←  Ezekiel 34/48   →
منه ربّئن بو سؤزو نازئل اولدو: .1
"ای بشر اوغلو، نبئلئک ات، ائسرايئلئن چوبانلارينين ضئدّئنه نبئلئک ادئب اونلارا دِه کي، پروردئگار رب بله ديئر: «ائسرايئل چوبانلارينين واي حالينا کي، آنجاق اؤزلرئني يِدئردئرلر! مگر چوبانلار گرک سورونو يِدئرتمه‌سئنلر؟ .2
سئز ياغي يِيئرسئنئز، يوندان پالتار گِيئنئرسئنئز، بَسلَنمئش قويون-کِچئني کَسئرسئنئز، سورونو يِدئرتمه‌يئرسئنئز. .3
ضعئفلره قووّت ورمه‌يئبسئنئز، ناخوش اولاني صاغالتماييبسينيز، سيناني باغلاماييبسينيز، آزاني گری قايتارماييبسينيز، ائته‌ني آختارماييبسينيز؛ آنجاق زور و قدّارليقلا اونلارا آغاليق ادئبسئنئز. .4
اونلار دا چوبان اولماديغي اوچون داغيليشديلار و وحشي حيوانلارا يِم اولدولار، هر بئري بئر يِره قاچدي. .5
منئم سوروم بوتون داغلاردا و اوجا تپه‌لرده سرگردان اولدو. منئم سوروم بوتون يِر اوزونه داغيليشدي. بئر سوروشان، بئر آختاران دا يوخ ائدي.» .6
بونا گؤره ده، ای چوبانلار، ربّئن سؤزونه قولاق آسين. .7
پروردئگار رب بويورور: «وارليغيما آند اولسون، ائندي کي، چوبان اولماديغي اوچون سوروم قارت ادئلئب، بوتون وحشي حيوانلارا يِم اولوب، چوبانلاريم دا سورومو آختارماييب اونلاري يِدئرتمه‌يئبلر، لاکئن اؤز-اؤزلرئني يِدئردئبلر– .8
بوتون بونلارا گؤره، ای چوبانلار، ربّئن سؤزونه قولاق آسين. .9
پروردئگار رب بله ديئر: ‹من بو چوبانلارين ضئدّئنه‌يَم. سوروم اوچون اونلاردان حساب ورمه‌لرئني طلب اده‌جيم. سورونو اوتارماق ائشئني بئر داها اونلارا ورميه‌جيم. بلجه چوبانلار آرتيق اؤزلرئني کؤکَلتميه‌جکلر. سورومو اونلارين دئشلرئندن قورتاراجاغام کي، بئر داها اونلارا يِم اولماسينلار.›» .10
چونکي پروردئگار رب بله ديئر: «باخين، من اؤزوم سورومون دالينجا گدئب اونلاري آختاراجاغام. .11
داغيليشميش قويونلارينين آراسيندا اولان بئر چوبان نجه سوروسونون قيدئنه قالار، من ده سورومون قيدئنه اِله قالاجاغام. بولودلو و قارانليق بئر گونده اطرافا سَپه‌لَندئکلري هر يردن اونلاري قورتاراجاغام. .12
اونلاري خالقلارين آراسيندان چيخارداجاغام، اؤلکه‌لردن ييغيب اؤز تورپاقلارينا گتئره‌جيم؛ ائسرايئل داغلاريندا، دره‌لرده، اؤلکه‌نئن بوتون مسکوني يِرلرئنده اونلاري يِدئرده‌جيم. .13
اونلاري گؤزل بئر اوتلاقدا يِدئرده‌جيم. يايلاقلاري ائسرايئلئن اوجا داغلاري اوستونده اولاجاق. اورادا گؤزل بئر يايلاقدا ياتاجاقلار. ائسرايئل داغلاري اوستونده اولان بَهَرلي اوتلاقدا اوتلاياجاقلار. .14
سورومو من اؤزوم اوتورداجاغام، اونلاري من اؤزوم ياتيرداجاغام.» پروردئگار رب بويورور. .15
«ائتمئشي آختاراجاغام، آزاني گری قايتاراجاغام، يارالي اولاني باغلاياجاغام، ناخوش اولانا قووّت وره‌جيم، آمّا بَسلَنمئش و گوجلو اولاني هلاک اده‌جيم. من قويونلاريمي عدالتله اوتاراجاغام.» .16
سئزه گلئنجه، ای منئم سوروم، پروردئگار رب بله ديئر: .باخ، قويونلا قويون آراسيندا، قوچلارلا کِچئلر آراسيندا من حؤکم اده‌جيم. .17
گؤزل اوتلاقدا اوتلاماغينيز سئزه آز ائدي کي، اوتلاقلارينيزين قالانيني دا آياقلارينيز آلتيندا تاپدالاييرسينيز؟ دورو سو ائچمه‌يئنئز سئزه آز ائدي کي، آرتيغيني دا آياقلارينيزلا بولانديريرسينيز؟ .18
منئم سورومه گلئنجه، سئزئن آياقلارينيزلا تاپدالاديقلارينيزي اونلار گرک يِسئنلر، آياقلارينيزلا بولانديرديقلارينيزي اونلار گرک ائچسئنلر!» .19
بونا گؤره ده پروردئگار رب اونلارا بله ديئر: «باخين، من، بلی، من بَسلَنمئش قويونلا آريخ قويونون آراسيندا حؤکم اده‌جيم. .20
سئز بوتون آريخ قويونلاري بؤيرونوزله، چئينئنئزله ائته‌له‌يئرسئنئز، اونلاري کنارا چيخارتماق اوچون بوينوزلارينيزلا وورورسونوز. .21
بونا گؤره ده من سورومو خئلاص اده‌جيم. اونلار داها قارت مالي اولماياجاقلار و قويونلا قويون آراسيندا من حؤکم اده‌جيم. .22
او واخت باشلارينا تک بئر چوبان، قولوم داوودو قوياجاغام و او، اونلاري اوتاراجاق و اونلارين چوبانلاري اولاجاق. .23
من رب اونلارين تاريسي اولاجاغام، قولوم داوود دا اونلارين ائچئنده رهبر اولاجاقدير.» من رب بونو ددئم. .24
«اونلارلا بئر صولح عهدي باغلاياجاغام، اؤلکه‌دن ضررلي حيوانلاري قوواجاغام کي، اونلار چؤلده آسايئش ائچئنده ياشاييب مِشه‌لرده ياتسينلار. .25
اونلارين اؤزلرئنه ده، تپه‌مئن اطرافينداکي يِرلره ده برکت وره‌جيم. ياغيشي واختيندا ياغديراجاغام؛ برکتلي ياغيشلار اولاجاق. .26
چؤلده‌کي آغاجلار ميوه يتئره‌جکلر، تورپاق محصول وره‌جک. خالق اؤز اؤلکه‌سئنده آسايئش ائچئنده ياشاياجاق. يوغ ائپلرئني قيريب اونلاري قول ادنلرئن اَلئندن قورتارديغيم زامان بئله‌جکلر کي، رب منم. .27
آرتيق مئلّتلرئن قارت مالي اولماياجاقلار، وحشي حيوانلارين يِمي اولماياجاقلار. آسايئش ائچئنده ياشاياجاقلار، اونلاري قورخودان دا اولماياجاق. .28
اونلار اوچون شؤهرتلي بئر باغئستان يِتئشدئره‌جيم. داها اؤلکه‌ده آجليقدان تلف اولماياجاقلار، مئلّتلرئن تحقئرلرئنه ده دؤزميه‌جکلر. .29
او واخت بئله‌جکلر کي، من، اونلارين تاريسي رب، اونلارلايام و اونلار، ائسرايئل نسلي، ده منئم خالقيمدير.» پروردئگار رب بويورور. .30
«سئزه گلئنجه، منئم قويونلاريم، اوتلاغيمين قويونلاري، سئز ائنسانلارسينيز، من ده سئزئن تارينيزام.» پروردئگار رب بله بويورور." .31
←  Ezekiel 34/48   →