←  Jeremiah 2/52   →
ربّئن سؤزو منه نازئل اولوب ددي: .1
"گت، اورشلئمئن قولاقلارينا اعلان ات کي، رب بله ديئر: «من سنئن جاوانليغينداکي مِهرئني، گلئن اولانداکي محبّتئني، صحرادا، اوت بئتمه‌ين تورپاقدا داليمجا گلدئيئني خاطيرلاييرام. .2
او واخت ائسرايئل ربّه وقف اولموشدو و اونون محصولون نوباري ائدي. اوندان يئيَنلرئن هاميسي خاطاکار چيخديلار، اوستلرئنه بلا نازئل اولدو.»" رب بويورور. .3
ای يعقوب نسلي، ای ائسرايئل نسلئنئن بوتون طايفالاري، ربّئن سؤزونو اِشئدئن، .4
رب بله ديئر: "آتالارينيز منده نه حاقسيزليق تاپديلار کي، مندن اوزاقلاشديلار و پوچلوغون دالينجا گدئب اؤزلري ده پوچ اولدولار؟ .5
داها دِمه‌دئلر: «هارادادير او رب کی، مئصئر تورپاغيندان بئزي چيخارتدي، صحرادان، اوچوروملارلا دولو چؤل‌لردن، اؤلوم کؤلگه‌سئنده قالان قوراق تورپاقدان، بئر ائنسانين کِچمه‌دئيي، هچ کسئن ياشاماديغي دئياردان بئزی کِچئرتدي؟» .6
من سئزي برکتلي تورپاغا گتئردئم کي، اونون ميوه‌لرئندن و نعمتلرئندن يئيه‌سئنئز. آمّا سئز گلدئنئز و تورپاغيمي نجئس اتدئنئز، منئم ائرثئمي ائيرنج بئر يِره چِوئردئنئز. .7
کاهئنلر دِمه‌دئلر: «رب هارادادير؟» شرئعت موعلّئملري منی تانيماديلار، رهبرلر ده منئم ضئدّئمه عوصيان اتدئلر، پيغمبرلر بَعَلئن آدي ائله نبئلئک اتدئلر و فايداسيز شيلرئن دالينجا گتدئلر. .8
بونا گؤره من گئنه سئزئنله داعواچي اولاجاغام، من اؤولادلارينيزين اؤولادلاري ائله ده داعواچي اولاجاغام." رب بويورور .9
"سئز کئتّئم ساحئل‌لرئنه گدئب گؤرون، قِدارا آدام گؤنده‌رئب دئقّتله باخين. گؤرون بله بئر شي هچ اولوب؟ .10
آللاهلار اولماديقلاري حالدا، هچ اولوب بئر مئلّت آللاهلاريني دَيئشدئرسئن؟ لاکئن منئم خالقيم اؤز شؤوکتئني فايداسيز شيلره دَيئشئب. .11
ای گؤيلر، سئز بونا مات قالين، تئر-تئر اَسئن، وئران قالين." رب بويورور. .12
"چونکي منئم خالقيم ائکي پئس عمل ادئب: منی، آخار سولارين منبعئني، آتيب اؤزلرئنه حوووضلار، سو ساخلامايان چاتلاق حوووضلار دوزَلدئبلر. .13
مگر ائسرايئل قولدور؟ مگر او، قول دوغولوب؟ بس نه اوچون قارت مالي اولوب؟ .14
اونون اوستونه جاوان آصلانلار نَرئلده‌يئب، سَسلرئني اوجالديبلار. اؤلکه‌سئني وئران ادئبلر. شهرلري يانيب، اوندا ياشايان هچ کس قالماييب. .15
نوف و تَخپَنخِس ساکئنلري سنئن باشيني ياريبلار. .16
سني يوللا آپاران تارين ربّی ترک اتمکله، مگر بو ائشي سن اؤز باشينا گتئرمه‌يئبسن؟ .17
بس ائندي شئخور سويوندان ائچمک اوچون مئصئره نئيه گِدئرسن؟ فَرات سويوندان ائچمَک اوچون آشورا نئيه گِدئرسن؟ .18
سني اؤز پئسلئيئن جزالانديراجاق، دؤنوکلويون سني ائصلاح اده‌جک. اونا گؤره بئل و گؤر کي، تارين ربّی آتماغين، مندن قورخماماغين پئس و آجي شيدئر." قوشونلار ربّی پروردئگار بويورور. .19
"سنئن يوغونو چوخ زامان قاباق قيرديم، ائپلرئني قوپارتديم. آمّا سن ددئن: «سنه قوللوق اتميه‌جيم!» اوسته‌لئک هر اوجا تپه‌نئن اوستونده، بول يارپاقلي هر آغاجين آلتيندا فاحئشه کئمي يِره ياتيبسان. .20
من سني ياخشي مِينه، تَر-تمئز توخوم کئمي اَکمئشدئم. نجه اولدو کي، عَلِيهئمه چيخيب قرئب مِينه‌‌يه دؤندون؟ .21
گرچي سن اؤزونو گئل‌آبي ائله يويورسان، بول کول سويو ائشله‌دئرسن، لاکئن گوناهينين لکه‌سي حله ده حوضورومدا قالير." پروردئگار رب بويورور. .22
"نجه دئيه بئلرسن کي، «نجئس ديئلم، بَعَل بوتلرئنئن يولو ائله گتمه‌مئشم؟» دره‌ده نجه رفتار اتدئيئنه باخ، نه اتدئيئني گؤر! سن قيزيشان، اورا-بورا قاچان دئشي دَوه کئمي‌سن، .23
شهوتله هاواني ائيله‌ين، صحرايا اؤيرَشمئش وحشي اِششَک کئمي‌سن. قيزاندا اونو کئم ساخلايا بئلر؟ اونو ائسته‌ينلر اؤزلرئني يورمازلار، جوتلَشمه واختي اونو تاپارلار. .24
آياغي يالين گَزمه، بوغازين سوسوزلوقدان قوروماسين. آمّا سن ددئن: ‹خِير، فايداسي يوخدور! چونکي من ياد آللاهلاري سِومئشَم و اونلارين دالينجا گده‌جيم.› .25
اوغري توتولاندا نجه اوتانير، ائسرايئل نسلی ده پادشاهلاري، باشچيلاري، کاهئنلري و پيغمبرلري ائله بئرلئکده اِلَجه اوتانيرلار. .26
اونلار آغاجا «آتامسان»، داشا دا «منی سن دوغدون» ديئرلر. چونکي منه طرف اوزلرئني يوخ، آرخالاريني چِوئرئبلر. لاکئن اوستلرئنه بلا گلنده دئيه‌جکلر: «قالخ و بئزي قورتار.» .27
لاکئن اؤزون اوچون دوزلتدئيئن بوتلرئن هارادادير؟ باشينا بلا گلدئيي واخت، اگر سني قورتارا بئلرلر، قوي اونلار گلسئنلر. چونکي سنئن آللاهلارين، شهرلرئنئن سايي قدردئر، ای يهودا! .28
نه اوچون منئمله داعواچي‌سينيز؟ سئز هامينيز منئم ضئدّئمه عوصيان ادئبسئنئز." رب بله بويورور. .29
"اؤولادلارينيزي بوشونا جزالانديرميشام؛ چونکي اونلار يولا گلمه‌دئلر. اؤز قيلينجينيز پيغمبرلرئنئزي ييرتيجي آصلان کئمي تلف ادئب." .30
ای بو زامانين اؤولادلاري، ربّئن سؤزونه دئقّت ادئن: "مگر من ائسرايئل اوچون بئر صحرا اولموشام؟ و يا بئر ظولمت اؤلکه‌سي اولموشام؟ خالقيم نه اوچون ديئر کي، «بئز اؤز-اؤزوموزه آغاييق، بئر داها سنه طرف گلميه‌جيئک؟ .31
مگر قيز اؤز بَزَکلرئني، گلئن ده اؤز گلئنلئک قورشاغيني ياددان چيخاردا بئلر؟ آمّا منئم خالقيم اوزون مودّت منی ياددان چيخارديب. .32
اويناشلارينين دالينا دوشمکده نه قدر ماهئرسن! لاپ پئس آروادلار بِله، سندن درس آلا بئلر. .33
سنئن اَتَکلرئن قيريلان مؤحتاج و معصوم آداملارين قانينا بولاشيب؛ حال بو کي اونلاري اوغورلوق اوستونده توتمادين. حله بونونلا بِله، .34
سن ديئبسن: «من تقصئرسئزم، ربّئن قضبي قطعن مندن يان کچه‌جک›. باخ، من سني موحاکئمه اده‌جيم، چونکي گوناه اتمه‌دئيئني ديئرسن. .35
نه اوچون تِز-تِز دولانيب يولونو دَيئشئرسن؟ آشوردا خجئل اولدوغون کئمي مئصئرده ده خجئل اولاجاقسان. .36
اورادان دا اَل‌لرئنله باشيني توتوب چيخاجاقسان، چونکي بِل باغلاديقلاريني رب ردّ ادئب، اونلارلا اوغور قازانا بئلميه‌جکسن." .37
←  Jeremiah 2/52   →