← Genesis 7/50 → |
رب نوحا ددي: "سن بوتون عايئلَن ائله بئرلئکده گمئيه گئر، چونکي بو بشر نسلی ائچئنده آنجاق سني نظرئمده صالح گؤردوم. | .1 |
هر پاک حيوانين اِرکَک و دئشئسئندن يدّي جوت، هر نجئس حيوانين اِرکَک و دئشئسئندن بئر جوت گؤتور. | .2 |
هم ده گؤيدهکي هر قوشون اِرکَک و دئشئسئندن يدّي جوت گؤتور کي، نسلي بوتون ير اوزوندن کَسئلمهسئن. | .3 |
چونکي يدّي گون سونرا يِر اوزونه قيرخ گون-قيرخ گجه ياغيش ياغديراجاغام و ياراتديغيم بوتون جانليلاري ير اوزوندن محو ادهجيم." | .4 |
رب نوحا نجه امراتمئشدي، او دا هر شيي اِلَجه يرئنه يتئردي. | .5 |
يِر اوزونه سل گلنده نوحون آلتي يوز ياشي وار ائدي. | .6 |
نوح، اوغوللاري، آروادي، و گلئنلري بئرلئکده گمئيه مئندئلر کي، سل سولاريندان آمانليقدا قالسينلار. | .7 |
پاک و نجئس حيوانلارين، قوشلارين، بوتون يرده سوروننلرئن | .8 |
اِرکَک و دئشئسي، جوت- جوت نوحون يانينا گمئيه گلدئلر؛ نجه کي، تاري نوحا امراتمئشدي. | .9 |
يدّي گون سونرا يِر اوزونه سل گلدي. | .10 |
همئن گون- نوحون عؤمرونون آلتي يوزونجو ائلئنده، ائکئنجي آيين اون يدّئنجي گونو درئن درئنلئکده اولان بوتون سو قايناقلاري پارتلادي و گؤيون پنجرهلري آچيلدي. | .11 |
يِر اوزونه قيرخ گون- قيرخ گجه ياغيش ياغدي. | .12 |
اِله همئن گون نوح، اوغوللاري سام، خام، يافِت، آروادي، و اوچ گلئني گمئيه مئندئلر. | .13 |
اونلارلا بئر هر جور وحشي حيوان، هر جور مال-حيوان، هر جور يرده سورونن، هر جور گؤيده اوچان جانلي و هر جور قوش، اؤز جئنسلرئنه گؤره گمئيه گئردي: | .14 |
حيات نَفَسي اولان بوتون جانليلاردان جوت-جوت، نوحون يانينا گمئيه گلدي. | .15 |
تارينين نوحا امر اتدئيي کئمي بوتون جانليلاردان اِرکَک و دئشي حيوانلار گمئيه گئردئلر. اونلارين دالينجا رب قاپيني اؤرتدو. | .16 |
يِر اوزونده قيرخ گون سل گلدي و سو چوخاليب گمئني يردن يوخاري قالديردي. | .17 |
سولار چوخ يوخاري قالخيب يِر اوزونو آلديلار و گمي سويون اوزونده اوزمَيه باشلادي. | .18 |
سولار يِر اوزونو اِله توتدولار کي، گؤيون آلتيندا اولان بوتون اوجا داغلار سولارين آلتينا گتدي. | .19 |
سولار داغلارين باشيندان اون بش قول-آچ قالخديلار و اونلاري اؤرتدولر. | .20 |
يِر اوزونده حرکت ادن جانليلارين هاميسي؛ قوشلار، مال-حيوانلار، وحشي حيوانلار، يرده سوروننلر و بوتون ائنسانلار محو اولدو. | .21 |
قورودا ياشايان حيات نَفَسي بورنوندا اولان جانلي وارليقلارين هاميسي اؤلدو. | .22 |
رب يِر اوزونده اولان بوتون جانليلاري محو اتدي: ائنسالاردان توتموش، حيوانلارا، سوروننلره و گؤيدهکي قوشلارا قدر، هر شي يِر اوزونده محو اولدو. آنجاق نوح و اونونلا بئر، گمئده اولانلار صاغ قالديلار. | .23 |
سولار يِر اوزونو يوز اَلّي گون بورودولر. | .24 |
← Genesis 7/50 → |