←  Genesis 50/50

---

يوسئف اؤزونو آتاسينين اوستونه آتدي و آغلاياراق اونو اؤپدو.

.1

سونرا حکئم خئدمتچئلرئنه امر اتدي کي، آتاسينين جسدئني مومئيالاسينلار. حکئملر ائسرايئلي مومئيالاديلار.

.2

بو ائش قيرخ گونه گؤرولدو، چونکي مومئيالاماق اوچون اله بئر مودّت لازيم ائدي. مئصئرلئلر يتمئش گون ائسرايئل اوچون ياس توتدولار.

.3

ياس گونلري قورتاراندان سونرا، يوسئف، فئرعونون ساراي آداملارينا دانيشيب ددي: "اگر گؤزونوزده لوطف تاپميشام، خاهئش ادئرم فئرعونا ديئن کي،

.4

آتام منی آند ائچدئرئب دمئشدي: «باخ، من اؤلورَم. کَنَعان تورپاغيندا اؤزوم اوچون قبئر قازميشام، منی اورادا باسدير.» ائندي قوي او منه ائجازه ورسئن کي، گدئب آتامي باسديريم و قاييديم."

.5

فئرعون ددي: "گت، آتانين سنه آند ائچدئردئيي کئمي اونو باسدير."

.6

بِلَجه، يوسئف آتاسيني باسديرماغا گتدي. فئرعونون بوتون اعيانلاري، سارايين و مئصئرئن بوتون آغساقّاللاري،

.7

يوسئفئن بوتون اِو آداملاري، قارداشلاري و آتاسينين اِو آداملاري اونونلا گتدئلر. گوشِن وئلايتئنده آنجاق اوشاقلاريني، قويون-کِچئلرئني و مال-حيوانلاريني قويدولار.

.8

اونلارلا بئرلئکده عارابالار و آتليلار دا يولا چيخميشدي، اونا گؤره ده دسته چوخ بؤيوک ائدي.

.9

اونلار اوردون چايينين او بئري طرفئنده، آتاد خرمنئنه چاتاندا چوخ آجي و بؤيوک ماتمله ياس توتدولار. يوسئف آتاسي اوچون يدّي گون ياس توتدو.

.10

او اؤلکه‌نئن اهالئسي اولان کَنَعانليلار، آتاد خرمنئنده‌کي ياسي گؤرنده ددئلر: "گؤر مئصئرلئلر نجه بؤيوک ماتم ائچئنده‌دئرلر." اونا گؤره ده اوردون چايينين او بئري طرفئنده‌کي بو يِره آبِل‌مئصرايئم آدي ورئلدي.

.11

يعقوبون اوغوللاري آتاسينين وصئيّتئني امر اتدئيي کئمي يرئنه يتئردئلر.

.12

اونو کَنَعان اؤلکه‌سئنه گتئرئب، مَمرِه‌نئن ياخينليغينداکي ماکپِلا زمئسئنده اولان ماغارادا باسديرديلار. ائبراهئم بئر واخت بو ماغاراني قَبئر دوزلتمک اوچون زمي ائله بئرلئکده خئتلي عِفروندان ساتين آلميشدي.

.13

يوسئف آتاسيني دفن اتدئکدن سونرا هم اؤزو، هم قارداشلاري، هم ده اونونلا بئرلئکده آتاسينين دفنئنه گلنلرئن هاميسي مئصئره قاييتديلار.

.14

آتالاري اؤلَندن سونرا يوسئفئن قارداشلاري اؤز آرالاريندا ددئلر: "بلکه يوسئف بئزئم ضئدّئمئزه کئن ساخلايير. اگر اونا اتدئيئمئز پئسلئيه گؤره بئزدن قئصاص آلسا، نه اده‌رئک؟"

.15

بونا گؤره ده يوسئفه خبر گؤندردئلر: "آتان اؤلوموندن قاباق بئزه وصئيّت اتدي کي،

.16

يوسئفه بله ديئن: «باخ سندن خاهئشئم بودور کي، قارداشلارينين گوناهيني و تقصئرئني باغيشلاياسان. آخي اونلار سنه پئسلئک ادئبلر. خاهئش ادئرئک، سن آتانين تاريسينين قوللاري اولان بئز قارداشلارينين گوناهيني باغيشلا.»" بو سؤزلر يوسئفه چاتاندا او آغلادي.

.17

سونرا قارداشلاري اؤزلري يوسئفئن يانينا گدئب، قاباغيندا يره قاپانديلار و ددئلر: "باخ، بئز سنئن قوللارينيق."

.18

يوسئف اونلارا ددي: "مگر من تارييام کي، مندن قورخورسونوز؟

.19

باخين، سئز منئم حاقّيمدا پئس فئکره دوشدونوز، لاکئن تاري اونو ياخشي ائشه چِوئردي کي، بو گون گؤردويونوزو اتسئن و چوخلو آدامين حياتيني قوروسون.

.20

داها قورخمايين، من هم سئزي، هم ده اؤولادلارينيزي ساخلاياجاغام." يوسئف اونلارا مهرئبان سؤزلرله تسلّی وردی.

.21

يوسئفئن و آتاسينين نسلی مئصئرده ساکئن اولدو. يوسئف يوز اون ائل عؤمور سوردو.

.22

او، اِفرايئمئن اوچونجو نسئل اؤولادلاريني گؤردو. مِنَسّه‌نئن اوغلو ماکئرئن اؤولادلاري دا يوسئفئن اَلئنده دوغولدو.

.23

بئر گون يوسئف قارداشلارينا ددي: "من اؤلورَم، آمّا تاري آرخايين سئزه نظر سالاجاق. او سئزي بو اؤلکه‌دن ائبراهئمه، ائسحاقا و يعقوبا ورمک اوچون آند ائچدئيي تورپاغا آپاراجاق."

.24

سونرا يوسئف ائسرايئلئن اؤولادلارينا آند ائچدئرئب ددي: "تاري آرخايين سئزه نظر سالاجاق. گدن زامان منئم سوموکلرئمي ده بورادان چيخاردارسينيز."

.25

يوسئف يوز اون ياشيندا اؤلدو. اونو مئصئرده مومئيالاييب بئر تابوتا قويدولار.

.26

---

←  Genesis 50/50