Joshua 10/24

← Joshua 10/24 →

او زامان کي، اورشلئم پادشاهي اَدوني‌صِدِق اشئتدي کي، يوشَع عاي شهرئني آليب و اونو کامئل محو ادئب (نجه کي، هم اَرئحا ائله پادشاهينين، هم ده عاي شهري ائله پادشاهينين باشينا گتئرمئشدي)، گئبعون اهالئسي ده ائسرايئللی‌لرله صولح باغلاييب اونلارين آراسينداديرلار،

چوخ قورخويا دوشدو، چونکي گئبعون شهري شاه‌نئشئن شهرلردن بئري کئمي بؤيوک بئر شهر ائدي. گئبعون عاي شهرئندن ده بؤيوک ائدي و اورانين بوتون آداملاري ائگئد ائدئلر.

بونون اوچون اورشلئم پادشاهي اَدوني‌صِدِق، خِبرون پادشاهي هوهاما، يَرموت پادشاهي پئراما، لاکئش پادشاهي يافئعه، عِگلون پادشاهي دِبئره خبر گؤندرئب ددي:

"يانيما گلئب گئبعونلولاري قيرماقدا منه کؤمک ادئن، چونکي اونلار يوشَع و ائسرايئل اؤولادلاري ائله صولح ادئبلر."

بلجه بش اِمور پادشاهي يعني اورشلئم پادشاهي، خِبرون پادشاهي، يَرموت پادشاهي، لاکئش پادشاهي، عِگلون پادشاهي، بوتون قوشونلاري بئرلَشدئرئب چيخديلار و گئبعون قاباغيندا اوردوگاه قوروب اونونلا ووروشدولار.

گئبعون آداملاري گئلگالداکي اوردوگاها، يوشَعه خبر گؤندرئب ددئلر: "اَلئني قوللارينين اوستوندن چکمه، تز يانيميزا گل، بئزي قورتار و بئزه کؤمک ات. چونکي داغليقدا ياشايان بوتون اِمور پادشاهلاري بئزئم ضئدّئمئزه بئرلَشئبلر."

يوشَع، اونونلا بئرلئکده بوتون دؤيوشچولر و بوتون ائگئد آداملار گئلگالدان چيخديلار.

رب يوشَعه ددي: "اونلاردان قورخما، چونکي اونلاري سنه تسلئم اتمئشم؛ اونلاردان هچ کئم سنئن قاباغيندا دورا بئلميه‌جک."

يوشَع گئلگالدان بوتون گجه‌ني يول گدئب قَفلَتَن اونلارين اوستونه گلدي.

رب اونلاري ائسرايئللی‌لرئن قاباغيندا گئجَلتدي، و ائسرايئللی‌لر اونلاري گئبعوندا بؤيوک بئر شکئلده قيرديلار و اونلاري بِيت ‌خورونا چيخان يول بويونجا تعقئب ادئب عَزِقا و مَقّدايا قدر قيرديلار.

.10

اِمورلولار ائسرايئللی‌لرئن قاباغيندان قاچديقلاري زامان، بِيت‌ خورون اِنئشئنده ائکن، رب اونلارين اوستونه عَزِقايا قدر گؤيدن بؤيوک داشلار آتدي و اونلار اؤلدولر؛ داش دولوسو ائله اؤلَنلر ائسرايئل اؤولادلارينين قيلينجلا اؤلدوردوکلرئندن داها چوخ ائدي.

.11

رب اِمورلولاري ائسرايئل اؤولادلارينا تسلئم اتدئيي گون يوشَع ربّه يالواردي و ائسرايئللی‌لرئن گؤزو قاباغيندا ددي: "ای گونش، گئبعون اوستونده دايان، ای آي، سن ده اَيّالون دره‌سئنده."

.12

ائسرايئل خالقي دوشمنلرئندن قئصاص آلانا قدر گونش اورادا داياندي و آي يرئنده قالدي. مگر بو، ياشار کئتابيندا يازيلماييبدير؟ گونش گؤيون اورتاسيندا دوردو و گِجئدئب تخمئنن بوتون گون باتمادي.

.13

ربّئن ائنسان سَسئني اشئتدئيي او گون کئمي بئر گون، نه اوندان اوّل، نه ده اوندان سونرا اولدو؛ چونکي رب ائسرايئل اوچون ووروشدو.

.14

سونرا يوشَع و اونونلا بئرلئکده بوتون ائسرايئللی‌لر گئلگالداکي اوردوگاها قاييتديلار.

.15

بو بش پادشاه قاچيب مَقّدادا اولان ماغارادا گئزلَندئلر.

.16

يوشَعه خبر وردئلر: "بش پادشاه تاپيليب. اونلار مَقّداداکي ماغارادا گئزلَنئبلر."

.17

يوشَع ددي: "ماغارانين آغزينا بؤيوک داشلار يووارلادين و يانينا آداملار قويون کي، اونو گؤز آلتيندا ساخلاسينلار.

.18

لاکئن سئز اؤزونوز دايانمايين؛ دوشمنلرئنئزي تعقئب ادئن و اونلارا آرخادان هوجوم گتئرئن. اونلاري قويمايين کي، شهرلرئنه گئرسئن. چونکي تارينيز رب اونلاري سئزه تسلئم ادئب."

.19

يوشَع و ائسرايئل اؤولادلاري دوشمنی، محو اولاناجاق، چوخ آغير بئر شکئلده قيرديلار. صاغ قالانلار قالالي شهرلرده پناه توتدولار.

.20

بوتون خالق مَقّدادا‌کي اوردوگاها، يوشَعئن يانينا سالامات قاييتدي و بوندان سونرا ائسرايئل اؤولادلارينين ضئدّئنه هچ کئم بئر سؤز دئيه بئلمه‌دي.

.21

او واخت يوشَع ددي: "ماغارانين آغزيني آچين، بو بش پادشاهي منئم يانيما گتئرئن."

.22

اِله ده اتدئلر، ماغارادان بو بش پادشاهي يعني اورشلئم پادشاهيني، خِبرون پادشاهيني، يَرموت پادشاهيني، لاکئش پادشاهيني و عِگلون پادشاهيني اونون يانينا گتئردئلر.

.23

بو پادشاهلاري يوشَعئن يانينا گتئرن زامان، او بوتون ائسرايئل آداملاريني چاغيردي. اونونلا گدن دؤيوشچولرئن باشچيلارينا ددي: "ياخينلاشين، آياقلارينيزي بو پادشاهلارين بوينونا قويون." اونلار ياخينلاشيب آياقلاريني اونلارين بوينونا قويدولار.

.24

يوشَع اونلارا ددي: "قورخمايين، اوره‌يئنئز اوزولمه‌سئن. گوجلو و جسارتلي اولون. چونکي رب ووروشاجاغينيز بوتون دوشمنلرئنئزئن باشينا بله اده‌جک."

.25

اوندان سونرا يوشَع اونلاري ووروب اؤلدوردو. اونلاري بش آغاجدان آسدي و آخشاما کئمي آغاجدان آسيلي قالديلار.

.26

گون باتاندا يوشَع امر اتدي کي، اونلاري آغاجدان اِندئرسئنلر و اونلاري گئزلَندئکلري ماغارايا آتديلار. ماغارانين آغزينا دا بؤيوک داشلار قويدولار و بو داشلار بو گونه قدر ده اورادادير.

.27

يوشَع او گون مَقّداني آلدي، اونو و اونون پادشاهيني قيلينج آغزينا وردي؛ اونو و اوندا اولان هر کسي کامئل محو اتدي. بئر آدامي بِله، صاغ بوراخمادي. اَرئحا پادشاهينين باشينا گتئردئيئني، مَقّدا پادشاهينين دا باشينا گتئردي.

.28

يوشَع و اونونلا بئرلئکده بوتون ائسرايئللی‌لر، مَقّدادان لئبنايا کچدئلر و لئبنانين ضئدّئنه ووروشدولار.

.29

رب هم شهري، هم ده اونون پادشاهيني ائسرايئللی‌لره تسلئم اتدي. يوشَع پادشاهي و اورادا اولان بوتون آداملاري قيلينجدان کچئردئب بئر آدامي بِله، صاغ بوراخمادي. اَرئحا پادشاهينين باشينا گتئردئيئني، اورانين پادشاهينين دا باشينا گتئردي.

.30

يوشَع و اونونلا بئرلئکده بوتون ائسرايئللی‌لر لئبنادان لاکئشه کچدئلر و اونلارين قاباغيندا اوردوگاه قوروب لاکئشلئلرله ووروشدولار.

.31

رب لاکئشي ائسرايئللی‌لره تسلئم اتدي؛ يوشَع اوراني ائکئنجي گون آلدي. لئبنادا اتدئکلري کئمي، لاکئش و اوراداکي بوتون آداملاري دا قيلينجدان کچئرتدئلر.

.32

او زامان گِزِر پادشاهي خورام، لاکئشه کؤمک اتمک اوچون گلدي. يوشَع او و اونون خالقيني دا قيردي و هچ کسي صاغ بوراخمادي.

.33

يوشَع و اونونلا بئرلئکده بوتون ائسرايئللی‌لر لاکئشدن عِگلونا کِچدئلر، و اوردوگاه قوروب عِگلونلولارلا ووروشدولار.

.34

اِله همئن گون اوراني آلديلار و قيلينجدان کچئرتدئلر؛ لاکئشده اتدئکلري کئمي، عِگلونداکي بوتون آداملاري او گون کامئل محو اتدئلر.

.35

سونرا يوشَع و اونونلا بئرلئکده بوتون ائسرايئللی‌لر، عِگلوندان خِبرونا کِچدئلر و اوراداکيلارلا ووروشدولار.

.36

اوراني دا آليب پادشاهيني، بوتون کَندلري و بوتون اهالئسئني قيلينجدان کچئرتدئلر. يوشَع عِگلوندا اتدئکلري کئمي، خِبروندا دا دئري بئر آدام قويمادي؛ اوراني و اوراداکي بوتون آداملاري کامئل محو اتدي.

.37

يوشَع و اونونلا بئرلئکده بوتون ائسرايئللی‌لر، دِبئره قاييتديلار و اوراداکيلارلا ووروشدولار.

.38

يوشَع دِبئري، پادشاهيني و بوتون کَندلرئني آليب اهالئسئني قيلينجدان کچئرتدي. اورادا اولان بوتون آداملاري کامئل محو اتدي. بئر آدام بِله، صاغ قويمادي. يوشَع خِبرونون، لئبنانين و اونون پادشاهينين باشينا گتئردئيئني، دِبئرئن و اونون پادشاهينين دا باشينا گتئردي.

.39

بلجه يوشَع بوتون اؤلکه‌ني يعني داغليق يرلري، نِگِبي، هامار بؤلگه‌ني و داغ ياماجلاريني توتدو و بوتون او يرلرئن پادشاهلاريني قيردي. ائسرايئلئن تاريسي ربّئن امر اتدئيي کئمي، بئر آدامي بِله، صاغ بوراخمادي، نَفَس آلان هر آدامي کامئل محو اتدي.

.40

يوشَع قِدِش‌بَرنِعه‌دن غَزّه‌يه قدر، بوتون گوشِن دئياريندا ياشايانلاري حتّا گئبعونا قدر مغلوب اتدي.

.41

يوشَع بوتون بو پادشاهلاري و اونلارين اؤلکه‌لرئني بئر موحارئبه‌ده آلدي، چونکي ائسرايئلئن تاريسي رب، ائسرايئل اوچون ووروشدو.

.42

بلجه يوشَع و اونونلا بئرلئکده بوتون ائسرايئللی‌لر گئلگالداکي اوردوگاها قاييتديلار.

.43

← Joshua 10/24 →