←  Jeremiah 52/52     
صئدقئيا، پادشاه اولدوغو واخت، ائيئرمي بئر ياشيندا ائدي و اورشَلئمده اون‌بئر ائل پادشاهليق اتدي. آناسي لئبنالي اِرِميا‌نين قيزي خَموطَل ائدي. .1
او، يِهوياقئمئن اتدئيي کئمي ربّئن گؤزونده پئس اولان ائشلر اتدي. .2
حقئقتن، ربّئن قضبئنه گؤره اورشَلئمئن و يهودانين باشينا بو ائش گلدي و آخيردا رب اونلاري حوضوروندان آتدي. صئدقئيا بابئل پادشاهينين ضئدّئنه عوصيان اتدي. .3
صئدقئيانين پادشاهليغينين دوقّوزونجو ائلئنده، اونونجو آيين اونونجو گونو بابئل پادشاهي نِبوکَدنِصّر بوتون قوشونو ائله اورشَلئمئن اوستونه هوجوم اتدي، اورانين ضئدّئنه اوردوگاه قوردو و اطرافيندا موحاصئره دوواري دوزلتدي. .4
صئدقئيا پادشاهين حاکئمئيّتئنئن اون بئرئنجي ائلئنه قدر شهر موحاصئره‌ده قالدي. .5
دؤردونجو آيين دوقّوزونجو گونو شهرده آجليق اِله گوجلَندي کي، اؤلکه خالقينين يِمَيه چؤره‌يي قالمادي. .6
بو واخت شهرئن دوواريندا دَلئک آچيلدي. گجه ائکن کَلدانئلر شهرئن اطرافيندا اولاندا، بوتون دؤيوشچولر پادشاه باغچاسينين يانيندا اولان ائکي دووار آراسينداکي دروازادان قاچيب عَرَبه اوواسينا گِدن يوللا گتدئلر. .7
لاکئن کَلدانئلرئن قوشونو پادشاهي تعقئب اتدئلر و اَرئحا اووالاريندا صئدقئيايا چاتديلار. صئدقئيانين بوتون قوشونو اونو ترک ادئب داغيلديلار. .8
پادشاهي توتوب خَمات تورپاغينداکي رئبلايا، بابئل پادشاهينين يانينا آپارديلار. بابئل پادشاهي اونون حاقّيندا حؤکم وردی. .9
او، رئبلادا صئدقئيانين گؤزو قاباغيندا اوغوللاريني اؤلدورتدو، سونرا بوتون يهودا باشچيلاريني دا اؤلدورتدو. .10
سونرا صئدقئيانين گؤزلرئني چيخارتدي، اونو زنجئرله‌يئب بابئله آپاردي. بابئل پادشاهي اونو اؤلَنه قدر زئنداندا ساخلادي. .11
بابئل پادشاهي نِبوکَدنِصّرئن پادشاهليغينين اون دوقّوزونجو ائلئنده، بِشئنجي آيين اونونجو گونو کشئکچئلر ريئسي نِبوزَره‌دان کی، بابئل پادشاهينا خئدمت ادئردی، اورشَلئمه گلدي. .12
او، ربّئن معبدئنه، پادشاه سارايينا، اورشَلئمده‌کي بوتون اِولره اود ووروب بوتون اَساس بئنالاري يانديردي. .13
بوتون کَلده قوشونو دا کی، کشئکچئلر ريئسي ائله بئرلئکده گلمئشدئلر، اورشَلئمئن اطرافينداکي دووارلاري اوچورتدولار. .14
کشئکچئلر ريئسي نِبوزَره‌دان يوخسول آداملارين بئر حئصّه‌سئني، شهرده قالان خالقي، بابئل پادشاهينين طرفئنه کِچَن فرارئلري و صاغ قالان صَنَتکارلاري اسئر اتدي. .15
آنجاق او، باغچيليق و اَکئنچئلئک اتمک اوچون اؤلکه‌ده‌کي لاپ يوخسوللارين بئر حئصّه‌سئني اورادا ساخلادي. .16
کَلدانئلر ربّئن معبدئنده اولان بورونج سوتونلاري، پايالاري و بورونج حوووضو پارچالاييب بوتون بورونج‌لرئني بابئله آپارديلار. .17
عئبادت زاماني ائشله‌دئلَن خَکَندازلاري، کورَکلري، ماشالاري، لَيَنچه‌لري، قاشيقلاري و بوتون بورونج قابلاري دا گؤتوروب آپارديلار. .18
کشئکچئلر ريئسي خالئص قيزيلدان و گوموشدن اولان کاسالاري، بوخوردانلاري، لَيَنچه‌لري، خَکَندازلاري، چيراقدانلاري، قاشيقلاري، لَيَنلري گؤتوروب آپاردي. .19
ربّئن معبدي اوچون سوليمان پادشاهين دوزلتدئيي ائکي سوتون، حوووض و آلتينداکي اون ائکي بورونج گاميش موجسّمه‌سي و پايالاردان آلينان بورونجون آغيرليغي حسابا گلمَزدي. .20
بئر سوتونون بويو اون سکّئز قول‌آچ ائدي، دائره‌سي اون‌ائکي قول‌آچ ائدي. هر بئري دؤرد بارماق قالينليغيندا ائدي، ائچلري بوش ائدي. .21
اوستونده بورونج بئر باشليق وار ائدي. باشليغين بويي بش قول‌آچ ائدي. بو باشليغين اطرافيندا حؤرمه تور و نارلار وار ائدي، هر شي بورونجدن دوزَلدئلمئشدي. او بئري سوتون دا نارلارينان بَزَنمئشدي و اوّلکئنه بَنزه‌يئردي. .22
يانلاردا دوخسان آلتي نار وار ائدي. باشليغي اَحاطه‌يه آلان حؤرمه تورلارين اوستونده جَمي يوز نار وار ائدي. .23
کشئکچئلر ريئسي نِبوزَره‌دان باش کاهئن سِراياني، باش کاهئنئن موعاوئني صِفَنياني و اوچ قاپي کشئکچئسئني اسئر آلدي. .24
شهرده قالان دؤيوشچولرئن سرکرده‌سئني، پادشاهين مصلحتچئلرئندن شهرده اولان يدّي نفري، اؤلکه خالقيني قوشونا يازان سرکرده‌نئن مئرزه‌سئني و اؤلکه خالقيندان شهرده قالان آلتميش نفري اسئر توتدو. .25
کشئکچئلر ريئسي نِبوزَره‌دان اونلاري گؤتوروب رئبلايا، بابئل پادشاهينين يانينا آپاردي. .26
بابئل پادشاهي، خَمات تورپاغيندا اولان رئبلادا اونلاري اؤلدورتدو. بلجه يهودا خالقي اؤز اؤلکه‌سئندن اسئر اولوندو. .27
نِبوکَدنِصّرئن اسئرلئيه آپارديغي خالقين سايي بله‌دئر: يدّئنجی ائلده، اوچ مئن ائيئرمي اوچ نفر يهودي؛ .28
نِبوکَدنِصّرئن پادشاهليغينين اون سکّئزئنجي ائلئنده، اورشَلئمدن سکّئز يوز اوتوز ائکي نفر؛ .29
ائيئرمي اوچونجو ائلئنده، کشئکچئلر ريئسي نَبوزَره‌دانين اسئر اتدئيي يدّي يوز قيرخ بش نفر يهودي. هاميسي بئرلئکده دؤرد مئن آلتي يوز نفر ائدي. .30
يهودا پادشاهي يِهوياکئنئن اسئرلئکده اولماغينين اوتوز يدّئنجی ائلئنده، اِوئل مِرودَک بابئل پادشاهي اولدو. همئن ائلئن اون ائکئنجي آيينين ائيئرمي بِشئنجي گونو، اِوئل مِرودَک يهودا پادشاهي يَهوياکئنه مرحمت گؤرسده‌رک اونو زئنداندان آزاد اتدي. .31
اونونلا مهرئبانليقلا صؤحبت اتدي و اونون اوچون اؤزو ائله بئرلئکده بابئلده اولان پادشاهلارين تختئندن يوخاري بئر تخت قويدوردو. .32
يَهوياکئن حبسخانا پالتارلاريني اَينئندن چيخارتدي. او ياشاديغي مودّتده همئشه بابئل پادشاهينين سوفره‌سئنده يمک يئيَردي. .33
بوتون عؤمرو بويو اونا بابئل پادشاهي طرفئندن اؤله‌جيي گونه قدر گونده‌لئک آذوقه ورئلئردي. .34
←  Jeremiah 52/52