←  1Kings 3/22   →

---

سوليمان مئصئر پادشاهي فئرعونلا موتّفئق اولوب قيزيني آرواد آلدي. فئرعونون قيزيني داوودون شهرئنه گتئردي و اؤز ساراييني، ربّئن معبدئني و اورشلئمئن اطرافينداکي دوواري تئکئب قورتارانا قدر، اونو اورادا ساخلادي.

.1

لاکئن خالق حله ده پرستئشگاهلاردا قوربان تقدئم ادئردئلر، چونکي او گونلره قدر ربّئن آدينا تئکئلمئش بئر معبد يوخ ائدي.

.2

سوليمان ربّی سِوئردي و آتاسي داوودون قايدالارينا موطابئق ياشاييردي، آنجاق پرستئشگاهلاردا دا قوربان تقدئم ادئب، بوخور يانديريردي.

.3

پادشاه قوربان تقدئمي اوچون گئبعونا گتدي، چونکي اورا پرستئشگاهلارين لاپ بؤيوکو ائدي. سوليمان او قوربانگاهدا مئن باش يانديرما قورباني تقدئم اتدي.

.4

گئبعوندا رب سوليمانا گجه يوخوسوندا گؤروندو. تاري ددي: "نه ائسته‌يئرسن، سنه ورئم؟"

.5

سوليمان ددي: "سن قولون آتام داوودا بؤيوک شفقت گؤرسدئبسن، چونکي او سنئن حوضوروندا صداقت، صالحلئک، و اورک دوغرولوغو ائله ياشادي. بو گون ده تختئنده اوتوران بئر اوغول ورمکله اونا اؤز بؤيوک مهرئبانليغيني ساخلاييبسان.

.6

ائندي، يارب تاريم، بو قولونو آتام داوودون يرئنه پادشاه ادئبسن حال بو کي، من کئچئک بئر اوشاغام، نه ادئب-اتمه‌جيئمي بئلمئرم.

.7

قولون سنئن سچدئيئن خالقين آراسيندادير؛ اله بؤيوک بئر خالق کي، ساييسيز-حسابسيزدير.

.8

بونا گؤره منه اله بئر درّاکه‌لي اورک ور کي، ياخشي ائله پئسي آييرد ادئب سنئن خالقينا حؤکم اده بئلئم. چونکي سنئن بو بؤيوک خالقينا کئم حؤکم اده بئلر؟"

.9

سوليمانين بو ائسته‌يي ربّئن گؤزونه خوش گلدي.

.10

تاري اونا ددي: "چونکي بونو ائسته‌دئن و اؤزون اوچون اوزون عؤمور، وار-دؤولت، يا دا دوشمنلرئنئن جا‌نيني ائستمه‌دئن، بونلارين يرئنه درّاکه ائسته‌دئن کي، عدالتي آييرد اده‌سن،

.11

باخ، من ائسته‌يئني يرئنه يتئرمئشم: باخ، سنه اله بئر حئکمتلي و درّاکه‌لي اورک ورمئشم کي، سنئن کئمئسي نه سندن اوّل اولموش، نه ده سندن سونرا اولاجاق.

.12

سنه ائستمه‌دئيئني ده ورمئشم؛ هم وار-دؤولتي، هم ده جاه-جلالي. بله کي بوتون عؤمرون بويو پادشاهلار آراسيندا سنئن کئمئسي اولماياجاق.

.13

اگر سن آتان داوود کئمي قايدالاريما و امرلرئمه عمل ادئب يوللاريملا گده‌سن، او زامان عؤمرونو اوزاداجاغام."

.14

سوليمان اوياندي. گؤردو کي، بو، بئر يوخو ائدي. اورشلئمه گلدي و ربّئن عهد سانديغينين قاباغيندا دوروب، يانديرما و باريش قوربانلاري تقدئم اتدي و بوتون اعيانلاري اوچون ضئيافت وردی.

.15

بئر گون ائکي فاحئشه آرواد گلئب پادشاهين حوضوروندا دوردولار.

.16

آروادلاردان بئري ددي: "آي آغام! من و بو آرواد بئر اِوده ياشاييريق. بو آرواد اِوده اولارکن بئر اوشاق دوغدوم.

.17

دوغدوغوم گوندن اوچ گون سونرا بو آرواد دا بئر اوشاق دوغدو. اِوده فقط ائکئمئز ائدئک. بئزدن آيري هچ کس يوخ ائدي.

.18

گجه‌نئن عرضئنده بو آروادين اوغلو اؤلدو، چونکي آرواد يوخودا اونون اوستونه دوشدو.

.19

سنئن بو کنئزئن يوخودا ائکن، گجه ياريسي بو آرواد قالخيب اوغلومو يانيمدان گؤتوردو و اؤز قوينونا آليب، اؤلو اوغلونو منئم قوينوما قويدو.

.20

سحر اوغلومو اَمئزدئرمک اوچون دوراندا گؤردوم کي، او اؤلوب. آمّا سحر دئقّتله باخاندا بئلدئم کي، بو منئم دوغدوغوم اوشاق ديئل."

.21

سونرا او بئري آرواد ددي: "يوخ، صاغ اولان اوشاق منئم اوغلومدور و اؤلَن سنئنکي‌دئر." لاکئن بئرئنجي آرواد ددي: "يوخ، اؤلَن اوشاق سنئن اوغلوندور، صاغ اولان منئمکي‌دئر." پادشاهين حوضوروندا اونلار بلجه موباحئثه ادئردئلر.

.22

او واخت پادشاه ددي: "بئري ديئر، صاغ اولان اوشاق منئم اوغلومدور، اؤلَن سنئنکي‌دئر؛ او بئري ده ديئر، يوخ! اؤلَن اوشاق سنئن اوغلوندور، صاغ اولان منئمکي‌دئر."

.23

پادشاه ددي: "منه بئر قيلينج گتئرئن!" پادشاهين حوضورونا بئر قيلينج گتئردئلر.

.24

پادشاه ددي: "صاغ اولان اوشاغي ائکي يره بؤلون، ياريسيني بئرئنه، ياريسيني دا او بئرئنه ورئن!"

.25

اوغلو صاغ اولان آرواد، بالاسي اوچون اوره‌يي يانديغينا گؤره، پادشاها بله ددي: "آمان، آغام، صاغ اولان اوشاغي اونا ورئن، اوشاغي اؤلدورمه‌يئن." لاکئن او بئري ددي: "قوي نه اونون اولسون، نه منئم. بؤلون."

.26

او واخت پادشاه ددي: "صاغ اولان اوشاغي بئرئنجي آروادا ورئن، اونو اؤلدورمه‌يئن، اوشاغين آناسي اودور."

.27

بوتون ائسرايئللی‌لر پادشاهين وردئيي حؤکمو اشئدئب اونا چوخ حؤرمت اتدئلر، چونکي گؤردولر کي، عدالته عمل اتمک اوچون اوندا تارينين حئکمتي وار.

.28

---

←  1Kings 3/22   →