←  Jeremiah 6/52   →
ای بِنيامئن اؤولادلاري، اورشلئمئن ائچئندن قاچيب قورتارين. تِقّوعه‌ده کَره‌ناي چالين، بِيت‌‌هَکّرِمده بئر ائشاره قويون، چونکي شئمالدان فلاکت، و بؤيوک بئر قيرغين ظاهئر اولور. .1
من گؤزل و ظرئف قيزي، صحيون قيزيني کَسئب آتاجاغام. .2
چوبانلار اؤز سورولري ائله اونون يانينا گله‌جکلر، اونون اطرافيندا هر طرفدن چادير قوراجاقلار. هر کس اؤز يِرئنده سوروسونو اوتاراجاق. .3
صحيون قيزينين ضئدّئنه دؤيوش اوچون حاضيرلاشين! قالخين، گلئن، گون اورتا چاغي هوجوم اِدَک! واي حاليميزا، چونکي گون توتقونلاشير، آخشام کؤلگه‌لري اوزانير. .4
قالخين، گلئن، گجه واختي هوجوم اِدَک! اونون سارايلاريني داغيداق! .5
چونکي قوشونلار ربّی بله ديئر: "آغاج کَسئن، اورشلئمئن قاباغيندا سنگر قورون. بو شهر جزالانمالي‌دير، چونکي ظولمله دولوب-داشير. .6
بئر بولاقدان سو نجه آخير، بو شهردن ده پئسلئک اِله فيشقيرير. ائچئنده قدّارليق و سويغونچولوق سَسي اِشئدئلئر. گؤزومون قاباغيندا دائم درد و يارا وار. .7
ای اورشلئم، عئبرت آل، يوخسا جانيم سندن آيريلار، سني خارابايا، اَهالئسئز تورپاغا چِوئره‌رم." .8
قوشونلار ربّی بله ديئر: "تَنَکدن آخير اوزوملر ييغيلان کئمي، ائسرايئلئن قالان اهالئسي ده ييغيليب قورتاراجاق. اوزوم‌ييغان کئمي گئنه مِينه بوداقلارينا اَلئني اوزات." .9
کئمئنله دانيشيم، کئمه ائخطار ورئم کي، قولاق آسسين؟ باخ، قولاقلاري باغلي‌دير، اِشئده بئلمئرلر. باخ، ربّئن سؤزوندن عار ادئرلر، اوندان خوشلاري گلمئر. .10
آمّا من ربّئن قضبي ائله دولموشام، اؤزومون قاباغيني توتماقدان يورولموشام. "قضبئني کوچه‌ده اولان اوشاقلارين، ييغيلان جاوانلارين اوستونه تؤک. بلی، اَر ده، آرواد دا، قوجا دا، ياشا دولموش آدام دا بئرلئکده اسئر اولاجاق. .11
اِولري، زَمئلري، و آروادلاري دا باشقالارينا ورئله‌جک. چونکي اَلئمي اؤلکه‌ده ياشايانلارين ضئدّئنه اوزاداجاغام." رب بويورور. .12
"اونا گؤره کي بؤيوکدن کئچئيه قدر، هر کس حارام قازانج دالينجا قاچير. پيغمبردن کاهئنه قدر هر کس حئيله قورور. .13
خالقيمين ياراسيني سؤزده ياخشيلاشديريرلار، «صولح، صولح» ديئرلر، آمّا صولح يوخدور. .14
اتدئکلري ائيرنج ائشلر اوچون مگر اوتانيرديلار؟ يوخ، اصلا اوتانميرديلار، اوتانيب قيزارماق دا بئلمئردئلر. بونا گؤره ده ييخيلانلار آراسيندا اونلار دا اولاجاقلار. من اونلاري جزالانديرديغيم واخت يِره سَرئله‌جکلر." رب بويورور. .15
رب بله ديئر: "يوللار قيراغيندا دايانيب باخين، ازلدن اولان طرئقلري سوروشون. ياخشي يولون هارادا اولدوغونو اؤيره‌نئن، او يوللا گدئن. او واخت جانينيز دئنجلئک تاپار. لاکئن اونلار ددئلر: «او يوللا گتميه‌جيئک.» .16
من سئزئن اوستونوزه کشئکچئلر قويوب ددئم: «کَره‌ناي سَسئنه قولاق آسين!» آمّا اونلار ددئلر: «قولاق آسماياجاغيق.» .17
بونا گؤره ده، ای مئلّتلر، قولاق آسين، ای جاماعات، باشلارينا نه گله‌جيئني بئلئن. .18
اشئت، ای يِر اوزو، باخ، من بو خالقين باشينا فلاکت گتئرئرم. بو اونلارين نئيّتلرئنئن نتئجه‌سي اولاجاق. چونکي منئم سؤزلرئمه قولاق آسماييبلار، قانونومو دا ردّ ادئبلر. .19
شِبادان گتئرئلَن کوندور، اوزاق اؤلکه‌دن گلمئش عطئرلي قاميش نه‌يئمه لازيمدير؟ يانديرما قوربانلارينيز منه مقبول ديئل، قوربانلارينيز منه خوش ديئل." .20
بونا گؤره ده رب بله ديئر: "باخ، من بو خالقين قاباغينا مانعلر قوياجاغام. آتالار و اوغوللار بئرلئکده اونلارا ائلئشئب ييخيلاجاقلار. قونشو دوستو ائله بئرلئکده هلاک اولاجاق." .21
رب بله ديئر: "باخ، شئمال اؤلکه‌سئندن بئر خالق گلئر، دونيانين اوزاق يِرلرئندن بؤيوک بئر مئلّت قالخاجاق. .22
اوخ-کامان و نئزه ائله سئلاحلانميش، قدّار و رحمسئزدئرلر. آتلارين اوستونده گلرکَن، سَسلري دهنز کئمي گورلايير. دؤيوشه حاضير دؤيوشچولر کئمي، قاباغيندا دوزوله‌جکلر کي، سنه هوجوم اتسئنلر، ای صحيون قيزي!" .23
اونلارين خبرئني اشئتمئشئک، اَللرئمئز يانيميزا دوشوب. دوغان آرواد کئمي اونو آغري و سانجي توتوب. .24
چؤله چيخما، يولا دوشمه، چونکي دوشمنده قيلينج وار، هر طرفده دهشت وار. .25
ای منئم خالقيمين قيزي، چول گِيئن، کولده يووارلان. يگانه اوغلونا ياس توتان کئمي ياس توت و آجي-آجي آغلا. چونکي محو ادن، قَفلَتَن باشيميزين اوستونو آلاجاق. .26
"ای اِرِميا، من سني قويموشام کي، خالقيمي يوخلاييب ائمتاحان اده‌سن، اونلارا نظر قويوب عمل‌لرئني ائمتاحان اده‌سن. .27
هاميسي عئنادکار عوصيانچي‌دير، نَمّامليق اوچون گَزئرلر. بورونج و دمئر کئمي بَرکدئرلر، هاميسي فاسئد اولوب. .28
کؤروک شئدّتله اوفورور، قورغوشون اود ائچئنده اَرئيئر. دمئرچي عبث يِره اَرئدئر، چونکي پئسلر آيريلميرلار. .29
اونلارا «آتيلميش گوموش» دئيه‌جکلر، چونکي رب اونلاري آتيب." .30
←  Jeremiah 6/52   →