| ← 1Samuel 4/31 → |
| سمويئلئن سؤزو بوتون ائسرايئله ياييلدي. او دؤورده ائسرايئللی‌لر فئلئسطلی‌لرله دؤيوشمک اوچون چيخديلار. ائسرايئللی‌لر اِبِنعِزِرده، فئلئسطلی‌لر ده اَفِقده اوردوگاه قوردولار. | .1 |
| فئلئسطلی‌لر ائسرايئللی‌لرله دؤيوشمک اوچون دوزولدولر. دؤيوش قيزيشاندا ائسرايئللی‌لر فئلئسطلی‌لره مغلوب اولدولار و دؤيوش ميدانيندا دؤرد مئنه ياخين ائسرايئللي قيريلدي. | .2 |
| خالق اوردوگاها قاييدارکَن ائسرايئلئن آغساقّاللاري بئربئرئندن سوروشدولار: "گؤره‌سن رب بو گون بئزي فئلئسطلی‌لر قاباغيندا نه اوچون مغلوب اتدي؟ شئلودان ربّئن عهد سانديغيني يانيميزا گتئرک. قوي آراميزدا اولسون و بئزي دوشمنلرئن اَلئندن قورتارسين." | .3 |
| بلجه خالق شئلويا آدام گؤندردي. کرّوبلار آراسيندا تخت قورموش قوشونلار ربّئن عهد سانديغيني اورادان گتئردئلر؛ عِلي‌نئن ائکي اوغلو خوفني و پئنخاس تارينين عهد سانديغينين يانيندا ائدي. | .4 |
| ربّئن عهد سانديغي اوردوگاها چاتان کئمي بوتون ائسرايئللی‌لر وار گوجلري ائله اِله قيشقيرديلار کي، ير تئتره‌دي. | .5 |
| فئلئسطلی‌لر بو قيشقيريغين گورولتوسونو اشئدنده ددئلر: "عئبرانئلرئن اوردوگاهيندا نئيه بله بؤيوک قيشقيريق و گورولتو وار؟" سونرا بئلدئلر کي، ربّئن سانديغي اوردوگاها گلئب. | .6 |
| فئلئسطلی‌لر قورخوب ددئلر: "تاري اوردوگاها گلئب، واي حاليميزا! چونکي بوندان اوّل بله بئر شي اولماييبدير. | .7 |
| واي حاليميزا! بو قودرتلي آللاهلارين اَلئندن بئزي کئم قورتاراجاق؟ بونلار او آللاهلارديلار کي، صحرادا مئصئرلی‌لره هر جور بلالار وردئلر. | .8 |
| ای فئلئسطلی‌لر، جسور اولون، کئشي کئمي دايانين! يوخسا عئبرانئلر سئزه نجه بويون اَيدئلر، سئز ده اونلارا اِله بويون اَيه‌جکسئنئز! بونا گؤره کئشي کئمي دايانين و دؤيوشون!" | .9 |
| فئلئسطلی‌لر ووروشدولار و ائسرايئل مغلوب اولدو، و هر کس اؤز چاديرينا قاچدي. چوخ بؤيوک قيرغين اولدو و ائسرايئللی‌لردن اوتوز مئن پئيادا هلاک اولدو. | .10 |
| تارينين سانديغي اسئر آپاريلدي و علي‌نئن ائکي اوغلو حوفني و پئنِخاس اؤلدولر. | .11 |
| بئر نفر بِنيامئنلي دؤيوش يرئندن قاچدي و اله همئن گون گلئب شئلويا چاتدي. اونون پالتاري جيريلميش، باشي دا توز-تورپاق ائچئنده ائدي. | .12 |
| باخ، او گلن زامان عِلي کورسو اوستونده اوتوروب يول کناريندا گؤزله‌يئردي و تارينين سانديغيندان اؤتري اوره‌يي چيرپينيردي. بو آدام شهره گئرئب باش ورن حادئثه‌لري دانيشاندا بوتون شهرده شئون قالخدي. | .13 |
| عِلي بو سَسي اشئدنده ددي: "بو نه قيشقيريقدير؟" بو آدام تز گلئب هر شيي عِلئيه ددی. | .14 |
| بو زامان عِلي دوخسان سکّئز ياشيندا ائدي، آرتيق گؤزلري توتولموشدو، گؤرموردو. | .15 |
| همئن آدام عِلئيه ددي: "من دؤيوش ميدانيندان گلمئشم. بو گون دؤيوشدن قاچديم." عِلي سوروشدو: "اوغلوم، نه باش وردي؟" | .16 |
| خبر گتئرن آدام بله جاواب وردی: "ائسرايئللی‌لر فئلئسطلی‌لرئن قاباغيندان قاچيبلار و خالق آراسيندا بؤيوک قيرغين اولوب. ائکي اوغلون حوفني ائله پئنِخاس اؤلوب، تارينين سانديغي دا اسئر آپاريليبدير." | .17 |
| بو آدام تارينين سانديغيندان دانيشان زامان عِلي کورسودن آرخايا، قاپينين يانينا ييخيلدي؛ هم قوجا، هم ده کؤک اولدوغو اوچون بوينو سينيب اؤلدو. او، قيرخ ائل ائسرايئل خالقينا داورلئک اتمئشدي. | .18 |
| عِلئ‌نئن گلئني، يعني پئنِخاسين آروادي بويلو ائدي. دوغما واختي چاتميشدي. تارينين سانديغينين اَله کچئرئلدئيئني، قايين‌آتاسي ائله اَرئنئن اؤلوم خبرئني اشئدن واخت آغريسي توتدو و چؤمبه‌لئب دوغدو. | .19 |
| اؤلوم آياغيندا اورادا دوران آروادلار ددئلر: "قورخما، بئر اوغلون اولدو." آمّا او اعتئنا اتمه‌يئب جاواب ورمه‌دي. | .20 |
| اوغلانين آديني ائکابود قويوب ددي: "جلال ائسرايئلدن گدئب." چونکي تارينين سانديغي اَله کچمئش، قايين‌آتاسي ائله اَري ده اؤلموشدو. | .21 |
| او ددي: "جَلال ائسرايئلدن گدئب، چونکي تارينين سانديغي اسئر آپاريليب." | .22 |
| ← 1Samuel 4/31 → |