| ← Jeremiah 24/52 → |
| بابئل پادشاهي نِبوکَدنِصّر يهودا پادشاهي يِهوياقئم اوغلو يِهوياکئني، يهودا باشچيلاريني، اوستالاري و صَنَتکارلاري اورشلئمدن اسئر ادئب بابئله آپاراندان سونرا، رب منه ائکي سبد انجئر گؤرستدي کي، اؤز معبدي قاباغيندا قويولموشدو. | .1 |
| بئر سبدده ائلک محصولا اوخشايان چوخ ياخشي انجئرلر، او بئري سبدده ده ياوا انجئرلر وار ائدي، او قدر ياوا کي، اونلاري يمک اولمازدي. | .2 |
| او واخت رب مندن سوروشدو: "نه گؤرورسن، اِرِميا؟" جاواب وردئم: "انجئر. ياخشي انجئرلر چوخ ياخشي‌ديرلار، آمّا پئس انجئرلر او قدر پئسدئرلر کي، اونلاري يمک اولماز." | .3 |
| او واخت ربّئن بو سؤزو منه نازئل اولدو: | .4 |
| "ائسرايئلئن تاريسي رب بله ديئر: «بورادان کَلداني اؤلکه‌سئنه اسئرلئيه گؤنده‌ردئيئم يهودا اسئرلرئني بو ياخشي انجئرلر کئمي ياخشي حساب ادئرم. | .5 |
| گؤزلرئم اونلارين اوستونده اولاجاق کي، ياخشي ياشاسينلار. و اونلاري گئنه بو اؤلکه‌يه قايتاراجاغام. اونلاري دئرچَلده‌جيم، ييخماياجاغام؛ اونلاري اَکه‌جيم، چيخارتماياجاغام. | .6 |
| اونلارا اِله اورَک وره‌جيم کي، منی تاني‌ييب منئم رب اولدوغومو بئلسئنلر. اونلار منئم خالقيم، من ده اونلارين تاريسي اولاجاغام، چونکي اونلار بوتون قلبلري ائله منه اوز توتاجاقلار.» | .7 |
| رب بله ديئر: «آمّا يهودا پادشاهي صئدقئياني، اونون باشچيلاريني، اورشلئمدن سالامات قالانلاري، ائستر بو اؤلکه‌ده قالسينلار، ائستر مئصئرده ياشاسينلار، ياوا و يِمه‌يي مومکون اولمايان انجئر کئمي اده‌جيم. | .8 |
| اونلاري يِر اوزونون بوتون اؤلکه‌لرئنئن گؤزونده پئس و دهشتلي بئر حالا سالاجاغام. اونلاري اسئر آتديغيم هر يرده، اونلار روسواي اولوب هامينين آغزيندا مَثَل اولاجاقلار، هامي اونلاري اَله ساليب اونلارا لعنت اده‌جک. | .9 |
| اونلارين اوستونه قيلينج، آجليق و وبا گؤنده‌ره‌جيم، اِله کي، اونلاري اونلارا و آتالارينا وردئيئم تورپاقدان بوسبوتون سئلئب محو اتسئن.»" | .10 |
| ← Jeremiah 24/52 → |