| ← Judges 18/21 → |
| او گونلرده ائسرايئلده پادشاه يوخ ائدي. اِله همئن گونلرده دان قبئله‌سي، ياشاماق اوچون اؤزلرئنه ائرثي تورپاق آختاريردي، چونکي او گونه قدر ائسرايئل قبئله‌لري آراسيندا اونلارا ائرث تورپاق دوشمه‌مئشدي. | .1 |
| دان اؤولادلاري صورعا و اِشتاول شهرلرئندن اولان بوتون طايفالاريندان بش نفر ائگئد آدامي اؤلکه‌نئن تَجَسّوسونه گؤندردئلر و اونلارا ددئلر: "گدئن، اؤلکه‌ني آختارين." اونلار اِفرايئمئن داغليق بؤلگه‌سئنه، مئکانين اِوئنه گلدئلر و گجه‌ني اورادا قالديلار. | .2 |
| حله مئکانين اِوي يانيندا ائکَن، جاوان لاوئلي‌نئن سَسئني تانيديلار؛ اِوه طرف دؤنوب اوندان سوروشدولار: "بورايا سني کئم گتئرئب؟ بورادا نه ادئرسن؟ سنئن بورادا نه ائشئن وار؟" | .3 |
| لاوئلي اونلارا ددي: "مئکا منئم اوچون فئلان بَهمان ائشلر گؤردو. او منی اوجرَتله توتوب، من ده اونون کاهئني اولموشام." | .4 |
| دانلي‌لار اونا ددئلر: "خاهئش ادئرئک، تاريدان سوروش. گؤر بئزئم گتدئيئمئز بو يول اوغورلو اولاجاق يا يوخ." | .5 |
| کاهئن اونلارا ددي: "سالامات گدئن، گتدئيئنئز بو يول ربّئن نظرئنده‌دئر." | .6 |
| بو بش ائگئد گدئب لَيئشه چاتديلار و گؤردولر کي، اورادا ياشايان خالق اَمئن-آمانليقداديرلار. صئدونلولار کئمي دئنج و راحات ياشاييرلار؛ چونکي بو بؤلگه‌ده هچ کئم یوخ ائدی کی، اونلارا حؤکم ادئب اذئيّت ورسئن. اونلار صئدونلولاردان اوزاق ائدئلر و هچ کسله ده رابئطه‌لري يوخ ائدي. | .7 |
| ائگئدلر صورعا و اِشتاول شهرلرئنه، اؤز خالقينين يانينا قاييداندا خالق اونلارا ددي: "نه اؤيرَنه بئلدئنئز؟" | .8 |
| ائگئدلر اونلارا ددئلر: "قالخين، اونلارا هوجوم اِدَک، چونکي اونلارين تورپاغيني گؤردوک، چوخ ياخشيدير. نئيه هچ نه اتمئرسئنئز؟ گدئب تورپاغي آلماغي يوباتمايين! | .9 |
| اورايا چاتاندا آرخايين بئر خالق و گِنئش بئر تورپاق گؤره‌جکسئنئز. تاري بو تورپاغي سئزه تسلئم ادئب. اورا اِله تورپاقدير کي، هچ نَيه اِحتئياجي يوخدور." | .10 |
| دان نسلئندن آلتي يوز کئشي سئلاحلانيب صورعا و اِشتاولدان يولا دوشدولر. | .11 |
| يهودايا قالخيب گجه‌ني قئريَت‌يِعه‌رئمده قالديلار. بونا گؤره ده او يِر بو گونه قدر مَخَنِدان چاغيريلير. او يِر قئريَت‌يِعه‌رئمئن قربئنده يِرلَشئر. | .12 |
| اورادان اِفرايئمئن داغليق بؤلگه‌سئنه کچدئلر و مئکانين اِوئنه گلدئلر. | .13 |
| او بش نفر کي، لَيئش دئيارينين تفتئشي اوچون گتمئشدئلر، اؤز خالقينا ددئلر: "آيا بئلئرسئنئز کي، بو اِولرده اِفود، اِو بوتلري، هم ده اويما و تؤکمه بوتلر وار؟ ائندي گؤرون نه ادئرسئنئز، بو باره‌ده بئر قَرارا گلئن." | .14 |
| اونلار اورايا دؤنوب، او جاوان لاوئلي‌نئن قالديغي مئکانين اِوئنه گلدئلر و اونون حال-اَحواليني خبر آلديلار. | .15 |
| دان اؤولادلاريندان دؤيوش اوچون سئلاحلانميش آلتي يوز نفر اونون دروازاسينين گئرئشئنده داياندي. | .16 |
| اؤلکه‌ني آختارماغا گِدن او بش ائگئد اِوه گئرئب اويما بوتو، اِفودلا اِو بوتلرئني و تؤکمه بوتو گؤتوردولر. کاهئن سئلاحلانميش آلتي يوز نفرئن يانيندا دروازانين گئرئشئنده دايانميشدي. | .17 |
| اونلار مئکانين اِوئنه گئرئب اويما بوتو، اِفودلا اِو بوتلرئني و تؤکمه بوتو گؤتورَنده کاهئن اونلارا ددي: "نه ادئرسئنئز؟" | .18 |
| او واخت ددئلر: "ساکئت اول، اَلئنله آغزيني اؤرت. دور بئزئمله گِدَک، بئزه آتا و کاهئن اول. سنئن اوچون بئر آدامين اِوئنده کاهئنلئک اتمک ياخشيدير، يوخسا بئر ائسرايئل قبئله‌سئنه، بئر نسله؟" | .19 |
| کاهئنئن اوره‌يي شاد اولدو، اِفودلا اِو بوتلرئني و اويما بوتو گؤتوروب خالقلا برابر گتدي. | .20 |
| اونلار اؤز اِو اهلئني، حيوانلاري و اِو اشيالاريني قاباقلارينا قاتيب يولا دوشدولر. | .21 |
| مئکانين اِوئندن اوزاقلاشاندا مئکانين اِو اهلي ييغيليب دان اؤولادلارينا چاتديلار. | .22 |
| اونلار دان اؤولادلارينا قيشقيرديلار. دان اؤولادلاري دؤنوب مئکايا ددئلر: "سنه نه اولوب کي، بونلاري بورايا ييغيبسان؟" | .23 |
| مئکا اونلارا ددي: "دوزلتدئيئم آللاهلاري و کاهئني گؤتوروب گتدئنئز، مگر آرتيق منه بئر شي قاليب؟ نجه منه دئيه بئلرسئنئز: «سنه نه اولوب؟»" | .24 |
| دان اؤولادلاري اونا ددئلر: "سَسئن آراميزدا اِشئدئلمه‌سئن، يوخسا تِز قضبلَنَن آداملاريميز سنئن اوستونه هوجوم اِدَر، هم اؤز حياتيني، هم ده اِوئنده‌کئلرئن حياتيني ائتئرَرسن." | .25 |
| دان اؤولادلاري يوللارينا داوام وردئلر. مئکا بو آداملارين اوندان گوجلو اولدوغونو گؤروب اِوئنه قاييتدي. | .26 |
| دان اؤولادلاري مئکانين دوزلتدئيي شيلري و اونون کاهئنئني گؤتوروب لَيئشه، دئنج و آرام بئر خالقا هوجوم اتدئلر. اهالئسئني قيلينجدان کچئردئب شهره اود ووردولار. | .27 |
| اونلاري قورتاران اولمادي، چونکي لَيئش صئدوندان اوزاقدا ائدي. بو خالقين هچ کسله ده رابئطه‌سي يوخ ائدي. بو شهر بِيت‌رِخوبون يانيندا اولان بئر دره‌ده يِرلَشئر. دانلي‌لار بو شهري تزه‌دن تئکئب اورادا ياشاديلار. | .28 |
| اونلار ائسرايئلده دوغولان اؤز آتالاري دانين خاطئرئنه بو شهرئن آديني دان قويدولار. آمّا شهرئن اوّلکي آدي لَيئش ائدي. | .29 |
| دان اؤولادلاري اورادا اؤزلري اوچون اويما بوتو قوردولار؛ اؤلکه‌نئن اسئرلئيه دوشَن گونونه قدر موسا اوغلو گِرشوم اوغلو يوناتان اؤزو و اوغوللاري دان قبئله‌سئنه کاهئن اولدولار. | .30 |
| تارينين عئبادتگاهي شئلودا اولارکن، بوتون بو دؤورده دانلي‌لار مئکانين دوزلتدئيي اويما بوته سئتايئش ادئردئلر. | .31 |
| ← Judges 18/21 → |