←  Joshua 6/24   →

---

ائسرايئل اؤولادلارينين اوزوندن اَرئحا برک باغلانميشدي. اورايا گئرئب-چيخان يوخ ائدي.

.1

رب يوشَعه ددي: "باخ اَرئحاني، اونون پادشاهي ائله ائگئد آداملاريني سنه تسلئم اتمئشم.

.2

سئز، يعني بوتون دؤيوشچولر شهرئن اطرافينا بئر دفه دولانين؛ آلتي گون بله ادئن.

.3

عهد سانديغينين قاباغيندا، يدّي کاهئن، قوچ بوينوزوندان اولان يدّي کَره‌ناي داشيسين. يدّئنجی گون شهري يدّي دفه دولانين و کاهئنلر کَره‌نايلاري چالسينلار.

.4

او زامان کي، اونلار قوچ بوينوزوندان اولان کَره‌نايي اوزون بئر شکئلده چاليرلار و سئز اونو اشئدئرسئنئز، بوتون خالق گور سَسله باغيرسين. او واخت شهرئن قالا دووارلاري يره ييخلار و خالقين هر بئري دايانديغي يردن شهره قالخار."

.5

نون اوغلو يوشَع کاهئنلري چاغيريب اونلارا ددي: "عهد سانديغيني گؤتورون. ربّئن سانديغي قاباغيندا يدّي کاهئن قوچ بوينوزوندان اولان يدّي کَره‌ناي داشيسين."

.6

خالقا دا ددي: "قاباغا گدئن، و شهري دولانين. قويون سئلاحلي آداملار ربّئن سانديغي قاباغيندا گتسئنلر."

.7

يوشَع بونو خالقا ددئيئنده، يدّي کاهئن قوچ بوينوزوندان اولان يدّي کَره‌نايي گؤتوردولر و ربّئن قاباغيندا کچئب کَره‌نايلاري چالديلار؛ ربّئن عهد سانديغي دا اونلارين دالينجا آپاريلدي.

.8

سئلاحلي آداملار کَره‌نايلاري چالان کاهئنلرئن قاباغيندا گدئردئلر. کاهئنلر کَره‌نايلاري چالا-چالا گِدَرکن، آرخادا اولان دسته سانديغين دالينجا گدئردي.

.9

لاکئن يوشَع خالقا امر ادئب ددي: "سئزه «چيغيرين» دئيه‌جيئم گونه قدر چيغيرمايين، سَسئزي اشئتدئرمه‌يئن، آغزينيزدان هچ بئر سؤز چيخماسين. آنجاق من دئيَن واخت چيغيرين."

.10

بلجه ربّئن عهد سانديغيني شهرئن اطرافينا بئر دفه دولانديردي؛ سونرا اوردوگاها گلدئلر و اورادا گِجَله‌دئلر.

.11

يوشَع سحر اِرکَن قالخدي. کاهئنلر ده ربّئن سانديغيني گؤتوردولر.

.12

يدّي کاهئن کي، قوچ بوينوزوندان اولان يدّي کَره‌نايي داشي‌ييرديلار، ربّئن سانديغي قاباغيندا گدئردئلر و کَره‌نايلاري چاليرديلار؛ سئلاحلي آداملار اونلارين قاباغيندا گدئردي. آرخا دسته ده، کاهئنلر شيپورلاري چالارکَن اونلارين دالينجا گدئردي.

.13

بلجه اونلار ائکئنجي گون ده شهري بئر دفه دولانديلار و اوردوگاها قاييتديلار؛ آلتي گون بله اتدئلر.

.14

يدّئنجی گون تزدن سحر آچيلاندا قالخديلار و شهري يدّي دفه بو قايدا ائله دولانديلار؛ آنجاق او يدّئنجی گون، شهري يدّي دفه دولانديلار.

.15

يدّئنجی دفه دولانان زامان، کاهئنلر کَره‌نايلاري چالاندا، يوشَع خالقا ددي: "چيغيرين! چونکي رب شهري سئزه ورئب.

.16

شهر بئزه حارامدير، شهر و اوندا اولان هر شي ربّه عاييددير؛ آنجاق فاحئشه راخاب و اونونلا بئرلئکده اِوده اولانلارين هاميسي گرک صاغ قالسين. چونکي او، گؤندردئيئمئز اِلچئلري گئزلَتدي.

.17

لاکئن سئز، حارام اولموش شيلردن اوزاق دورون، اله کي، طاماحلانماييب حارام اولان شيلردن هچ نه گؤتورمَيه‌سئنئز. و ائسرايئل اوردوگاهيني لعنت آلتينا سالماييب باشينا بلا گتئرمَيه‌سئنئز.

.18

آنجاق بوتون قيزيل و گوموش، بورونج و دمئر اشيالار ربّه مخصوصدور؛ اونلار گرک ربّئن خزئنه‌سئنه ورئلسئن."

.19

خالق چيغيردي و کاهئنلر کَره‌نايلاري چالديلار. خالق کَره‌ناي سَسئني اشئدنده اوجادان چيغيردي. او واخت قالا دووارلاري ييخيليب يرله بئر اولدو و خالقين هر بئري ائره‌لي گدئب شهري آلديلار.

.20

اونلار شهرده اولانلارين هاميسيني حارام اولاراق قيلينجدان کچئردئب کامئل محو اتدئلر؛ کئشئني، آروادي، جاواني، قوجاني، اؤکوزو، قويونو، اِششه‌يي.

.21

يوشَع اؤلکه‌ني گؤزدن کچئردن او ائکي نفر جاسوسا ددي: "فاحئشه آروادين اِوئنه گدئن، اونا آند ائچدئيئنئز کئمي آروادي و اونون يانينداکيلارين هاميسيني اِودن چيخاردين."

.22

بلجه بو جاوان جاسوسلار گدئب راخابي، آتاسيني، آناسيني، قارداشلاريني، و بوتون وار-يوخونو گتئردئلر؛ اونلار حتّا اونون بوتون قوحوملاريني دا گتئردئلر و اونلاري ائسرايئل اوردوگاهينين کناريندا قويدولار.

.23

شهره و اورادا اولان هر شيه اود ووروب يانديرديلار. آنجاق قيزيل و گوموشو، بورونج و دمئر اشيالاري ربّئن خَزئنه‌سئنه قويدولار.

.24

لاکئن يوشَع فاحئشه راخابي، اونون آتاسينين عايئله‌سئني و اونون بوتون وار-يوخونو حئفظ اتدي؛ آرواد بو گونه قدر ائسرايئللی‌لرئن آراسيندا ياشاييب، چونکي اَرئحاني گؤزدن کچئرتمَک اوچون يوشَعئن گؤندردئيي اِلچئلري يانيندا گئزلَتدي.

.25

يوشَع او واخت خالقا آند ائچدئرئب اونلارا ددي: "ربّئن حوضوروندا ملعون اولسون او آدام کي، بو اَرئحا شهرئني برپا ادئر؛ بونو ادن آدام اونون بونؤوره‌سئني ائلک اوغلونون حياتي باهاسينا قوياجاق، اونون دروازالاريني دا کئچئک اوغلونون حياتي باهاسينا برپا اده‌جک."

.26

بلجه رب يوشَعله و اونون شؤهرتي بوتون اؤلکه‌يه ياييلدي.

.27

---

←  Joshua 6/24   →