| ← 2Kings 5/25 → |
| اَرام پادشاهينين قوشون باشچيسي نَعَمان آغاسينين يانيندا حؤرمت و اعتئبار صاحئبي ائدي، چونکي رب اونون واسئطه‌سئله اَراما ظفر ورمئشدي. او، جسور بئر دؤيوشچو ائدي، لاکئن جوزاملي ائدي. | .1 |
| اَراملي‌لار دسته‌لرله چيخيب ائسرايئل تورپاغيندان کئچئک بئر قيزي اسئر گؤتورموشدولر. بو قيز نَعَمانين آروادينين يانيندا قاليردي. | .2 |
| او، خانيمينا ددي: "کاشکي آغام سامئره‌ده اولان پيغمبرئن يانيندا اولسايدي. او زامان پيغمبر اونون جوزامينا شفا ورَردي." | .3 |
| نَعَمان گتدي و آغاسي ائله دانيشيب اونا ددي: "ائسرايئل تورپاغيندان اولان قيز فئلان و بَهمان ددی." | .4 |
| اَرام پادشاهي ددي: "گت، من ائسرايئل پادشاهينا بئر مکتوب گؤندره‌رم.» نَعَمان اؤزو ائله آلتي مئن شِکِل قيزيل، اون تالانت گوموش و اون دست پالتار گؤتوروب گتدي. | .5 |
| مکتوبو ده ائسرايئل پادشاهينا گتئردي. اورادا بله يازيلميشدي: "ائندي بو مکتوبلا برابر قولوم نَعَماني دا يانينا گؤندرمئشم کي، سن اونون جوزامينا شفا وره‌سن." | .6 |
| ائسرايئل پادشاهي مکتوبو اوخوياندا پالتاريني جيريب ددي: "مگر من تارييام کي، اؤلدوروب دئرئلدَم؟ نئيه بو آدام منئم يانيما سؤز گؤندرئر کي، بئر آداما جوزاميندان شفا ورئم؟ دئقّت ادئن و گؤرون کي، منئمله داعوا اتمک اوچون نجه بهانه آختارير." | .7 |
| تاري آدامي اِلئشَع ائسرايئل پادشاهينين اؤز پالتاريني جيرديغيني اشئدنده اونا خبر گؤندرئب ددي: "نه اوچون پالتاريني جيردين؟ قوي ائندي او منئم يانيما گلسئن و بئلسئن کي، ائسرايئلده بئر پيغمبر وار." | .8 |
| نَعَمان آتلاري و دؤيوش عاراباسي ائله گلدي و اِلئشَعئن اِوئنئن قاپيسيندا داياندي. | .9 |
| اِلئشَع اونون يانينا قاصئد گؤندرئب ددي: "گت، اوردون چاييندا يدّي دفه يويون، بدنئن صاغاليب جوزامدان تمئز اولارسان." | .10 |
| آمّا نَعَمان قضبله‌نئب گتدي و ددي: "باخ، گومان ادئردئم کي، اِشئيه چيخيب يانيما گله‌جک، دوروب تاريسي ربّئن آدي ائله چاغيريب اَلئني جوزاملي يرئن اوستونده يِلله‌يئب شفا وره‌جک. | .11 |
| مگر دَمَشقئن چايلاري اَبانا و فَرپَر، ائسرايئلئن بوتون سولاريندان داها ياخشي ديئل؟ مگر اونلاردا يويونوب تمئز اولا بئلمزدئم؟" بلجه حئرصله دؤنوب گتدي. | .12 |
| نَعَمانين آداملاري اونون يانينا گلدئلر و اونونلا دانيشيب ددئلر: "ای آتاميز، اگر پيغمبر سنه بؤيوک بئر شي امر اتسَيدي، مگر اونا عمل اتمَزدئن؟ بس نه قدر چوخ ائندي کي، سنه «يويون و تمئز اول» ديئر." | .13 |
| بوندان سونرا نَعَمان تاري آدامينين سؤزونه گؤره اوردون چايينا اِنئب، يدّي دفه سويا باتيب چيخدي. اونون بدني صاغالدي و بئر کؤرپه بدني کئمي تمئز اولدو. | .14 |
| نَعَمان بوتون دسته‌سي ائله گئنه تاري آدامينين يانينا گلدي و اونون قاباغيندا دايانيب ددي: "باخ، ائندي بئلدئم کي، ائسرايئلدن باشقا، دونيانين هچ بئر يرئنده تاري يوخدور. بويور، ائندي بو قولونون هدئيّه‌سئني گؤتور." | .15 |
| لاکئن اِلئشَع ددي: "حوضوروندا دوردوغوم وار اولان ربّه آند اولسون کي، هچ نه گؤتورميه‌جيم." نَعَمان گؤتورمَيي تأکئد اتدي، لاکئن اِلئشَع ائستمه‌دي. | .16 |
| نَعَمان ددي: "اگر گؤتورمورسن، اوندا قوي بو قولونا بورادان ائکي قاطير يوکو تورپاق ورئلسئن. چونکي بو قولون آرتيق آيري آللاهلارا يوخ، فقط ربّه يانديرما قوربانلاري و قوربانلار گتئره‌جک. | .17 |
| آنجاق رب بو ائشي قولونا باغيشلاسين: آغام پادشاه پرستئش اوچون رئمّون معبدئنه گئرَنده، منئم اَلئمه سؤيکه‌نئر. من ده رئمّون معبدئنده سجده اتمه‌لي‌يَم. اورادا سجده اتدئيئمي رب قولونا باغيشلاسين." | .18 |
| اِلئشَع اونا ددي: "سالامات گت." نَعَمان اونون يانيندان چيخيب بئر آز يول گتدي. | .19 |
| آمّا تاري آدامي اِلئشَعئن نؤکري گِخَزي دوشوندو: "باخ، آغام ائستمه‌دی کی، بو اَراملي نَعَماندان گتئردئيي شيي گؤتورسون. وار اولان ربّه آند اولسون کي، اونون دالينجا قاچيب اوندان بئر شي آلاجاغام." | .20 |
| گِخَزي نَعَمانين دالينجا قاچدي. نَعَمان دالينجا بئر نفرئن گلدئيئني گؤرنده، اونو پئشواز اتمک اوچون عارابادان دوشوب ددي: "خيئر اولا؟" | .21 |
| گِخَزي ددي: "خيئردئر. آغام منی گؤندردي کي، سنه دِيئم: «اِله ائندئجه اِفرايئمئن داغليق بؤلگه‌سئندن يانيما پيغمبرلردن اولان ائکي جاوان اوغلان گلدي. خاهئش ادئرم، اونلارا بئر تالانت گوموش و ائکي دست پالتار ور.»" | .22 |
| نَعَمان ددي: "بويور ائکي تالانت گؤتور." اونا تأکئد ادئب ائکي تالانت گوموشو ائکي توربايا قويوب باغلادي و ائکي دست پالتارلا بئرلئکده نؤکرلرئندن ائکئسئنه وردی. نؤکرلر گِخَزئنئن قاباغيندا بونلاري داشيديلار. | .23 |
| تپه‌يه چاتاندا گِخَزي شيلري اونلارين اَلئندن آليب اِوئنه قويدو. نؤکرلري گری گؤندردي و اونلار گتدئلر. | .24 |
| سونرا آغاسي اِلئشَعئن يانينا گدئب قاباغيندا داياندي. اِلئشَع اوندان سوروشدو: "هارادان گلئرسن، گِخَزي؟" گِخَزي جاواب وردی: "بو قولون هچ يره گتمه‌دي." | .25 |
| اِلئشَع اونا ددي: "او آدام سني پئشواز اتمک اوچون عاراباسيندان دوشَنده اوره‌يئم مگر اورادا ديئلدي؟ مگر ائندي گوموش گؤتورمک، پالتار، زيتون و اوزوم باغلاري، قويون-کچي، مال-حيوان، نؤکرلر و کنئزلر آلماق واختي‌دير؟ | .26 |
| بونا گؤره ده نَعَمانين جوزامي ابدی اولاراق سنه و سنئن نسلئنه ياپيشاجاق." گِخَزي قار کئمي جوزاملي اولوب اونون حوضوروندان چيخدي. | .27 |
| ← 2Kings 5/25 → |