1Samuel 17/31

← 1Samuel 17/31 →

فئلئسطلی‌لر موحارئبه اوچون قوشونلاريني ييغيب يهودانين سوکو شهرئنده جَملَشدئلر. و اِفِس‌دَمئمده اوردوگاه قوردولار کي، سوکولا عَزِقا شهري آراسيندادير.

شاعوللا ائسرايئللی‌لر ييغيليب اِلا دره‌سئنده اوردوگاه قوردولار و فئلئسطلی‌لرئن ضئدّئنه دؤيوش اوچون دوزولدولر.

فئلئسطلی‌لر بئر تپه‌نئن اوستونده، ائسرايئللی‌لر ده او بئري تپه‌ده دايانميشديلار، آرالاريندا دره وار ائدي.

گَت شهرئندن اولان گوليات آدلي بئر قهرمان فئلئسطلی‌لرئن اوردوگاهيندان ائره‌لي چيخدي. اونون بويو آلتي قول‌آچ بئر قاريش ائدي.

باشيندا بورونج دَبئلقه‌سي واردي، اَينئنه بش مئن شِکِل آغيرليغيندا بورونجدن پوللي زئرِه گِيمئشدي.

بالديرلارينا بورونج زئرِه تاخميشدي و کوره‌يئنده ده بورونج مئزراق واردي.

نئزه‌سئنئن تاختاسي توخوجو دَزگاهينين تئري کئمي ائدي، اونون دمئر اوجو دا آلتي يوز شِکِل آغيرليغيندا ائدي. سئپر داشييان سئلاحداري دا اونون قاباغيندا گدئردي.

گوليات ائسرايئل فوجلارينين موقابئلئنده دايانيب قيشقيرا-قيشقيرا ددي: "نئيه دؤيوشه چيخيب دوزولوبسونوز؟ مگر من فئلئسطلي، سئز ده شاعولون قوللاري ديئلسئنئز؟ آرانيزدان بئر کئشي سچئن، قويون يانيما گلسئن.

اگر منئمله ووروشا بئلئب منی اؤلدورسه، اوندا بئز سئزه قول اولاريق، يوخ اگر من اونو ووروب اؤلدورسَم، اوندا سئز بئزه قول اولوب قوللوق اده‌جکسئنئز."

فئلئسطلي گئنه ددي: "بو گون من ائسرايئل فوجلارينا ميدان اوخويارام. منئم قاباغيما تک‌به‌تک ووروشماق اوچون بئر کئشي چيخاردين!"

.10

شاعول و بوتون ائسرايئللی‌لر، فئلئسطلي‌نئن بو سؤزلرئني اشئدن واخت، واهئمه‌يه دوشوب چوخ قورخدولار.

.11

داوود يهودانين بِيت‌لِخِم شهرئندن اولان يَسّه آدلي بئر اِفراتلينين اوغلو ائدي. يَسّه‌نئن سکّئز اوغلو وار ائدي. شاعولون دؤورونده يَسّه قوجاليب ياشلانميشدي.

.12

اونون اوچ بؤيوک اوغلو شاعولون دالينجا دؤيوشه گتمئشدئلر. دؤيوشه گدن اوچ اوغلونون آدي بله ائدي: ائلک دوغولاني اِلئآب، ائکئنجئسي اَبئناداب و اوچونجوسو شَمّا.

.13

داوود يَسّه‌نئن لاپ کئچئک اوغلو ائدي. اوچ بؤيوک اوغلو شاعولون دالينجا گدئردي.

.14

لاکئن داوود آتاسينين سوروسونو اوتارماق اوچون شاعولون يانيندان بِيت‌لِخِمه گدئب گلردي.

.15

فئلئسطلي گوليات قيرخ گون سحر-آخشام گلئب ائسرايئللی‌لره ميدان اوخودو.

.16

بئر گون يَسّه، اوغلو داوودا ددي: "ائندي قارداشلارين اوچون بو بئر اِفا قووورغا و اون کؤمبه چؤره‌يي گؤتور، اوردوگاها، قارداشلارينين يانينا تَلَسئک گت.

.17

بو اون تئکه پِندئري ده مئنباشي اوچون گؤتور، اوندان قارداشلارينين حال-احواليني سوروش و منه اونلاردان بئر خبر گتئر."

.18

داوودون قارداشلاري، شاعول، و بوتون ائسرايئللی‌لر ائلاه دره‌سئنده فئلئسطلی‌لرله دؤيوشده ائدئلر.

.19

داوود سحر تزدن دوروب قويونلاريني چوبانا تاپشيردي و يَسّه‌نئن بويوردوغو کئمي ارزاقلاري گؤتوروب گتدي. او، اوردوگاها گلن زامان قوشون دؤيوش ميدانينا چيخيردي و نعره چکه‌رک دؤيوشه دوزولوردو.

.20

ائسرايئللی‌لرله فئلئسطلی‌لر دؤيوشمک اوچون اوز-اوزه دايانديلار.

.21

داوود گتئردئيي شيلري لوازئمات کشئکچئسئنه وردی و اؤزو جبهه‌يه قاچدي و قارداشلارينين يانينا گلئب اونلاري سالاملادي.

.22

داوود اونلارلا صؤحبت اِدَرکَن، فئلئسطلی‌لرئن گَت شهرئندن اولان گوليات آدلي قهرمان، اؤز فوجلارينين آراسيندان ائره‌لي چيخيب گئنه اوّلکي کئمي سؤزلر ددی. داوود بونلاري اشئتدي.

.23

بوتون ائسرايئللی‌لر بو آدامي گؤرنده، اونون قاباغيندان قاچديلار و چوخ قورخدولار.

.24

ائسرايئللی‌لر ددئلر: "قاباغا چيخان بو آدامي گؤرورسونوز؟ دوغرودان دا، او، ائسرايئله ميدان اوخوماغا چيخير. کئم اونو اؤلدورسه، پادشاه اونو وار-دؤولته چاتديراجاق، قيزيني اونا وره‌جک و آتاسينين عايئله‌سئني ائسرايئلده‌کي ورگئدن آزاد اده‌جک."

.25

داوود يانينداکي آداملارلا دانيشيب ددي: "بو فئلئسطلئني اؤلدوروب ائسرايئلي بو خجالتدن قورتاران آداما نه ادئله‌جک؟ چونکي بو ختنه‌سئز فئلئسطلي کئمدئر کي، وار اولان تارينين قوشونلارينا ميدان اوخوسون؟"

.26

خالق بو سؤزه موطابئق اونا جاواب ورئب ددئلر: "اونو اؤلدورَن آداما بله ادئله‌جک."

.27

داوود آداملارلا دانيشارکَن، لاپ بؤيوک قارداشي اِلئآب اونون سَسئني اشئتدي و قضبدن آلوولانيب ددي: "سن نئيه آشاغي اِنئبسن؟ چؤلده‌کي بئر نچه قويونوموزو کئمه تاپشيريبسان؟ بئلئرم، سنئن تکَبّوروندن و‌ اوره‌يئنئن پئس نئيّتئندن خبرئم وار، چونکي بورايا دؤيوشه تاماشا اتمک اوچون گلئبسن."

.28

آمّا داوود ددي: "ائندي مگر نه اتمئشم؟ يعني دانيشا دا بئلمه‌رم؟"

.29

داوود اورادان دؤنوب آيري بئرئندن سوروشدو و خالق اونا گئنه ده اوّلکي کئمي جاواب ورئب هَمن سؤزلري ددی.

.30

داوودون بو سؤزلرئني اشئدنلر، بونو شاعولا چاتديرديلار. شاعول اونو يانينا چاغيرتديردي.

.31

داوود شاعولا ددي: "بو آدامدان اؤتري هچ کئم اوره‌يئني اوزمه‌سئن. سنئن قولون گدئب او فئلئسطلي ائله ووروشاجاق."

.32

شاعول داوودا ددي: "بو فئلئسطلي ائله ووروشماغا سنئن گوجون چاتماز، چونکي سن حله جاوانسان، او آمّا جاوانليغيندان دؤيوشچودور."

.33

داوود شاعولا ددي: "سنئن قولون آتاسينين قويونلاريني اوتاريردي. آصلان يا دا آيي گلئب سورودن بئر قوزو گؤتورَنده

.34

من اونون دالينجا گدئب اونا هوجوم اِدَردئم و قوزونو آغزيندان قورتارارديم. اگر اوستومه آتيلاردي، من بوغازينين توکلرئندن توتاراديم و يره چيرپيب اؤلدورَردئم.

.35

بو قولون هم آصلان، هم ده آيي اؤلدوروب، بو ختنه‌سئز فئلئسطلي ده اونلاردان بئري کئمي اولاجاق، چونکي او، وار اولان تارينين فوجلارينا ميدان اوخويوب."

.36

داوود سؤزونه داوام وردی: "منی آصلان پنجه‌سئندن، آيي پنجه‌سئندن قورتاران رب بو فئلئسطلي‌نئن ده اَلئندن قورتاراجاق." شاعول داوودا ددي: "گت، رب سنه يار اولسون!"

.37

شاعول اؤز پالتارلاريني داوودا گِيئندئردي و باشينا بورونج دَبئلقه قويوب اَينئنه زئرِه گِيئندئردي.

.38

داوود بو زئرِهئن اوستوندن قيلينج تاخيب يِرئمَيه چاليشدي، چونکي اونا آليشماميشدي. سونرا داوود شاعولا ددي: "بونلارا آليشماديغيم اوچون يِرئيه بئلمئرم." و اونلاري اَينئندن چيخارتدي.

.39

اَلئنه دَيَنه‌يئني گؤتوروب، چايدان اؤزونه بش هامار داش سچدي و اونلاري اوستونده‌کي چوبان تورباسينين جئبئنه قويوب اَلئنده ساپاند، فئلئسطلئيه ياخينلاشدي.

.40

فئلئسطلي ائره‌لي گلئب داوودا ياخينلاشدي. سئپر داشييان نؤکري اونون قاباغيندا ائدي.

.41

نظر ساليب داوودو گؤرنده اونا اهانتله باخدي. چونکي داوود جاوان، آل‌ياناق و اوزو گؤيچک ائدي.

.42

فئلئسطلي داوودا ددي: "مگر من ائتَم کي، اوستومه دَيَنَکلرله گلئرسن." فئلئسطلي اؤز آللاهلاري ائله داوودو لعنتله‌دي،

.43

و ددي: "يانيما گل، سنئن اَتئني گؤيده‌کي قوشلارا و چؤلده‌کي حيوانلارا وره‌جيم."

.44

او واخت داوود فئلئسطلئيه ددي: "سن منئم اوستومه قيلينج، نئزه و مئزراقلا گلئرسن، لاکئن من سنئن اوستونه سؤيدويون ائسرايئل فوجلارينين تاريسي قوشونلار ربّئن آدي ائله گلئرَم.

.45

بو گون رب سني منه تسلئم اده‌جک و من سني اؤلدوره‌جيم. باشيني بدنئندن آييراجاغام. بو گون فئلئسطلي قوشونونون لِشلرئني گؤيده‌کي قوشلارا و يرده‌کي حيوانلارا وره‌جيم کي، بوتون دونيا بئلسئن کي، ائسرايئلده بئر تاري وار.

.46

بوتون بو جاماعات دا بئله‌جک کي، رب قيلينج يا دا نئزه ائله خئلاص اتمَز، چونکي بو دؤيوش ربّئندئر و او سئزي بئزئم اَلئمئزه وره‌جک."

.47

فئلئسطلي داوودون قاباغينا چيخماق اوچون دوروب ياخينلاشاندا، داوود جَلد اونو قاباقلاييب فئلئسطلي فوجلارينا طرف قاچدي.

.48

داوود اَل آتيب تورباسيندان بئر داش گؤتوردو، ساپاندلا فيرلاديب فئلئسطلي‌نئن آلنيندان ووردو. داش اونون آلنينا باتدي و او، اوزو اوسته يره ييخيلدي.

.49

داوود فئلئسطلئني بئر ساپاند، بئر داشلا مغلوب اتدي و اونو ووروب اؤلدوردو. داوودون اَلئنده هچ قيلينج يوخ ائدي.

.50

او قاچيب بو فئلئسطلي‌نئن اوستوده دوردو. فئلئسطلي‌نئن قيلينجي گؤتوردو، قينيندان چکئب اونو اؤلدوردو و بو قيلينجلا اونون باشيني کَسدي. فئلئسطلی‌لر اؤز قهرمانلارينين اؤلدورولدويونو گؤرنده قاچديلار.

.51

ائسرايئللی‌لرله يهودالي‌لار دا قالخيب نعره چکدئلر و فئلئسطلی‌لري گَتئن گئرئشئنه و عِقرونون دروازالارينا چاتانا قدر قوودولار. فئلئسطلی‌لردن اؤلَنلر شَعه‌رئم يولو بويو گَتئن و عِقرونا قدر يره سَرئلمئشدئلر.

.52

ائسرايئل اؤولادلاري فئلئسطلی‌لري آرخادان قوواندان سونرا قاييديب اونلارين اوردوگاهيني تالان اتدئلر.

.53

داوود گولياتين باشيني گؤتوروب اورشلئمه گتئردي، لاکئن سئلاحيني اؤز چاديرينا قويدو.

.54

شاعول داوودون فئلئسطلي‌نئن ضئدّئنه چيخديغيني گؤرَن زامان، قوشون باشچيسي آبنِره ددي: "آبنِر، بو جاوان کئمئن اوغلودور؟" آبنِر ده ددي: "پادشاه صاغ اولسون، بئلمئرم."

.55

پادشاه ددي: "سوروش گؤر، بو جاوان کئمئن اوغلودور."

.56

داوود گولياتي اؤلدوروب قاييداندان سونرا، آبنِر اونو گؤتوروب شاعولون حوضورونا گتئردي. فئلئسطلي‌نئن باشي اونون اَلئنده ائدي.

.57

شاعول اوندان سوروشدو: "ای جاوان، کئمئن اوغلوسان؟" داوود جاواب وردی: "قولون بِيت‌لِخِملي يَسّه‌نئن اوغلويام."

.58

← 1Samuel 17/31 →