Ecclesiastes 9/12   

بلجه بونلارين هاميسيني اوره‌يئمده آراشديريب بو نتئجه‌يه گلدئم: صالحلر و حئکمتلئلر و اونلارين ائشلري تارينين اَلئنده‌دئر. ائستر سِوگي اولسون ائستر نئفرت، ائنسان قاباغينا نه چيخاجاغيني بئلمز. .1
چونکي هامينين باشينا گلن احوالات بئردئر؛ صالحلرئن و پئسلرئن، ياخشي‌لارين و يامانلارين، طاهئرلرئن و نجئسلرئن، قوربان تقدئم ادنلرئن و قوربان تقدئم اتمه‌ينلرئن. نجه ياخشي‌لارادير، اله ده گوناهکارلارادير؛ آند ائچَنلره ده آند ائچمکدن قورخانلارا کئمي‌دئر. .2
گون آلتيندا يرئنه يتئرئلن بوتون شيلرئن پئسلئيي بوندادير کي، هاميسينا راست گلن قدر بئردئر. دوغرودان دا کي، ائنسانلارين اوره‌يي پئسلئکله دولودور: نه قدر کي، ياشاييرلار، دَلئلئک اورَکلرئنده وار و اوندان سونرا اؤلولرئن يانينا گدئرلر. .3
آمّا دئرئلر جاماعاتينا قوشولانين اومئدي وار، چونکي دئري بئر ائت اؤلو بئر شئردن ياخشي‌دير. .4
چونکي دئرئلر اؤله‌جکلرئني بئلئرلر، لاکئن اؤلولر بئر شي بئلمئرلر و آرتيق اونلار اوچون اَجر يوخدور، چونکي اونلارين ذئکري ده يادلاردان چيخيب. .5
اؤلولرئن سِوگئلري، نئفرتلري، اونلارين پاخيلّيقلاري دا چوخدان محو اولوبدور؛ گون آلتيندا يرئنه يتئرئلن هچ بئر شيدن آرتيق پايلاري اولماياجاقدير. .6
گت چؤره‌يئني شادليقلا يِه، شرابيني شاد اورَکله ائچ؛ چونکي تاري، اتدئکلرئندن چوخدان راضي‌دير. .7
قوي پالتارين همئشه آغ اولسون، باشيندان ياغ اَسکئک اولماسين. .8
باطئل عؤمرونون بوتون گونلرئنده، سِودئيئن آروادلا خوش بئر حيات کچئرت؛ او عؤمرونده، تارينين گون آلتيندا سنه وردئيي بوتون باطئل گونلرئنده. چونکي حياتينين پايي، گون آلتيندا چکدئيئن زحمتئن پايي اودور. .9
اَللرئنئن اتميه تاپديغي هر شيي بوتون قووّتئنله ات؛ چونکي گده‌جيئن قبئرده نه ائش وار، نه دوشونجه، نه معرئفت وار نه ده حئکمت. .10
گئنه باخديم و گون آلتيندا گؤردوم کي، ميدان بَرک قاچانلارينکي ديئل، موحارئبه ده پهلوانلارينکي، چؤرک حئکمتلئلرئنکي ديئل، ثروت ده آنلاقلي اولانلارينکي، ائلتئفات عالئملرئنکي ديئل، چونکي واخت و بخت اونلارين هاميسينين قاباغينا چيخير. .11
بوندان علاوه، ائنسان اؤز واختيني بئلمئر؛ باليقلارين يامان بئر تورا دوشدويو کئمي، قوشلارين تله‌يه ائلئشدئيي کئمي، ائنسانلار دا پئس بئر زامانا دوشَرلر، او زامان کي، قَفئلدن اونلارين اوستونه گلر. .12
گون آلتيندا بله بئر حئکمت ده گؤردوم و منه چوخ تأثئر اتدي: .13
کئچئک بئر شهر وار ائدي، ائچئنده آز آدام. بؤيوک بئر پادشاه اونون ضئدّئنه قالخيب اونو آرايا سالدي و اونون اطرافينا بؤيوک تله‌لر تئکدي. .14
اورادا فاغير آمّا حئکمتلي بئر آدام ياشاييردي و او، حئکمتي ائله شهري خئلاص اتدي. لاکئن هچ کس بو فاغير آدامي خاطيرلامادي. .15
او زامان ددئم: "حئکمت قودرتدن ياخشي‌دير، لاکئن فاغير آدامين حئکمتي تحقئر اولونور، و سؤزلري اِشئدئلمئر. .16
حئکمتلي آداملارين سَس‌سئزلئکده ددئيي سؤزلر، سَفِهلرئن آراسيندا حاکئم اولانين قيشقيرتيسيندان داها ياخشي‌دير. .17
حئکمت موحارئبه سئلاحلاريندان ياخشي‌دير؛ لاکئن بئر گوناهکار چوخ ياخشيليغي آرادان آپارار. .18

  Ecclesiastes 9/12