| ← Jeremiah 5/52 → |
| "اورشلئمئن کوچه‌لرئني گَزئن، اطرافا باخيب فئکئرله‌شئن، اونون ميدانلاريني آختارين. اگر بئر نفر دوز ائش گؤرَن، حقئقت آختاران آدام تاپاسينيز، من شهري باغيشلايارام. | .1 |
| اونلار «وار اولان تارييا آند اولسون» دِسه‌لر ده، يقئن يالاندان آند ائچئرلر." | .2 |
| يارب، گؤزلرئن حقئقته طرف مگر دؤنمه‌يئب؟ سن اونلاري ووردون، لاکئن آغري حئسّ اتمه‌دئلر. سن اونلاري قيردين، آمّا عئبرت آلماديلار. اوزلرئني داشدان بَرک ادئبلر؛ دؤنمک ائستمه‌يئبلر. | .3 |
| او واخت من ددئم: "بونلار آنجاق يوخسولدورلار، آخماقديرلار، چونکي ربّئن يولونو، اؤزلرئنئن تاريسينين حؤکملرئني بئلمئرلر. | .4 |
| من بؤيوکلرئن يانينا گدئب اونلارلا دانيشارام، چونکي ربّئن يولونو، اؤزلرئنئن تاريسينين حؤکملرئني بئلئرلر." آنجاق اونلارين هاميسي دا بئرلئکده يوغو سينديريب ائپلري قيريبلار. | .5 |
| بونا گؤره ده مِشه‌دن بئر آصلان چيخيب اونلاري اؤلدوره‌جک، صحرادان قورد گلئب اونلاري پارچالاياجاق، شهر کناريندا پلنگ کمئن قوراجاق، شهردن چيخان هر آدام پارچالاناجاق. چونکي اونلارين عوصيانلاري چوخدور، دؤنوکلري ساييسيزدير. | .6 |
| "سني نجه باغيشلايا بئله‌رم؟ اؤولادلارين منی ترک ادئب، تاري اولمايان بوتلرئن آدي ائله آند ائچئب. من اونلاري دويدوردوغوم زامان، اونلار زئنا اتدئلر، فاحئشه‌لرئن اِولرئنه ييغيشديلار. | .7 |
| اونلار بَسلَنمئش، شهوتلي آتلار کئمئدئرلر. هر بئري قونشوسونون آروادينا کئشنه‌يئر." | .8 |
| رب بويورور: "من بونلارا گؤره اونلاري جزالانديرماييم؟ بله بئر مئلّتدن قئصاصيمي آلماييم؟ | .9 |
| اونلارين اوزوم آغاجلارينين سيرالاريندا گَزئب داغيدين، آمّا بوسبوتون محو اتمه‌يئن. مِينه بوداقلاريني قوپارديب آتين، چونکي اونلار ربّئن ديئل‌لر." | .10 |
| رب بويورور: "ائسرايئل و يهودا نسلی منه کامئل خيانت ادئب. | .11 |
| اونلار رب حاقّيندا يالان دانيشيب ديئبلر: «او هچ نه اتمز، باشيميزا بلا گلمز. نه قيلينج گؤره‌جيئک، نه قيتليق.» | .12 |
| پيغمبرلر بوش‌بوغازديرلار. تارينين سؤزو اونلاردا ديئل، قوي اونلارين باشينا بو ائش گلسئن." | .13 |
| بونا گؤره ده قوشونلار تاريسي رب بله ديئر: "بله سؤزلر ددئکلري اوچون، باخ، سؤزلرئمي سنئن آغزيندا اودا، بو خالقي دا اودونا چِوئره‌جيم، اود اونلاري يانديريب قورتاراجاق" | .14 |
| رب بويورور: "باخ، ای ائسرايئل خالقي، اوزاقدان اوستونوزه بئر مئلّت گتئره‌جيم؛ دئلئني بئلمه‌دئيئن، ددئکلرئني آنلاماديغين گوجلو و قدئم بئر مئلّت. | .15 |
| اونلارين اوخدانلاري آچيق قبئر کئمئدئر، هاميسي ائگئد دؤيوشچودور. | .16 |
| اونلار سنئن محصول و چؤره‌يئني يئيه‌جکلر. اوغوللار و قيزلاريني يئيه‌جکلر، سورولر و ناخيرلاريني يئيه‌جکلر، مِينه‌لر و اَنجئر آغاجلاريني يئيه‌جکلر. اِعتئماد اتدئيئن قالالي شهرلري قيلينجلا داغيداجاقلار." | .17 |
| رب بويورور: "حتّا او گونلر ده سئزي کامئل قيريب يوخ اتميه‌جيم. | .18 |
| بئر واخت اونلار سوروشاجاقلار: «نه اوچون تاريميز رب بوتون بونلاري باشيميزا گتئردي؟» او واخت اونلارا بله دِه: «نجه منی ترک ادئب اؤز اؤلکه‌نئزده ياد آللاهلارا خئدمت اتدئنئز، اِلَجه ده ياد اِللی‌لره سئزئن اولمايان اؤلکه‌ده خئدمت اده‌جکسئنئز.» | .19 |
| بونو يعقوب نسلئنئه اعلان ات، يهودايا اعلان ادئب دِه: | .20 |
| «بو سؤزه قولاق آسين، ای عاغيلسيز و درّاکه‌سئز خالق، ای گؤزلري اولارکن گؤرمه‌ين! قولاقلاري اولارکن اشئتمه‌ين! | .21 |
| مندن مگر قورخمورسونوز؟»" رب بويورور. "منئم حوضورومدا تئتره‌مئرسئنئز؟ چونکي من ابدی فرمانلا دهنز اوچون قومو سرحد قويموشام، بونا گؤره ده اوندان کِچه بئلمز. شَپه‌لري جوشسا دا، قالئب گله بئلمز. نَعره چکسه ده، کِچه بئلمز. | .22 |
| آمّا بو خالقين عئنادلي و عوصيانکار اوره‌يي وار. اونلار آزيبلار، اؤز يوللاري ائله گدئبلر. | .23 |
| داها اؤز اورَکلرئنده دِمئرلر: «گلئن، ائندي تاريميز ربدن قورخاق، او کي، پاييز و ياز ياغيشلاريني بئزه واختيندا ورئر، موعَيّن بئچئن هَفته‌لرئني بئزئم اوچون قورويور.» | .24 |
| تقصئرلرئنئز بونلاري سئزدن آليب، گوناهلارينيز سئزي بو نعمتدن محروم ادئب. | .25 |
| چونکي منئم خالقيمين ائچئنده پئس آداملار وار: قوش اووچولاري کئمي کمئنده دورورلار، تله قوروب آدام توتورلار. | .26 |
| قوشلارلا دولو قفس کئمي، اونلارين اِولري حئيله ائله دولودور. بونون سايه‌سئنده اوجاليبلار، وارلانيبلار. | .27 |
| کؤکدورلر، يوغوندورلار، پئس ائشلرله حدلرئني آشيبلار، محکمه ائشلرئني، يِتئملرئن ائشلرئني عدالتله حلّ اتمئرلر کي، کامياب اولسونلار. يوخسول‌لارين حاقّيندان دئفاع اتمئرلر" | .28 |
| رب بويورور: "من بونلارا گؤره اونلاري جزالانديرماييم؟ بله بئر مئلّتدن قئصاصيمي آلماييم؟ | .29 |
| بو اؤلکه‌ده حيرتلي و دهشتلي بئر ائش باش ورئب: | .30 |
| پيغمبرلر يالاندان نبئلئک ادئرلر، کاهئنلر اؤز ائقتئدارلارينا داياناراق حؤکم سورورلر. خالقيم دا بونو بَيه‌نئر! آمّا آخيردا نه اده‌جکسئنئز؟" | .31 |
| ← Jeremiah 5/52 → |