| ← Deuteronomy 24/34 → |
| کئمسه بئر آروادي آليب، اِولئلئک زاماني اوندا اوتانديريجي بئر شي تاپديغي اوچون آروادي بَيَنمَسه، بوشانما کاغيذي يازيب اَلئنه ورسئن و اِوئندن گؤندرسئن. | .1 |
| آرواد او اِوي ترک ادئب گدر و آيري کئشئيه اَره گده بئلر. | .2 |
| اگر او بئري کئشي ده اونو بَيَنمَسه، اونا بوشانما کاغيذي يازيب اَلئنه ورسئن و اِوئندن گؤندرسئن. و يا اگر اونو آلان کئشي اؤلسه، | .3 |
| اونو اِودن چيخارتميش اوّلکي اَري اونو تکرار اؤزونه آرواد آلا بئلمز، چونکي آروادي لَکه‌له‌مئشدئر؛ بو، ربّئن حوضوروندا ائيرنجدئر. تارينيز ربّئن سئزه ائرث اولاراق وره‌جيی اؤلکه‌ده بله گوناها يول ورمه‌يئن. | .4 |
| تزه اِولَنَن آدام دؤيوشه گتمه‌سئن. هچ وظئفه‌يه قويولماسين. قوي بئر ائل اِوئنده آزاد قاليب، آلديغي آروادي سِوئندئرسئن. | .5 |
| دَيئرماني و يا اوست داشيني کئمسه گئروو گؤتورمه‌سئن، چونکي او آدامين حياتيني گئروو گؤتورموش اولور. | .6 |
| اگر ائسرايئل اؤولادلاري آراسيندا کئمسه هموطنئني اوغورلاييب اونونلا ياوا رفتار ادئب و يا اونو ساتارسا، بو اوغرو اؤلدورولمه‌لي‌دئر. بلجه آرانيزدان بو پئسلئيي تمئزله‌يئن. | .7 |
| جوزام ناخوشلوغو باره‌ده دئقّتلي اولون و لاوئلي کاهئنلرئن امر اتدئيي کئمي سئزه اؤيرده‌جکلري هر شيه دئقّتله عمل ادئن؛ اونلارا امر اتدئيئم کئمي دئقّتله عمل ادئن. | .8 |
| خاطرلايين کي، مئصئردن چيخاندان سونرا تارينيز رب يولدا مريمه نه اتدي. | .9 |
| قونشونوزا بئر شي بورج ورنده، گئروو گؤتورمک اوچون اونون اِوئنه گئرمه‌يئن. | .10 |
| باييردا دايانين، قوي بورج وردئيئنئز آدام اؤزو گئرووو باييرا چيخارتسين. | .11 |
| اگر او آدام کاسيبدير، اونون گئرووو سئزده اولا-اولا ياتمايين. | .12 |
| گئروو گؤتوردويونوزون اوست پالتاريني گرک گون باتاندا گری قايتاراسينيز کي، او اؤز اوست پالتاريندا ياتيب سئزه خيئر-دوعا اتسئن؛ و بو، تارينيز ربّئن حوضوروندا سئزئن اوچون صالحلئک ساييلار. | .13 |
| کاسيب و مؤحتاج بئر اوجرتله ائشلَيه‌نه ظولم اتمه‌يئن؛ ائستر بئر هموطنئنئز اولسون، ائستر اؤلکه‌نئزده‌کي شهرلرده ياشايان هر هانسي بئر قرئب. | .14 |
| اوجرتئني هر گون، گون باتمادان قاباق ورئن، چونکي کاسيبدير و اونا اومئد باغلاييب. يوخسا سئزدن ربّه فرياد ادر و سئزه گوناه ساييلار. | .15 |
| اوغولا گؤره آتا، آتايا گؤره اوغول اؤلدورولمه‌سئن؛ هر کس اؤز گوناهينا گؤره اؤلدورولسون. | .16 |
| قرئبي و يِتئمي عدالتدن محروم اتمه‌يئن و دول آروادين پالتاريني دا گئروو گؤتورمه‌يئن. | .17 |
| خاطيرلايين کي، سئز ده مئصئرده قول ائدئنئز و تارينيز رب سئزي اورادان قورتاردي. بونون اوچون بله رفتار اتمه‌يي سئزه امر ادئرم. | .18 |
| زَمئنئزده اَکئني بئچن زامان، اگر بئر دَرز ياددان چيخارديبسينيز، اونو گؤتورمک اوچون گری قاييتمايين. قوي او، قرئبئن، يِتئمئن و دولون اولسون. او واخت تارينيز رب اَله گؤتوردويونوز هر ائشده سئزه برکت ورر. | .19 |
| زيتون آغاجلارينيزي دؤيوب زيتون ييغان زامان، بوداقلاردا قالاني دنله‌مک اوچون گری قاييتمايين. قوي او، قرئبئن، يِتئمئن و دولون اولسون. | .20 |
| باغينيزين اوزوملرئني ييغان زامان، تَنَکلرده قالاني اوچون گری قاييتمايين. قوي او، قرئبئن، يِتئمئن و دولون اولسون. | .21 |
| مئصئر تورپاغيندا قول اولدوغونوزو خاطيرلايين. بونون اوچون بله رفتار اتمه‌يي سئزه امر ادئرم. | .22 |
| ← Deuteronomy 24/34 → |