←  Jeremiah 50/52   →
رب بابئل و کَلدانئلرئن اؤلکه‌سي باره‌ده اِرِميا پيغمبرئن واسئطه‌سئله بو سؤزلري نازئل اتدي: .1
"مئلّتلره بئلدئرئب اعلان ادئن. بايراق قالديريب خبر ورئن؛ هچ نه‌يي گئزلَتمه‌يئن! ديئن: بابئل اَله کچئرئله‌جک، بِل آللاهي خجالت آلتيندا قالاجاق، مِرودَک آللاهي دهشته دوشه‌جک، تئمثاللاري آلچالديلاجاق، بوتلري تئکه-تئکه اولاجاق. .2
اوستونه شئمالدان بئر مئلّت هوجوم اده‌جک، اؤلکه‌سئني وئران قوياجاق. اورادا ياشايان اولماياجاق؛ ائنسان دا، حيوان دا قاچيب گده‌جک." .3
رب بويورور: "او گونلر، او زامان ائسرايئل خالقي ائله يهودا خالقي بئرلئکده گله‌جک، اونلار آغلايا-آغلايا گلئب اؤزلرئنئن تاريسي ربّی آختاراجاقلار. .4
صحيونا گِدن يولو سوروشاجاقلار و اوزلرئني اونا طرف توتاجاقلار. اونلار گلئب ياددان چيخارديلماز، ابدی بئر عهدله ربّه باغلاناجاقلار. .5
خالقيم ائتمئش قويونلار کئمي اولوب، چوبانلاري اونلاري آزديريب، داغلاردا اؤزباشينا آوارا بوراخيب، اونلار داغدان تپه‌يه گتدئلر، ائستئراحت اتدئيي يري ياددان چيخارتديلار. .6
کئم اونلاري تاپدي، يِدي. دوشمنلري ددئلر: «بئز تقصئرکار ديئلئک، چونکي اونلار، اونلارا حقئقي اوتلاق اولان ربّه، آتالارينين اومئدي اولان ربّه گوناه اتدئلر.» .7
بابئلدن قاچيب قورتارين! کَلدانئلرئن اؤلکه‌سئني ترک ادئن، سورويه يول گؤرسه‌دن کِچئلر کئمي اولون! .8
چونکي من شئمال اؤلکه‌سئندن بابئلئن ضئدّئنه بؤيوک مئلّتلر ائتّئفاقيني قالديريب گتئره‌جيم. بابئلئن قاباغيندا دوزولوب اونو شئمالدان اَله کچئرده‌جکلر. اوخلاري ماهئر دؤيوشچو اوخلاري کئمي اولاجاق، هچ بئري اَلئبوش قاييتماياجاق. .9
بلجه کَلده اؤلکه‌سي قارت اولوناجاق، اونو قارت ادنلرئن هاميسي مالدان دوياجاقلار." رب بويورور. .10
"ای ائرثئمي تالايانلار، ائندي کي، سِوئنئب شادليقلا جوشورسونوز، خرمنده تاخيل دؤيَن بوزوو کئمي تولّانيرسينيز، توسَن کئمي کئشنه‌يئرسئنئز، .11
آنانيز چوخ اوتاناجاق، سئزي دوغانين اوزو قيزاراجاق. بابئل مئلّتلرئن لاپ ضعئفي، کؤشَن اولاجاق، قوراق بئر يِر، بئر صحرا اولاجاق. .12
ربّئن قضبي اوزوندن هچ کس اورادا ياشاماياجاق، کامئل وئران اولاجاق. بوتون کِچَنلر بابئلئن آلديغي بوتون يارالاري گؤرنده حيرت ائچئنده فئت چالاجاقلار. .13
ای بوتون کامان چکنلر، بابئلئن اطرافيندا دؤيوش اوچون دوزولون. اورايا اوخ آتين، اوخونوزو اسئرگَمه‌يئن. چونکي او، ربّه گوناه اتدي. .14
هر طرفدن اونون ضئدّئنه نعره چکئن، او تسلئم اولور، بورجلري ييخيلير، دووارلاري اوچولور. چونکي بو، ربّئن قئصاصي‌دير. اوندان قئصاص آلين، او نه ادئب، باشينا اونو گتئرئن. .15
بابئلده اَکئنچئلري محو ادئن، بئچئن واختي اوراقچيلاري ردّ ادئن. ظالئملارين قيلينجي اوزوندن هر کس اؤز خالقينين يانينا قاييتسين، هامي اؤز اؤلکه‌سئنه قاچسين. .16
ائسرايئل داغيلميش بئر سورو کئمي‌دئر، اونو آصلانلار قووور. اونو اوّل آشور پادشاهي يِدي، آخيري دا بابئل پادشاهي نِبوکَدنِصّر اونون سوموکلرئني قيردي." .17
بونا گؤره ده ائسرايئلئن تاريسي اولان قوشونلار ربّی بله ديئر: "آشور پادشاهيني نجه جزالانديرديم، بابئل پادشاهي ائله اؤلکه‌سئني ده اِلَجه جزالانديرجاغام. .18
لاکئن ائسرايئلي گئنه اؤز اوتلاغينا گتئره‌جيم، او، کَرمِلده و باشاندا اوتلاياجاق. اِفرايئمئن داغليق بؤلگه‌سئنده و گئلعاددا ائسته‌دئيي قدر يِيئب دوياجاق. .19
او گونلر، او زامان ائسرايئلده تقصئر آختاريلاجاق، لاکئن تاپيلماياجاق. يهودادا گوناه آختاريلاجاق، لاکئن تاپيلماياجاق. چونکي سالامات قويدوغوم آداملاري باغيشلاياجاغام." رب بويورور. .20
"مِراته‌يئم تورپاغينا، پِقوددا ياشايانلارا هوجوم ات. اونلاري تعقئب ادئب کامئل بئر شکئلده اؤلدور، سنه بوتون امر اتدئکلرئمي يرئنه يتئر." رب بويورور. .21
اؤلکه‌ده موحارئبه سَسي اِشئدئلئر، بؤيوک قيرغين سَسي! .22
بوتون دونيانين گورزي نجه ده قيريليب پارچالاندي! بابئل نجه ده مئلّتلر آراسيندا حيرت سببئنه دؤنوب! .23
سنئن اوچون تله قوردوم، ای بابئل، سن ده بئلمه‌دن تله‌مه دوشدون. توتولوب ياخالاندين، چونکي ربّئن ضئدّئنه ساواشدين. .24
رب سئلاح‌خاناسيني آچيب، قضبئنئن سئلاحلاريني چيخارديب. چونکي قوشونلار ربّی پروردئگارين کَلده اؤلکه‌سئنده اده‌جيي بئر ائش وار. .25
هر ياندان اونا هوجوم ادئن، آنبارلاريني آچين، ماللاريني قالاق-قالاق ييغين. اونو کامئل محو ادئن، اوندان بئر شي قالماسين. .26
بوتون گاميشلاريني کَسئن؛ سالاقخانايا گتسئنلر. واي اونلارين حالينا! چونکي اونلارين گونو، اونلارين جزا واختي گلئب. .27
بابئل اؤلکه‌سئندن قاچيب قورتارانلارين سَسئني اِشئدئن؛ قاچيرلار کي، تاريميز ربّئن قئصاصيني، اونون معبدئنئن قئصاصيني، صَحيوندا اعلان اتسئنلر. .28
بوتون اوخچولاري، کامان چکَنلري بابئلئن ضئدّئنه چاغيرين. اطرافيني موحاصئره‌يه آلين، هچ کس قاچيب قورتارا بئلمه‌سئن. اونا ائشلرئنه گؤره عوض ورئن. او نه ادئب، باشينا اونو گتئرئن. چونکي ربّئن ضئدّئنه، ائسرايئلئن موقدّسئنئن ضئدّئنه کئبئرله‌نئب. .29
بونا گؤره ده جاوانلاري ميدانلاردا يِره سَرئله‌جک؛ او گون بوتون دؤيوشچولري سوسدورولاجاق." رب بويورور. .30
"باخ، من سنه ضئدّم، ای مغرور." قوشونلار ربّی اولان پروردئگار بويورور. "چونکي سنئن گونون، سني جزالانديراجاغيم واخت گلئب. .31
مغرور بودره‌يئب-ييخيلاجاق، اونو قالديران اولماياجاق، شهرلرئنه اود سالاجاغام، بوتون اطرافيندا اولانلاري يانديريب يوخ اده‌جک." .32
قوشونلار ربّی بله ديئر: "بوتون ائسرايئل خالقي دا، يهودا خالقي دا اذئيّت چکئر. اونلاري اسئر توتانلار، اونلاري مؤحکم ساخلاييرلار، بوراخماق ائسته‌مئرلر. .33
آمّا اونلارين قَيّومو گوجلودور، اونون آدي قوشونلار ربّي‌دئر. رب قطعن اونلارين ائشئنه باخاجاق کي، اؤلکه‌يه راحاتليق ورسئن، آمّا بابئل ساکئنلرئنه تشوئش گتئرسئن." .34
رب بويورور: "کَلدانئلرئن ضئدّئنه قيلينج گلسئن! بابئل اؤلکه‌سئنده ياشايانلارا، بابئل باشچيلارينا، حئکمتلی‌لرئنئن ضئدّئنه قيلينج گلسئن! .35
يالانچي پيغمبرلرئنئن ضئدّئنه قيلينج گلسئن! آخماقليق‌لاري اوزه چيخاجاق. دؤيوشچولرئنئن ضئدّئنه قيلينج گلسئن! دهشت اونلاري بورويه‌جک. .36
آتلارينين، دؤيوش عارابالارينين، آرالارينداکي ياداِللي موزدلولرئنئن ضئدّئنه قيلينج گلسئن! هاميسي آرواد کئمي اولاجاقلار. خزئنه‌لرئنئن ضئدّئنه قيلينج گلسئن! اونلار قارت ادئله‌جکلر. .37
سولارينا قوراقليق گلسئن! اونلار قوروياجاقلار. چونکي بابئل، بوتلر اؤلکه‌سي‌دئر، قورخولو بوتلر اوزوندن، دَلي اولاجاقلار. .38
بونا گؤره ده اورادا چؤل حيوانلاري، چاقّاللار، بايقوشلار ياشاياجاق، داها ائنسان ياشاماياجاق، نسئلدن نسله اورادا هچ کس ساکئن اولماياجاق. .39
سودوملا گوموراني و اطرافينداکي کَندلري تاري نجه داغيتدي،" رب بويورور. اورادا کئمسه ياشاماياجاق، او يرده هچ کس ساکئن اولماياجاق. .40
باخ، شئمالدان بئر خالق گلئر؛ دونيانين اوزاق يِرلرئندن بؤيوک بئر مئلّت و چوخلو پادشاهلار قالخير. .41
اونلار اوخ-کامان و نئزه ائله سئلاحلانميش؛ قدّار و رحمسئزدئرلر. آتلارين اوستونده گلرکَن، سَسلري دهنز کئمي گورلايير. دؤيوشه حاضير دؤيوشچولر کئمي قاباغيندا دوزوله‌جکلر کي، سنه هوجوم اتسئنلر. ای بابئل قيزي! .42
بابئل پادشاهي اونلارين خبرئني اشئدئب، اَل‌لري يانلارينا دوشوب. دوغان آرواد کئمي اونو آغري و سانجي توتوب. .43
باخ، آصلان نجه اوردون چايينين کنارينداکي سيخ مِشه‌دن ياخشي سولانان اوتلاغا چيخيب گلئر، من ده بابئللی‌لري بئر آندا اؤز يوردوندان قوواجاغام. سِچئلمئش اولان کئمدئر کي، اونو بو ائشه رهبر قويوم؟ منئم کئمئسي مگر وار؟ منئمله کئم موبارئزه اده بئلر؟ منئم قاباغيمدا دوران بئر چوبان مگر وار؟» .44
بونا گؤره ده ربّئن بابئله ضئد فئکرئني، کَلدانئلرئن اؤلکه‌سئنه ضئدّ مقصدئني اِشئدئن: "سورونون لاپ کئچئکلري ده اسئر ادئله‌جک، خالقينا گؤره اوتلاقلاري صحرايا چِوئره‌جک. .45
«بابئل اَله کچئرئلدي» سَسئندن ير اوزو تئترَيه‌جک، مئلّتلر آراسيندا اونون فريادي اِشئدئله‌جک." .46
←  Jeremiah 50/52   →