| ← Daniel 3/12 → |
| پادشاه نِبوکَدنِصّر بئر قيزيل موجسّمه دوزلتدي. اونون بويو آلتميش قول‌آچ ، اِني آلتي قول‌آچ ائدي. اونو بابئل وئلايتئنده اولان دورا اوواسيندا قويدو. | .1 |
| سونرا پادشاه نِبوکَدنِصّر خبر گؤندردي کي، ساتراپلاري، قاييم‌مقاملاري، والئلري، موشاوئرلري، خزئنه‌دارلاري، حاکئملري، وکئل‌لري، خولاصه، بوتون وئلايتلرئن مأمورلاريني ييغسينلار و قويدوغو موجسّمه‌نئن وقف اتمه مراسئمئنه گلسئنلر. | .2 |
| او زامان ساتراپلار، قاييم‌مقاملار، والئلر، موشاوئرلر، خزئنه‌دارلار، حاکئملر، وکئللر، خولاصه، بوتون وئلايتلرئن مأمورلاري پادشاه نِبوکَدنِصّرئن قويدوغو موجسّمه‌نئن وقف اتمه مراسئمئنه ييغيلديلار. اونلار نِبوکَدنِصّرئن قويدوغو موجسّمه‌نئن قاباغيندا دوردولار. | .3 |
| جارچي اوجادان اعلان اتدي: "ای خالقلار، مئلّتلر و دئل‌لر، سئزه امر اولونور کي، | .4 |
| بوينوز، ني، طنبور، چنگ، آرفا، بالابان و هر جور موسئقي آلَتلرئنئن سَسئني اشئدن واخت، يِره اَيئلئب پادشاه نِبوکَدنِصّرئن قويدوغو قيزيل موجسّمه‌يه سجده اده‌سئنئز. | .5 |
| کئم يِره اَيئلئب سجده اتمه‌سه، او ساعات آلوولانان اود کوره‌سئنه آتيلاجاق." | .6 |
| بِلَجه، بوتون خالقلارا، مئلّتلره و دئل‌لره منصوب آداملار بوينوز، ني، طنبور، چنگ، آرفا و هر جور موسئقي آلتلرئنئن سَسئني اشئدن زامان يِره اَيئلئب پادشاه نِبوکَدنِصّرئن قويدوغو قيزيل موجسّمه‌يه سجده اتدئلر. | .7 |
| اِله بو واخت بعضی کَلدانئلر يهودئلرئن ضئدّئنه ائتّئهام ووردولار. | .8 |
| اونلار پادشاه نِبوکَدنِصّره ددئلر: "قوي پادشاه همئشه صاغ اولسون، | .9 |
| سن امر ادئبسن کي، بوينوز، ني، طنبور، چنگ، آرفا، بالابان و هر جور موسئقي آلَتلرئنئن سَسئني اشئدن هر کس يِره اَيئلئب قيزيل موجسّمه‌يه سجده اتسئن. | .10 |
| کئم يِره اَيئلئب سجده اتمه‌سه، آلوولانان اود کوره‌سئنه آتيلاجاق. | .11 |
| سنئن بابئل وئلايتئنه مأمور قويدوغون شَدرَک، مِشَک و عَبِدنِگو آدلي يهودئلر وار. ای پادشاه، بو آداملار سني سايماييبلار، سنئن آللاهلارينا خئدمت اتمه‌يئرلر و قويدوغون قيزيل موجسّمه‌يه ده سجده اتمئرلر." | .12 |
| او زامان نِبوکَدنِصّر آلوولانان قضبله امر اتدي کي، شَدرَکي، مِشَکي و عَبِدنِغونو گتئرسئنلر. بو آداملار پادشاهين حوضورونا گتئرئلدي. | .13 |
| نِبوکَدنِصّر اونلارا ددي: "ای شَدرَک، مِشَک و عَبِدنِغو، بو دوغرودور کي، سئز منئم آللاهلاريما قوللوق اتمئرسئنئز؟ منئم قويدوغوم قيزيل موجسّمه‌يه سجده اتمئرسئنئز؟ | .14 |
| ياخشي اولار کي، ائندي بوينوز، ني، طنبور، چنگ، آرفا، بالابان و هر جور موسئقي آلَتلرئنئن سَسئني اشئدن زامان يِره اَيئلئب دوزلتدئيئم موجسّمه‌يه سجده اده‌سئنئز. اگر سجده اتميه‌سئنئز، او ساعات آلوولانان اود کوره‌سئنه آتيلاجاقسينيز. او زامان سئزي هانسي تاري منئم اَلئمدن قورتارا بئلر؟" | .15 |
| شَدرَک، مِشَک و عَبِدنِگو پادشاها جاواب وردئلر: "ای نِبوکَدنِصّر، بئزئم بو ائش اوچون سنئن قاباغيندا اؤزوموزدن مودافئعه اتمه‌يئمئزه احتئياج يوخدور. | .16 |
| اگر بله اولسا، قوللوق اتدئيئمئز تاريميز قادئردئر کي، بئزي آلوولانان اود کوره‌سئندن خئلاص اتسئن و او بئزي سنئن اَلئندن قورتاراجاق، ای پادشاه. | .17 |
| آمّا اگر اتمه‌سه ده، سنه معلوم اولسون کي، ای پادشاه، بئز سنئن آللاهلارينا قوللوق ادن ديئلئک و سنئن قويدوغون قيزيل موجسّمه‌يه ده سجده اتميه‌جيئک." | .18 |
| او زامان نِبوکَدنِصّر بَرک قضبلَندي و شَدرَکئن، مِشَکئن، و عَبِدنِگونون ضئدّئنه سئماسي دَيئشئلدي. او امر اتدي کي، اود کوره‌سئني عادتن قيزديرديقلاريندان يدّي دفه آرتيق قيزديرسينلار. | .19 |
| قوشونونون گوجلو عسگرلرئنه امر اتدي کي، شَدرَکئن، مِشَکئن و عَبِدنِگونون اَل- قولونو باغلاييب اونلاري آلوولانان اود کوره‌سئنه آتسينلار. | .20 |
| او واخت بو آداملارين اَل- قولونو باغلاديلار و اَيئنلرئنده شالوار، جوبّه، عمّامه و باشقا پالتارلاري ائله آلوولانان اود کوره‌سئنه آتديلار. | .21 |
| پادشاهين امري عاجئل اولدوغونا گؤره، اود کوره‌سي ده حدّئندن آرتيق قيزديريلديغي اوچون، اود آلووسو شَدرَکي، مِشَکي و عَبِدنِگونو اودا آتان آداملاري قاپيب اؤلدوردو. | .22 |
| بو اوچ نفر-شَدرَک، مِشَک و عَبِدنِگو دا اَل-قوللاري باغلانميش حالدا آلوولانان اود کوره‌سئنئن ائچئنه ييخيلديلار. | .23 |
| او زامان پادشاه نِبوکَدنِصّر حيرته گلئب تَله‌سئک آياغا قالخدي و اؤز موشاوئرلرئنه ددي: "مگر بئز اوچ نفر اَل-قولو باغلانميش آدامي اودا آتماديق؟" اونلار جاوابيندا پادشاها ددي: "دوغرودور، ای پادشاه!" | .24 |
| او ددي: "باخ، من اودون ائچئنده اَل- قولو آچيق دؤرد نفرئن گَزدئيئني گؤرورَم و اونلارا هچ نه اولمور. اونلاردان دؤردونجوسو آللاهلارين اوغلونا بَنزه‌يئر." | .25 |
| او زامان نِبوکَدنِصّر آلوولانان اود کوره‌سئنئن قاپيسينا ياخينلاشدي و سَسله‌يئب ددي: "ای اوجالاردا اولان تارينين قوللاري شَدرَک، مِشَک و عَبِدنِگو! چيخين و بورايا گلئن." او واخت شَدرَک، مِشَک و عَبِدنِگو اودون ائچئندن چيخديلار. | .26 |
| اطرافا ييغيلميش ساتراپلار، امئرلر، والئلر و پادشاهين موشاوئرلري گؤردولر کي، اود بو آداملارين بدنئنه هچ بئر ضرر وورماييب: نه اونلارين ساچلاري يانميش، نه ده پالتارلاري دَيئشمئشدي، حتّا اودون حئسي ده اونلارا اوتورماميشدي. | .27 |
| او واخت نِبوکَدنِصّر ددي: "شَدرَکئن، مِشَکئن و عَبِدنِگونون تاريسينا شوکور اولسون کي، اؤز مَله‌يئني گؤنده‌رئب اونا بِل باغلايان قوللاريني خئلاص اتدي. اونلار پادشاهين امرئنه ضئدّ چيخيب حاضير اولدولار کي، جانلاريندان کچسئنلر، لاکئن اؤزلرئنئن تاريسيندان باشقا بئر آللاها قوللوق و يا سجده اتمه‌سئنلر. | .28 |
| بونا گؤره من بله فرمان ورئرم: هر خالقا، مئلّته، و دئله عاييد اولان هر کس کي، شَدرَکئن، مِشَکئن و عَبِدنِگونون تاريسينا کوفر دئيه، تئکه-تئکه اولوناجاقدير و اونلارين اِولري زئبئل‌لئيه چِورئله‌جک. چونکي بو جور خئلاص اتميه قادئر اولان باشقا بئر تاري يوخدور." | .29 |
| او زامان پادشاه بابئل وئلايتئنده شَدرَکئن، مِشَکئن و عَبِدنِگونون منصبلرئني اوجالتدي. | .30 |
| ← Daniel 3/12 → |