←  Ezekiel 16/48   →
منه ربّئن بو سؤزو نازئل اولدو: .1
"ای بشر اوغلو، اورشَلئمه اونون نجئس عمل‌لرئني بئلدئرئب دِه کي، .2
پروردئگار رب اورشَلئمه بله ديئر: «اصلئن و دوغومون کَنَعان تورپاغيندان‌دير: آتان بئر اِمورلو ائدي، آنان دا بئر خئتلي. .3
دوغولدوغون گون، گؤبَک باغين کَسئلمه‌دي، سني سو ائله يويوب تمئزلَمه‌دئلر، دوزلا اووولمادين و قونداغا بَلَنمه‌دئن. .4
هچ کس سنه شَفقَتله باخمادي، رحم اتمه‌دي کي، بونلارين بئرئني سنه اتسئن. دوغولدوغون گون سندن ائيرَندئکلري اوچون چؤله آتيلدين. .5
من سنئن يانيندان کِچَرکَن اؤز قانين ائچئنده قيميلدانديغيني گؤردوم و اؤز قانيندا ائکَن سنه ‹ياشا!› ددئم. بلی، اؤز قانيندا ائکَن سنه ‹ياشا!› ددئم. .6
سني چؤل بئتکئلري کئمي چوخالتديم. سن بوي آتيب بؤيودون و حدّي-بولوغا چاتدين. دؤشلرئن بؤيودو، ساچلارين اوزاندي. آمّا حله ده لوت و چيلپاق ائدئن. .7
من سنئن يانيندان کِچَنده سني گؤردوم. بو واخت سنئن محبّت چاغين ائدي. من سنئن اوستونه اَته‌يئمي آتيب لوتلويونو اؤرتدوم. آند ائچئب سنئنله عهد باغلاديم.» پروردئگار رب بويورور، «سن ده منئم اولدون. .8
من سني سو ائله يودوم، قانيني اوستوندن تمئزله‌دئم، سني ياغلا مسح اتدئم. .9
سنه اَلوان ناخيشلي پالتار گِيئندئردئم، آياغينا سو ائتي دَرئسئندن چاريق گِيدئردئم، بِلئنه نازئک کتان قورشاق باغلاديم و سني ائپَکلرله اؤرتدوم. .10
سني بَزَکلرله بَزه‌دئم، قوللارينا دستبند، بوينونا زنجئر تاخديم. .11
بورنونا حالقا، قولاقلارينا گوشوارا کچئرتدئم و باشينا گؤزل بئر تاج قويدوم. .12
بلجه سن قيزيل گوموشله بَزَندئن، نازئک کتاندان، ائپَکدن و اَلوان ناخيشلي قوماشدان پالتار گِيئندئن. نارين اون، بال و زيتون ياغي يِدئن. حدّئندن آرتيق گؤزل اولدون و پادشاهليق حئشمتئنه اوجالدين. .13
گؤزل‌لئيئنه گؤره مئلّتلر آراسيندا شؤهرتلَندئن. منئم سنه وردئيئم عظمتدن اؤتري گؤزل‌لئيئن کامئل ائدي،» پروردئگار رب بويورور. .14
«لاکئن سن گؤزل‌لئيئنه بِل باغلادين، شؤهرتلَندئيئنه گؤره فاحئشه‌لئک اتدئن، هر يولدان کِچَنه اؤزونو تسلئم اتدئن و گؤزل‌لئيئنه او مالئک اولدو. .15
اؤز پالتارلاريندان گؤتوروب اؤزونه رنگ‌به‌رنگ پرستئشگاهلار دوزه‌لتدئن و اونلارين اوستونده فاحئشه‌لئک اتدئن. بِله‌سي نه اولموشدو، نه ده اولاجاق. .16
منئم سنه وردئيئم قيزيل-گوموشومدن حاضيرلانان زئنتلرئني گؤتوروب، اؤزونه کئشي صورتلري دوزه‌لتدئن و اونلارلا فاحئشه‌لئک اتدئن. .17
اَلوان ناخيشلي پالتاريني گؤتوروب اونلارين اوستونه اؤرتدون، زيتون ياغيمي و بوخورومو اونلارين قاباغينا قويدون. .18
سنه وردئيئم چؤره‌يئمي، سنه يِدئرتدئيئم نارين اونو، زيتون ياغيني و بالي دا عطئرلي بوخور اولاراق اونلارين قاباغينا قويدون. بو ائش باش وردي.» پروردئگار رب بويورور. .19
«منئم اوچون دوغدوغون اوغوللار و قيزلاريني گؤتوروب بوتلرئن يِمه‌يي اوچون اونلارا قوربان اتدئن. مگر فاحئشه‌لئيئن آز ائدي کي، .20
اؤولادلاريمي دا کَسئب اونلاري اوددا بوتلره تقدئم اتدئن؟ .21
بوتون ائيرنج ائشلرئني و فاحئشه‌لئيئني اِدَرکَن، اؤز جاوانليق گونلرئني خاطيرلامادين؛ او گونلري کي، لوت و چيلپاق ائدئن و اؤز قانين ائچئنده قيميلدانيردين.» .22
پروردئگار رب بويورور: «واي، واي سنئن حالينا! سن بوتون پئس عمل‌لرئندن سونرا .23
اؤزونه معبدلر قوردون و هر ميداندا پرستئشگاهلار دوزه‌لتدئن. .24
هر يولون باشيندا اؤز پرستئشگاهلاريني دوزه‌لتدئن. اؤز گؤزل‌لئيئني نجئس اتدئن، هر يولدان کِچَنه آياقلاريني آرالادين و فاحئشه‌لئيئني آرتيردين. .25
مئصئرلی‌لرله ده کي، سنئن شهوتران قونشولارين ائدئلر، فاحئشه‌لئک اتدئن، منی قضبلَندئرمَک اوچون فاحئشه‌لئيئني آرتيردين. .26
بونا گؤره ده اَلئمي سنئن ضئدّئنه اوزاديب سنه تعيئن اولونان پايي آزالتديم. سني سنئن دوشمنلرئنئن طاماحينا، يعني فئلئسطلی‌لرئن قيزلارينا کي، سنئن عئفّتسئز عمل‌لرئندن اوتانيرديلار، تسلئم اتدئم. .27
آشورلولارلا دا فاحئشه‌لئک اتدئن، چونکي دويموردون؛ بلی، اونلارلا فاحئشه‌لئک اتدئن، آمّا حله ده دويماميشدين. .28
اؤز فاحئشه‌لئيئني تئجارت اؤلکه‌سي اولان کَلده تورپاغينا قدر يايدين، لاکئن بو دا سنه کئفايت اتمه‌دي.» .29
پروردئگار رب بويورور: «بوتون بونلاري اِدَرکَن، يعني حياسيز فاحئشه‌نئن عمل‌لرئني، گؤر سنئن اوره‌يئن نه قدر ناخوشدور! .30
هر يولون باشيندا معبدلر قوردون، بوتون ميدانلاردا پرستئشگاهلار دوزه‌لتدئن. آمّا حله ده فاحئشه کئمي ده اولمادين، چونکي ائشئنئن عوضئنده ورئلَن اوجرته خور باخدين. .31
زئنا ادن بئر آرواد اولدون، اَرئنئن عوضئنه يادلاري قبول ادن بئر آرواد اولدون. .32
کئشئلر بوتون فاحئشه‌لره هدئيّه‌لر ورئرلر، آمّا بوتون اويناشلارينا سن هدئيّه‌لر وردئن. اونلارا روشوت وردئن کي، هر طرفدن سنئن يانينا گلسئنلر و سنئنله فاحئشه‌لئک اتسئنلر. .33
بلجه فاحئشه‌لئک اتمکده باشقا آروادلاردان فرقئن وار ائدي. چونکي هچ کس سنئن دالينجا دوشمه‌دي کي، فاحئشه‌لئک اده‌سن، عکسئنه، بونون اوچون سن هدئيّه وردئن، سنه هدئيّه ورئلمه‌دي. بو جهتدن سنئن فرقئن وار ائدي.» .34
بونا گؤره ده، ای فاحئشه، ربّئن سؤزونه قولاق آس. .35
پروردئگار رب بله ديئر: «حياسيزليغين اورتايا تؤکولدويو اوچون، اويناشلارينلا فاحئشه‌لئک اِدَرکَن لوتلويون آچيلديغي اوچون، بوتون ائيرنج بوتلرئندن و اونلارا قوربان وردئيئن اوغوللارينين قانيندان اؤتري- .36
بوتون بونلارا گؤره کِف اتدئيئن بوتون اويناشلاريني-سنئن سِودئکلرئني ده، نئفرت اتدئکلرئني ده بئر يِره ييغاجاغام. اونلاري هر طرفدن سنئن ضئدّئنه بئر يِره ييغاجاغام. اونلارين قاباغيندا سني چيلپاق اده‌جيم کي، عاييبيني کامئل بئر شکئلده گؤرسونلر. .37
زئنا ادن و قان تؤکَن آروادلارا ورئلَن جزا ائله سني جزالانديراجاغام، قضب و قيرتئمده سني قانا بولاياجاغام. .38
سني اويناشلارينين اَلئنه وره‌جيم. معبدلرئني داغيداجاقلار، پرستئشگاهلاريني اوچورداجاقلار، پالتارلاريني اَينئندن سويوندوراجاقلار، زئنتلرئني اَلئندن آلاجاقلار، سني لوت و چيلپاق قوياجاقلار. .39
جاماعاتي اوستونه قالديراجاقلار، سني داشا باساجاقلار و قيلينجلاري ائله تئکه-تئکه دوغراياجاقلار. .40
اِولرئنه اود ووراجاقلار، چوخلو آروادين گؤزو قاباغيندا سني جزالانديراجاقلار. فاحئشه‌لئيئنه آخير قوياجاغام و داها اويناشلارينا اوجرت ورميه‌جکسن. .41
بلجه سنئنله قضبئمي ياتيرداجاغام، قيرتئمي سؤندوره‌جيم. من ساکئت قالاجاغام و بئر داها قضبلَنميه‌جيم. .42
ائندي کي سن جاوانليق گونلرئني يادينا سالماييبسان، آمّا بوتون بو عمل‌لرئنله منی قضبه گتئرئبسن، من ده عمل‌لرئنئن عوضئني باشينا گتئره‌جيم.» پروردئگار رب بويورور. «مگر بوتون ائيرنج ائشلرئنه عئفّتسئزلئک ده علاوه اتمه‌‌يئبسن؟ .43
باخ، مثل دئيَن هر کس سنئن حاقّيندا بو مثَلي دئيه‌جک: ‹آناسي نجه‌دئر، قيزي دا اِله‌دئر.› .44
سن او آروادين قيزي‌سان کي، اَرئندن و اؤولادلاريندان نئفرت ادئر؛ سن او باجيلارينين باجيسي‌سان کي، اَرلرئندن و اؤولادلاريندان ائکراه ادئر. آنانيز خئتلي، آتانيز دا اِمورلو ائدي. .45
بؤيوک باجين سامئره‌دئر کي، قيزلاري ائله سنئن شئماليندا ياشاييردي. کئچئک باجين دا سودومدور کي، قيزلاري ائله سنئن جنوبوندا ياشاييردي. .46
لاکئن سن اونلارين يولو ائله ده گتمه‌دئن، اونلارين اتدئيي ائيرنج ائشلر قدر ده اتمه‌دئن؛ بوتون بونلاري کئچئک بئر ائش ساييب، بوتون اؤز عمل‌لرئنده اونلاردان دا فاسئد اولدون. .47
وارليغيما آند اولسون» پروردئگار رب بويورور، «باجين سودوملا قيزلاري سنئنله قيزلارينين اتدئيي ائشلري اتمه‌دئلر. .48
باخ، باجين سودومون و اونون قيزلارينين گوناهي بو ائدي: کئبئر، توخلوق و رئفاه ائچئنده ياشايارکَن، يوخسولا و مؤحتاجا کؤمک اَلي اوزاتماديلار. .49
کئبئرله‌نئب منئم حوضورومدا ائيرنج ائشلر اتدئلر. من بونو گؤرنده اونلاري سوپوروب آتديم. .50
سامئره سنئن اتدئيئن گوناهلارين ياريسيني بِله، اتمه‌مئشدي. ائيرنج ائشلرده اونلاري دا اؤتوب کچدئن. اتدئيئن بوتون ائيرنج ائشلرله باجيلاريني صالح کئمي گؤرستدئن. .51
سن ده اؤز روسوايچيليغينين يوکونو داشي، چونکي باجيلاريني تمئزه چيخارتدين. اتدئيئن گوناهلار اونلارينکيندان دا ائيرنج اولدوغونا گؤره، اونلار سندن داها دوز گؤرونورلر. خجالتئندن اوتان، اؤز روسوايچيليغينين يوکونو داشي، چونکي باجيلاريني صالح کئمي گؤرستدئن. .52
سودومدان و اونون قيزلاريندان اسئر اولونموشلاري، سامئره‌دن و اونون قيزلاريندان اسئر اولونموشلاري تزه‌دن اؤز يِرلرئنه قايتاراجاغام و اونلارلا بئرلئکده سندن اسئر اولونموشلاري دا گری قايتاراجاغام، .53
اَله کي، اونلارا تسلّی اولدوغون اوچون اؤز روسوايچيليغينين يوکونو داشيياسان و اتدئيئن هر ائشدن اوتاناسان. .54
باجيلارين سودوملا قيزلاري اوّلکي وضعئيّتلرئنه قاييداجاقلار، سامئره ائله قيزلاري اوّلکي وضعئيّتلرئنه قاييداجاقلار، سن و قيزلارين دا اوّلکي وضعئيّتئنئزه قاييداجاقسينيز. .55
کئبئرلي اولدوغون گونلرده، پئسلئيئن اوزه چيخماميشدان، باجين سودومون آدي سنئن آغزيندان اِشئدئلمَزدي، .56
ائندي سن، اَرام قيزلارينين و اطرافينداکي‌لارين، فئلئسط قيزلارينين و اطرافينداکي‌لارين مسخره‌سي اولوبسان، سنئن اطرافيندا اولانلار سني تحقئر ادئرلر. .57
سن عئفّتسئزلئيئنئن و ائيرنج عمل‌لرئنئن جزاسيني چکئرسن،» رب بويورور. .58
بلی، پروردئگار رب بله ديئر: «سن عهدي پوزوب آندا خور باخدين. بونا گؤره ده سن نجه اتدئن، من ده سنه اِله اده‌جيم. .59
لاکئن من جاوانليق گونلرئنده سنئنله باغلاديغيم عهدئمي يادا سالاجاغام و سنئنله ابدی بئر عهد باغلاياجاغام. .60
او واخت سن، بؤيوک و کئچئک باجيلاريني يانينا آلديغين زامان، اؤز عمل‌لرئني يادا ساليب اوتاناجاقسان. سنئنله باغلاديغيم عهدده اولماديغي حالدا اونلاري سنه قيز يرئنه وره‌جيم. .61
عهدئمي سنئنله برقرار اده‌جيم و بئله‌جکسن کي، رب منم. .62
اِلَجه بوتون اتدئکلرئني باغيشلاديغيم زامان، بونو يادا ساليب اوتاناجاقسان، روسوايچيليغيندان بئر داها آغزيني آچماياجاقسان.» پروردئگار رب بويورور." .63
←  Ezekiel 16/48   →