1Samuel 25/31   

سمويئل اؤلدو و بوتون ائسرايئل ييغيليب اونون اوچون ياس توتدولار. اونو رامادا، اؤز اِوئنئن يانيندا دفن اتدئلر. داوود دوروب پاران صحراسينا اِندي. .1
ماعوندا بئر آدام ياشاياييردي کي، کَرمِلده مولکو وار ائدي. چوخ دا وارلي بئر آدام ائدي. اونون اوچ مئن باش قويونو، مئن باش دا کچئسي وار ائدي. او، قويونلاريني کَرمِلده قيرخديريردي. .2
بو آدامين آدي نابال، آروادينين آدي دا اَبئگائل ائدي. آرواد آغيلّي و گؤزل ائدي. لاکئن کالئب نسلئندن اولان بو کئشي داش اورَکلي و رفتاريندا پئس ائدي. .3
داوود صحرادا اشئتدي کي، نابالين قويون قيرخيمي وار. .4
او، اون جاوان گؤندرئب اونلارا ددي: "کَرمِله نابالين يانينا گدئن و مندن اونا سالام ديئن. .5
اونا ديئن: «عؤمرون اوزون اولسون، سن و اِو اهلئن سالامات اولسون، سنئن اولان بوتون شيلر سالامات اولسونلار! .6
اشئتمئشم کي، ائندي سئزده يون قيرخيمي‌دير. سنئن چوبانلارين بئزئم يانيميزدا اولاندا بئز اونلاري ائنجئتمه‌دئک و کَرمِلده قالديقلاري گونلر عرضئنده هچ نه‌لري ده اَسکئلمه‌دي. .7
بونو اؤز نؤکرلرئندن ده سوروشا بئلرسن و اونلار دا سنه دئيَرلر. قوي آداملاريم سنئن گؤزونده لوطف تاپسين، چونکي يانينا بايرام زاماني گلمئشئک. خاهئش ادئرم کي، قوللارينا و اوغلون داوودا اَلئنده اولانيندان ور.»" .8
داوودون آداملاري گلئب بوتون بو سؤزلري داوودون آديندان نابالا ديئب گؤزله‌دئلر. .9
آمّا نابال داوودون آداملارينا بله جاواب وردی: "بو داوود دا کئم؟ يَسّه اوغلو دا کئم؟ بو گونلرده بئر چوخ نؤکر آغالاريني بوراخيب گدئر. .10
چؤره‌يئمي، سويومو و قيرخينچيلار اوچون کَسدئيئم حيوانلارين اَتئني گؤتوروب او آداملارا ورئم کي، هارادان اولدوقلاريني بئلمئرم؟" .11
داوودون آداملاري اؤز يوللاري ائله گِرئيه قاييتديلار و گلئب بو سؤزلرئن هاميسيني داوودا ددئلر. .12
داوود آداملارينا ددي: "هامي قيلينجيني باغلاسين." هر کس قيلينجيني باغلادي. داوود دا قيلينجيني باغلادي. دؤرد يوز نفر داوودون دالينجا گتدي و ائکي يوز نفر ده اَسبابلارين يانيندا قالدي. .13
نابالين نؤکرلرئندن بئري اونون آروادي اَبئگائله خبر وردی: "باخ، داوود آغاميزي سالاملاماق اوچون صحرادان قاصئدلر گؤندردي، آمّا آغاميز اونلارا اهانت اتدي. .14
آمّا بو آداملار بئزه چوخ ياخشيليق اتدئلر و بئزي ائنجئتمه‌‌دئلر. چؤلده اولدوغوموز زامان، اونلارلا گَزدئيئمئز بوتون گونلر عرضئنده هچ نه‌يئمئز اَسکئلمه‌‌دي. .15
قويونلاري اوتارارکن يانلاريندا اولدوغوموز گونلر گجه و گوندوز بئزه حاصار اولدولار. .16
آمّا ائندي باخ، نه اده‌جيئني دوشون، چونکي پئسلئک آغاميز و اونون بوتون عايئله‌سئنئن ضئدّئنه قرار ورئلئر. نابال دا اِله دَيَرسئز آدامدير کي، اونا هچ کس بئر سؤز دئيه بئلمئر." .17
او واخت اَبئگائل جَلد تَرپه‌نئب، ائکي يوز کؤمبه چؤرک و ائکي تولوق شراب حاضيرلادي. حاضيرلانميش بش قويون، بش اؤلچو قووورغا، يوز سالخيم قورو اوزوم و ائکي يوز پارچا باسيلميش انجئر لاواشاسي گؤتوروب اِششَکلره يوکله‌دي. .18
سونرا نؤکرلرئنه ددي: "سئز قاباقدا گدئن، من آرخانيزدان گلئرم." لاکئن بو باره‌ده اَري نابالا هچ نه بئلدئرمه‌دي. .19
اَبئگائل اِششه‌يه مئنئب داغين باغلي طرفئندن اِنَرکَن داوود دا آداملاري ائله اورايا اِنمَکده ائدي و آرواد اونلارلا راستلاشدي. .20
داوود دمئشدي: "دوغرودان دا، عبث يره بو آدامين چؤلده اولان بوتون ماللاريني قورودوم کي، اونون هچ نه‌يي اَسکئلمه‌سئن. او منه ياخشيليغيمين عوضئنده پئسلئک اتدي. .21
اگر سحره‌جک اونون بوتون مالئک اولدوقلاريندان بئر کئشي بِله، صاغ بوراخسام، قوي تاري دا داوودون دوشمنلرئنه بِله‌سئني و بوندان دا بَتَرئني اتسئن." .22
اَبئگائل داوودو گؤرجک جَلد اِششَکدن دوشدو و داوودون قاباغيندا اوزونو يره قويوب تعظئم اتدي. .23
سونرا اونون آياقلارينا دوشوب ددي: "ای آغام، بو گوناهي منئم اوستومه قوي. ائجازه ور کي، کنئزئن سنئنله دانيشسين. کنئزئنئن سؤزلرئنه قولاق آس. .24
خاهئش ادئرم آغام نابالين، بو دَيَرسئز آدامين آجيغيني قلبئنه سالماسين، چونکي آدي نجه‌دئر، اؤزو ده اِله‌دئر. آدي نابال اولدوغو کئمي اؤزو ده آخماقدير. ای آغام، من کنئزئن آغامين گؤندردئيي آداملاري گؤرمه‌‌دئم. .25
مادام کي، رب سني ائندي قانا باتماقدان و اؤز اَلئنله قئصاص آلماقدان ساخلادي، وار اولان ربّه و جانينا آند اولسون، آغامين دوشمنلري و بدخاهلاري نابال کئمي اولسون. .26
لاکئن ائندي ائجازه ور، کنئزئنئن آغاما گتئردئيي بو هدئيّه‌لر آرخانجا گلن جاوانلارا ورئلسئن. .27
يالواريرام، کنئزئنئن گوناهيني باغيشلا، چونکي رب قطعن آغاما برقرار بئر نسئل ياراداجاق، اونا گؤره کي، آغام ربّئن دؤيوشلرئني ادئر و عؤمرون بويو سنده شر تاپيلماياجاق. .28
کئمسه قالخيب سني قووماق و جا‌نيني آلماق ائسته‌يئنده آغامين جا‌نيني رب تاري حيات ائچئنده ساخلاياجاق، لاکئن سنئن دوشمنلرئنئن جانيني ساپاندين اورتاسيندان آتيلان داش کئمي آتاجاقدير. .29
رب آغاما ددئيي ياخشيليقلارين هاميسيني حياتا کچئردنده و سني ائسرايئله حؤکمدار ادنده، .30
آغام ناحاق قان تؤکوب اؤزو اوچون قئصاص آلديغينا گؤره پشمان اولماياجاق، وئجدان عذابي دا چکميه‌جک. رب آغاما ياخشيليق ادنده کنئزئني ده يادا سال." .31
داوود اَبئگائله ددي: "ائسرايئلئن تاريسي رب موبارک اولسون کي، بو گون سني منئم پئشوازيما گؤندردي. .32
بصئرتئن موبارک اولسون، موبارک اولاسان کي، بو گون منی قان تؤکمَکدن و اَلئمله اؤز قئصاصيمي آلماقدان ساخلادين. .33
حقئقتن، منی سئزه پئسلئک اتمکدن سن ساخلادين، ائسرايئلئن تاريسي وار اولان ربّه آند اولسون، اگر جَلد تَرپه‌نئب منئم قاباغيما چيخماسايدين، قطعن سحر ائشيغينا قدر نابالين کئشئلرئندن بئري ده صاغ قالماياجاق ائدي." .34
داوود اونون گتئردئيي شيلري اَلئندن آليب ددي: "اِوئنه سالامات گت، باخ، سنئن سؤزونه باخيب خاهئشئني يرئنه يتئردئم." .35
او واخت اَبئگائل نابالين يانينا گلدي. نابالين اِوئنده پادشاه ضئيافتئنه اوخشار بئر ضئيافت کچئردي. نابال کفلي اولدوغونا گؤره گؤيلو نشعه‌لي ائدي. اونا گؤره ده سحر آچيلانا قدر اَبئگائل اونا هچ نه بئلدئرمه‌دي. .36
سحر آچيلاندا، نابال شرابدان آييلان کئمي آروادي باش ورن حادئثه‌لري اونا دانيشدي و نابالين اوره‌يي اوزولدو، بدني داشا دؤندو. .37
تخمئنن اون گوندن سونرا رب نابالي ووردو و او، اؤلدو. .38
داوود نابالين اؤلدويونو اشئدنده ددي: "رب موبارک اولسون کي، نابالين اتدئيي اهانتي گؤروب داعوامي او اتدي و قولونون اَلئني پئسلئکدن ساخلادي. رب نابالين پئسلئيئني اؤز باشينا گتئردي." داوود اَبئگائله اِلچي گؤندرئب اونو اؤزونه آرواد ائسته‌دي. .39
داوودون اِلچئلري کَرمِله، اَبئگائلئن يانينا گلئب ددئلر: "داوود بئزي اِلچي گؤندرئب کي، سني اؤزونه آرواد ائسته‌سئن." .40
اَبئگائل قالخيب يره‌جک تعظئم ادئب ددي: "باخ، کنئزئن آغامين قوللارينين آياقلاريني يوماق اوچون بئر کنئزدئر." .41
او جَلد قالخيب اِششه‌يه مئندي. اونا خئدمت ادن بش جاوان آروادي يانينا آليب داوودون قاصئدلرئنئن دالينجا گتدي و داوودون آروادي اولدو. .42
داوود يِزرِعِللي اَخئنوعَمي ده آلميشدي. هر ائکئسي اونون آروادي اولدولار. .43
آمّا شاعول، قيزي مئکَلي کي، داوودون آروادي ائدي، گلّئملي لايئش اوغلو پَلطئيه اَره ورمئشدي. .44

  1Samuel 25/31