| Ezekiel 1/48 → |
| اوتوزونجو ائلده دؤردونجو آيين بِشئنجي گونو من کِبار چايي ساحئلئنده، اسئرلئکده ياشايانلار آراسيندا اولاندا گؤيلر آچيلدي و تاريدان گلن رؤيالاري گؤردوم. | .1 |
| پادشاه يِهوياکئنئن اسئر اولونماسينين بِشئنجي ائلئنده، همئن آيين بِشئنجي گونو | .2 |
| کَلده اؤلکه‌سئنده، کِبار چايي ساحئلئنده بوزئنئن اوغلو کاهئن حِزِقيالا ربّئن سؤزو نازئل اولدو. اورادا ربّئن اَلي اونونلا ائدي. | .3 |
| من گؤردوم کي، باخ، شئمالدان اَسن شئدّتلي بئر يِل، و دايانمادان شئمشَک چيخان بؤيوک بئر بولود گلئر. اونون اطرافيندا پاريلتي وار ائدي، اورتاسيندا دا اود ائچئنده پاريلدايان دمئر کئمي بئر شي وار ائدي. | .4 |
| اونون اورتاسيندا جانلي مخلوقا بَنزه‌يَن دؤرد شکئل وار ائدي؛ اونلارين گؤرونوشو ائنسانا بَنزه‌يئردي. | .5 |
| لاکئن هر بئرئنئن دؤرد اوزو و دؤرد قانادي وار ائدي. | .6 |
| اونلارين باجاقلاري دوز ائدي. آياقلاري دانا آياقلارينا اوخشاييردي و جئلالانميش بورونج کئمي پاريلداييردي. | .7 |
| دؤرد يانلاريندا اولان قانادلاري آلتيندا، ائنسان اَللري وار ائدي. دؤردونون ده اوزلري و قانادلاري وار ائدي. | .8 |
| اونلارين قانادلاري بئر-بئرئنه توخونوردو؛ ائره‌لي گِدَرکَن اوزلري صاغا-سولا دؤنموردو، هر بئري اوز توتدوغو طرفه ائره‌لي‌له‌يئردي. | .9 |
| اونلارين اوزلرئنئن شکئلئنه گلئنجه، هر بئرئنئن بئر ائنسان صئفتي وار ائدي؛ هر دؤردونون ده صاغ طرفئنده آصلان صئفتي، سول طرفئنده گاميش صئفَتي وار ائدي، و هر دؤردونون قارتال اوزو وار ائدي. | .10 |
| اونلارين اوزلري بله ائدي. و قانادلاري يوخارييا طرف آچيلميشدي؛ هر بئرئنئن ائکي قانادي ياندا او بئرئسئنئن ائکي قانادينا توخونوردو، هر بئرئسئنئن ائکي قانادي دا بدنئني اؤرتوردو. | .11 |
| هر بئري اوز توتدوغو طرفه ائره‌لي‌له‌يئردي؛ روح هارايا گدئردي، اونلار دا اورايا گِدئردئلر. ائره‌لي گِدَرکَن صاغا-سولا دؤنموردولر. | .12 |
| بو جانلي‌لار آراسيندا بئر شي وار ائدي کي، يانار کؤز اودونا، گؤرونوشجه مشعل کئمي بئر شيه بَنزه‌يئردي. بو اود جانلي مخلوقلارين آراسيندا حرکت ادئردي. اود پاريلداييردي و اوندان شئمشک چاخيردي. | .13 |
| جانلي مخلوقلار شئمشَک چيخان کئمي جلد او طرف-بو طرفه حرکت ادئردئلر. | .14 |
| بو دؤرد اوزلو جانلي مخلوقلارا باخارکَن، گؤردوم کي، هر بئرئنئن يانيندا يِره دَيَن بئر چرخ وار. | .15 |
| چرخلرئن گؤرونوشو و قورولوشو پاريلدايان زبرجد کئمي ائدي، دؤردو ده بئر-بئرئنه اوخشاييردي. اونلارين گؤرونوشو و قورولوشو اِله ائدي کي، اِله بئل، بئر چرخ او بئري چرخئن ائچئنده يِرلَشمئشدي. | .16 |
| گتدئکلري زامان دؤرد طرفه ده گده بئلئردئلر. ائره‌لي گِدَرکَن صاغا-سولا دؤنموردولر. | .17 |
| چرخلرئن کناري اوجا و قورخولو ائدي. دؤردونون ده ساغاناقلاري هر طرفدن گؤزلرله دولو ائدي. | .18 |
| جانلي مخلوقلار هر طرفه گدئردئلر، چرخلر ده اونلارين يانيندا فيرلانيرديلار؛ جانلي مخلوقلار يردن قالخديقجا چرخلرده ده قالخيردي. | .19 |
| روح هارايا گدئردي، اونلار دا اورايا گِدئردئلر؛ چرخلر ده اونلارلا برابر قالخيردي، چونکي جانلي مخلوقلارين روحو چرخلرده ائدي. | .20 |
| اونلار ائره‌لي‌له‌يَنده، بونلار دا ائره‌لي‌له‌يئردي؛ اونلار داياناندا بونلار دا دايانيردي؛ اونلار يردن قالخاندا، چرخلرده ده قالخيردي، چونکي جانلي مخلوقلارين روحو چرخلرده ائدي. | .21 |
| يوخاري طرفده، جانلي مخلوقلارين باشي اوستونده، بولور کئمي پاريلدايان، گؤي قوبّه‌سئنه اوخشايان، هيبتلي بئر شي آچيليردي. | .22 |
| قوبّه‌نئن آلتيندا، هر جانلي مخلوق، قانادلاريني يانينداکي‌لارا طرف اوزاديردي و باشقا ائکي قانادلا دا بدنئني اؤرتوردو. | .23 |
| اونلار قاباغا گتدئکلري زامان، قانادلارينين گورولتوسونو اشئتدئم؛ اِله بئل گور سولارين سَسي، قادئري موطلقئن صداسي، گوجلو همهمه سَسي، قوشونون تاپّيلتيسي گلئردي؛ هارادا دايانيرديلار، قانادلاريني اِندئرئردئلر. | .24 |
| باشلاري اوستونده‌کي قوبّه‌دن بئر سَس گلدي؛ هارادا دايانيرديلار، قانادلاريني اِندئرئردئلر. | .25 |
| باشلاري اوستونده‌کي قوبّه‌نئن اوستونده لاجورد داشدان دوزه‌لدئلمئش تخته اوخشار بئر شي وار ائدي. اوجادا، تخته اوخشايان شيئن اوستونده ائنسانا بَنزَر بئر شخص وار ائدي. | .26 |
| من گؤردوم کي، اونون بِلئندن يوخاري حئصّه‌سي، پاريلدايان دمئره اوخشاييردي و ائچي هر طرفدن آلوو کئمي ائدي. من اونون بِلئندن آشاغي گؤرونوشونو ده گؤردوم: سانکي بئر آلوو ائدي و اطرافيندا پاريلتي وار ائدي. | .27 |
| ياغيش گونو بولوددا اولان رنگئن کامانينين گؤرونوشو نجه اولور، هر طرفدن گلن پاريلتينين گؤرونوشو ده اِله ائدي. بو، ربّئن شؤوکتئنه بَنزَر بئر رؤيا ائدي. بونو گؤرنده من اوزو اوسته يِره ييخيلديم و دانيشان بئر شخصئن سَسئني اشئتدئم. | .28 |
| Ezekiel 1/48 → |