← Genesis 8/50 → |
و تاري نوحو و اونونلا بئر گمئده اولان بوتون وحشي حيوانلار و مال-حيوانلاري يادا سالدي. تاري يِر اوزونه بئر يِل گؤندردي و سو آزالماغا باشلادي. | .1 |
درئنلئکده اولان سو قايناقلاري و گؤيون پنجرهلري باغلاندي، ياغيش داياندي. | .2 |
سو، ير اوزوندن ياواش-ياواش چکئلدي. يوز اَلّي گون کچدئکدن سونرا سو آزالدي. | .3 |
يدّئنجی آيين اون يدّئنجی گونو گمي آرارات داغلارينا اوتوردو. | .4 |
اونونجو آيا قدر سو ياواش-ياواش چکئلدي، اونونجو آيين بئرئنجي گونو داغلارين باشلاري گؤروندو. | .5 |
قيرخ گون سونرا نوح دوزلتدئيي گمئنئن پنجرهسئني آچيب، | .6 |
بئر قارغا بوراخدي؛ قارغا اوچوب گتدي و يِر اوزونده سو قورويانا قدر هر طرفي گَزدي. | .7 |
نوح بو دفه بئر گؤيرچئن بوراخدي کي، سويون ير اوزوندن چکئلئب-چکئلمهدئيئني بئلسئن. | .8 |
آمّا گؤيرچئن قونماق اوچون راحات بئر يِر تاپماديغينا گؤره، اونون يانينا-گمئيه قاييتدي، چونکي حله بوتون يِر اوزونده سو وار ائدي. نوح اَلئني اوزاديب، گؤيرچئني توتدو و گمئيه-اؤز يانينا آپاردي. | .9 |
او داها يدّي گون گؤزلهدي و گؤيرچئني گئنه گمئدن بوراخدي. | .10 |
آخشام اوستو گؤيرچئن اونون يانينا قاييتدي. گؤيرچئنئن دئمدئيئنده تزه قوپموش زيتون يارپاغي وار ائدي. نوح سويون ير اوزوندن چکئلدئيئني بئلدي. | .11 |
او داها يدّي گون گؤزلهدي و گؤيرچئني گئنه بوراخدي، آرتيق گؤيرچئن اونون يانينا قاييتمادي. | .12 |
نوحون عؤمرونون آلتي يوز بئرئنجي ائلئنده، بئرئنجي آيين بئرئنجي گونو يِر اوزونده سو قورودو. نوح گمئنئن قاپاغيني قالديردي و يِرئن اوستوندهکي سويون قورودوغونو گؤردو. | .13 |
ائکئنجي آيين ائيئرمي يدّئنجی گونو يِر اوزوندهکي سو قوروموشدو. | .14 |
تاري نوحا ددي: | .15 |
"سن، اؤز آروادين، اوغوللارين و گلئنلرئن ائله بئرلئکده گمئدن چيخ. | .16 |
سنئله بئرلئکده اولان بوتون جانليلاري؛ قوشلاري، حيوانلاري و يرده سوروننلري اِشئيه چيخارت. قوي يِر اوزونه ياييلسينلار و يِر اوزونده تؤرهيئب چوخالسينلار." | .17 |
نوح، اوغوللاري، آروادي، و گلئنلري ائله بئرلئکده گمئدن چيخدي. | .18 |
بوتون حيوانلار، سوروننلر، قوشلار و يرده سورونن بوتون جانليلار دسته- دسته گمئني ترک اتدئلر. | .19 |
نوح ربّه بئر قوربانگاه دوزلتدي. او هر جور پاک حيواندان و پاک قوشدان گؤتوروب، اورادا يانديرما قورباني تقدئم اتدي. | .20 |
بوندان ربّه خوش عطئر قالخدي و رب اورهيئنده ددي: "ائنسان اوزوندن تورپاغي بئر داها لعنت اتميهجيم، گرچي جاوانليغيندان بري اونون اورهيئنئن نئيّتلري همئشه پئسدئر، ائندي اتدئيئم کئمي، بوتون جانليلاري بئر داها محو اتميهجيم. | .21 |
دونيا دوردوقجا اَکئن-بئچئن، سويوق-ائستي، ياي-قيش و گجه-گوندوز آرادان گتميهجک." | .22 |
← Genesis 8/50 → |