2Kings 7/25   

اِلئشَع ددي: "ربّئن سؤزونو اِشئدئن، رب بله ديئر: «صاباح بو ساعاتلاردا سامئره دروازاسيندا بئر اؤلچو نارين اون بئر شِکِله ، ائکي اؤلچو آرپا دا بئر شِکِله ساتيلاجاق.»" .1
او سرکرده‌کي پادشاه اونون اَلئنه سؤيکَنَردي، تاري آدامينا جاواب ورئب ددي: "باخ، رب گؤيلرده پنجره‌لر آچسا دا، مگر بو ائش اولا بئلر؟" او واخت تاري آدامي ددي: "باخ، سن گؤزلرئنله بونو گؤره‌جکسن، لاکئن اوندان يِمَيه‌جکسن." .2
شهر دروازاسينين قاباغيندا دؤرد جوزاملي آدام وار ائدي. اونلار بئربئرلرئنه ددئلر: "نه اوچون بئز اؤلَنه قدر بورادا اوتوروب قالاق؟ .3
دِسَک شهره گئرَک، شهرده اولان آجليقدان اؤله‌جيئک، اگر بورادا قالساق، بورادا دا اؤله‌جيئک. بونا گؤره ده گلئن اَراملي‌لارين اوردوگاهينا گدئب تسلئم اولاق. اگر بئزي صاغ بوراخسالار، صاغ قالاريق. اؤلدورسه‌لر ده، اؤله‌رئک." .4
اونلار اَراملي‌لارين اوردوگاهينا گتمک اوچون آخشام قالخيب آلاقارانليغيندا اونون کنارينا گلدئلر. اورادا هچ کس يوخ ائدي. .5
چونکي رب اَراملي‌لارين اوردوسونا دؤيوش عارابالارينين گورولتوسونو، آتلارين تاپّيلتيسيني و بؤيوک قوشونون سَسئني اشئتدئرمئشدي. اونلار بئربئرلرئنه دِمئشدئلر: "ائسرايئل پادشاهي، خئت و مئصئر پادشاهلاريني اوجرَتله توتوب کي، بئزئم اوستوموزه گلسئنلر." .6
اونلار آخشام آلاقارانليغيندا قالخيب قاچميشديلار. چاديرلاريني، آتلاريني، اِششَکلرئني، حتّا بوتون اوردوگاهي اولدوغو کئمي بوراخميشديلار. جانلاريني قورتارماق اوچون قاچميشديلار. .7
بو جوزاملي‌لار اوردوگاهين کنارينا گلئب بئر چاديرا گئردئلر و يِيئب-ائچدئلر. اورادان قيزيل، گوموش و پالتار گؤتوروب گتدئلر و اونلاري گئزلَتدئلر. سونرا قاييديب آيري بئر چاديرا گئردئلر. اورادان دا شيلر گؤتوروب گتدئلر و اونلاري دا گئزلَتدئلر. .8
اونلار بئربئرلرئنه ددئلر: "اتدئيئمئز ياخشي ديئل، بو گون موژده گونودور، آمّا بئز ساکئت قالميشيق. اگر سحر آچيلانا قدر گؤزله‌يَک، باشيمزا جزا گلر. گلئن گِدَک و ساراي آداملارينا بو خبري بئلدئرَک." .9
بلجه اونلار گلئب شهرئن قاپيچيلاريني سَسله‌دئلر و اونلارا بئلدئرئب ددئلر: "اَراملي‌لارين اوردوگاهينا گتدئک. باخ، اورادا هچ کس يوخ ائدي، ائنسان سَسي ده گلمئردي. آنجاق باغلي آتلار، باغلي اِششَکلر و اولدوغو کئمي قالان چاديرلار وار ائدي." .10
قاپيچيلار قيشقيريب بو خبري ساراي ائچه‌رئسئنده اولان آداملارا بئلدئردئلر. .11
پادشاه گجه ائکن قالخيب اعيانلارينا ددي: "ائندي سئزه دئيه‌رم کي، اَراملي‌لار بئزه نه ادئبلر: اونلار بئلئرلر کي، بئز آجيق، بونا گؤره ده اوردوگاهدان چيخيب چؤلده گئزله‌نئبلر و ديئرلر: «شهردن چيخاندا اونلاري دئري توتاريق و شهره گئره‌رئک.»" .12
اعيانلاردان بئري جاواب ورئب ددي: "قوي بئر نچه آدام شهرده قالميش آتلاردان بِشئني گؤتورسون و اونلاري گؤنده‌رک. قوي گدئب گؤرسونلر. اونلارين دا عاقئبتي قالان بوتون ائسرايئل جاماعاتينين عاقئبتي کئمي اولاجاق، چونکي بوتون ائسرايئل جاماعاتي هلاک اولاجاق." .13
اونلار آتلار قوشولموش ائکي دؤيوش عاراباسي گؤتوردولر. پادشاه اونلاري اَرام قوشونونون دالينجا گؤنده‌رئب ددي: "گدئن گؤرون." .14
اونلار اَراملي‌لارين دالينجا اوردون چايينا قدر گتدئلر. بوتون يول، اَراملي‌لارين تَلَسئکدن آتديقلاري پالتار و اشيالارلا دولو ائدي. قاصئدلر گری قاييديب پادشاها بو خبري بئلدئردئلر. .15
بلجه خالق چيخيب اَراملي‌لارين اوردوگاهيني قارَت اتدي. ربّئن ددئيي کئمي بئر اؤلچو نارين اون بئر شِکِله، ائکي اؤلچو آرپا دا بئر شِکِله ساتيلدي. .16
پادشاه، اَلئنه سؤيکَنَن سرکرده‌ني دروازانين آغزينا قويدو. آمّا خالق دروازانين آغزيندا اونو آياق آلتيندا تاپدالاديلار و او اؤلدو؛ نجه کي، تاري آدامي، پادشاهين اونون يانينا گلدئيي واخت دمئشدي. .17
تاري آدامينين پادشاها ددئيي کئمي اولدو. او دمئشدي: "صاباح بو ساعاتلاردا سامئره دروازاسيندا ائکي اؤلچو آرپا بئر شِکِله، بئر اؤلچو نارين اون بئر شِکِله ساتيلاجاق." .18
سرکرده ده تاري آدامينا جاواب ورئب دمئشدي: "رب گؤيلرده پنجره‌لر آچسا دا، مگر بو ائش اولا بئلر؟" تاري آدامي دا دمئشدي: "باخ، سن گؤزلرئنله بونو گؤره‌جکسن، لاکئن اوندان يِمَيه‌جکسن." .19
همئن ائش ده اونون باشينا گلدي؛ خالق اونو دروازانين آغزيندا آياق آلتيندا تاپدالادي و او اؤلدو. .20

  2Kings 7/25