بئز سو چيخارداجاغيق؟" | .10 |
| سونرا موسا اَلئني قالديردي و عصاسي ائله ائکي دفه قايايا ووردو؛ قايادان بول سو چيخدي. جاماعات و اونلارين حيوانلاري سو ائچدئلر. | .11 |
| لاکئن رب موسا و هارونا ددي: «منه ائنانماديغينيز اوچون، ائسرايئل اؤولادلارينين گؤزو قاباغيندا منئمله موقدّس کئمي رفتار اتمه‌دئيئنئز اوچون، بو جاماعاتي سئز اونلارا وردئيئم اؤلکه‌يه آپارماياجاقسينيز." | .12 |
| بو سولار مِرئبا سولاري ائدي. چونکي بو يرده ائسرايئل اؤولادلاري ربله موباحئثه اتدئلر و رب اونلارا اؤز موقدّسلئيئني گؤرستدي. | .13 |
| موسا قِدِشدن اِدوم پادشاهينا قاصئدلر گؤندردي: "قارداشين ائسرايئل بله ديئر: «چکدئيئمئز زحمتئن هاميسيني بئلئرسن. | .14 |
| آتالاريميز مئصئره کؤچدولر و بئز بئر چوخ واخت مئصئرده ياشاديق. مئصئرلی‌لر بئزئمله و آتالاريميزلا پئس رفتار اتدئلر. | .15 |
| آمّا بئز ربّه فرياد اتدئکده، او سَسئمئزي اشئتدي و بئر مَلَک گؤندرئب، بئزي مئصئردن چيخارتدي. ائندي باخ، بئز قِدِشده‌يئک کي، سنئن سرحدئنه ياخين بئر شهردئر. | .16 |
| سندن خاهئش ادئرئک کي، تورپاغيندان کچمک اوچون بئزه ائجازه وره‌سن. بئز زَمئدن، يا دا اوزوم باغيندان کچميه‌‌جَيئک؛ هچ بئر قويودان دا سو ائچميه‌‌جيئک. پادشاهين يولو ائله سنئن تورپاغيندان کچنه‌جک صاغا و سولا دؤنميه‌جيئک.»" | .17 |
| لاکئن اِدوم پادشاهي اونا ددي: "تورپاغيميزدان کچمه‌يئن، يوخسا قاباغينيزا قيلينجلا چيخارام." | .18 |
| ائسرايئل اؤولادلاري گئنه اونلارا ددئلر: "بئز گِنئش يوللا گده‌جيئک. اگر من و مال-حيوانلاريم سولاريندان ائچسَک، دَيَرئني وره‌رم؛ فقط پئيادا کچئب گتمکدن باشقا هچ نه ائسته‌مئرم." | .19 |
| آمّا اِدوم پادشاهي ددي: "کچمک اولماز." اِدوملولار بؤيوک و گوجلو بئر قوشونلا اونلارين قاباغينا چيخديلار. | .20 |
| بلجه اِدوم پادشاهي ائسرايئللی‌لره ائجازه ورمه‌دی کی، تورپاقلاريندان کچسئنلر. اونا گؤره ده، ائسرايئللی‌لر اونلارين تورپاقلاريندان چکئلدئلر. | .21 |
| بوتون ائسرايئل جاماعاتي قِدِشدن يولا دوشوب حور داغينا گلدي. | .22 |
| سونرا رب اِدوم تورپاغي سرحدئنده، حور داغيندا، موسا و هارونلا دانيشيب اونا بله ددي: | .23 |
| "هارون اؤلوب اؤز خالقينا قوشولاجاق، چونکي مِرئبا سولاريندا سؤزومه عاصي اولدوغونوز اوچون، ائسرايئل اؤولادلارينا وردئيئم اؤلکه‌يه گئرمه‌يه‌جک. | .24 |
| هارون و اوغلو اِلعازاري گؤتور، اونلاري حور داغينا گتئر. | .25 |
| هارونون پالتارلاريني چيخارت و اونلاري اوغلو اِلعازارا گِيئندئر، بلجه هارون اورادا اؤلوب خالقينا قوشولاجاق." | .26 |
| موسا ربّئن امر اتدئيي کئمي اتدي و بوتون جاماعاتين گؤزلري قاباغيندا حور داغينا چيخديلار. | .27 |
| موسا، هارونون کاهئنلئک پالتارلاريني چيخارديب، اوغلو اِلعازارا گِيئندئردي. هارون اورادا داغين تپه‌سئنده اؤلدو. موسا ائله اِلعازار داغدان اِندئلر. | .28 |
| بوتون جاماعات هارونون اؤلدويونو گؤردو. بوتون ائسرايئل خالقي اونون اوچون اوتوز گون ياس توتدو. | .29 |
| ← Numbers 20/36 → |