| ← 1Samuel 7/31 → |
| قئريَت‌يِعه‌رئم اهالئسي گلئب ربّئن سانديغيني آپارديلار. اونو تپه‌ده اولان اَبئنادابين اِوئنه چيخارتديلار و اوغلو اِلعازاري تقدئس اتدئلر کي، ربّئن سانديغينا گودوکچو اولسون. | .1 |
| سانديق قئريَت‌يِعه‌رئمه گلن گوندن چوخ واخت کچدي، ائيئرمي ائل سوردو. بوتون ائسرايئل خالقي رب اوچون حسرت چکئردي. | .2 |
| سَمويئل بوتون ائسرايئللی‌لره خئطاب ادئب ددي: "اگر بوتون قلبئنئزله ربّه دؤنه‌سئنئز، ياد آللاهلاري، عَشتاروت بوتلرئني آتيب، اوره‌يئنئزي ربّه وره‌سئنئز و فقط اونا قوللوق اده‌‌سئنئز، او سئزي فئلئسطلی‌لرئن اَلئندن قورتارار." | .3 |
| او زامان ائسرايئل اؤولادلاري بَعَل و عَشتاروت بوتلرئني آتيب فقط ربّه قوللوق اتدئلر. | .4 |
| سمويئل ددي: "بوتون ائسرايئللی‌لري مئصپا‌يا ييغين و من سئزه گؤره ربّئن حوضوروندا دوعا اده‌جيم." | .5 |
| اونلار مئصپا‌يا ييغيلديلار، سو چکئب ربّئن قاباغينا تؤکدولر و او گون اورادا اوروج توتوب ددئلر: "ربّئن ضئدّئنه گوناه اتمئشئک." سمويئل مئصپادا ائسرايئللی‌لره داورلئک اتدي. | .6 |
| فئلئسطلی‌لر ائسرايئل اؤولادلارينين مئصپادا ييغيلديغيني اشئدنده، فئلئسطلی‌لرئن آغالاري ائسرايئللی‌لرئن ضئدّئنه چيخديلار. ائسرايئل اؤولادلاري بونو اشئدن واخت قورخدولار. | .7 |
| اونا گؤره ده ائسرايئل اؤولادلاري سمويئله ددئلر: "تاريميز ربّه دورمادان يالوار کي، بئزي فئلئسطلی‌لرئن اَلئندن قورتارسين." | .8 |
| سمويئل بئر اَملئک قوزو گؤتوروب اونو بوتؤولوک ربّه يانديرما قورباني تقدئم اتدي. او، ائسرايئل اوچون ربّه يالواردي و رب سمويئله جاواب وردی. | .9 |
| سمويئل يانديرما قورباني ورَرکَن، فئلئسطلی‌لر ياخينلاشيرديلار کي، ائسرايئله هوجوم اتسئنلر. آمّا رب او گون گوجلو سَسله گورلاييب، فئلئسطلی‌لرئن اوستونه ولوله سالدي اله کي، ائسرايئلئن قاباغيندا مغلوب اولدولار. | .10 |
| ائسرايئللی‌لر مئصپا‌دان چيخيب بِيت‌کار آلتينا چاتانا قدر فئلئسطلی‌لري قوووب قيرديلار. | .11 |
| سونرا سمويئل بئر داش گؤتوروب، مئصپا ائله سن آراسينا قويدو و "رب بئزه بورايا قدر کؤمک اتدي" دئيه‌رک بو داشي اِبِنعِزِر آدلانديردي. | .12 |
| بلجه فئلئسطلی‌لر مغلوب اولوب بئر داها ائسرايئل تورپاغينا گلمه‌دئلر. سمويئلئن بوتون عؤمرو بويو ربّئن اَلي فئلئسطلی‌لرئن ضئدّئنه ائدي. | .13 |
| فئلئسطلی‌لرئن ائسرايئلدن آلديقلاري شهرلر، عِقروندان گَته قدر، گری قايتاريلدي. ائسرايئللی‌لر تورپاقلاريني فئلئسطلی‌لرئن اَلئندن قورتارديلار. بلجه ائسرايئللی‌لرله اِمورلولارين آراسيندا صولح ياراندي. | .14 |
| سمويئل عؤمرو بويو ائسرايئله داورلئک اتدي. | .15 |
| او، ائل‌به‌ائل، نؤوبه ائله بِيت ائلي، گئلگالي، مئصپا‌ني گَزئب بو يرلرده ائسرايئله داورلئک ادئردي. | .16 |
| سونرا دا رامايا قاييديردي، چونکي اِوي اورادا ائدي. اورادان دا ائسرايئله داورلئک ادئردي. او همئن يرده ربّه بئر قوربانگاه تئکدي. | .17 |
| ← 1Samuel 7/31 → |