1Kings 2/22

← 1Kings 2/22 →

داوودون اؤلوم گونو ياخينلاشاندا، اوغلو سوليمانا وصئيّت ادئب ددي:

"بو ياخينلاردا من ده هامي کئمي دونيادان گده‌جيم. بونا گؤره مؤحکم و ائگئد اول.

تارين ربّئن طلب اتدئکلرئني يرئنه يتئر: اونون يولو ائله گت. اونون قايدالارينا، امرلرئنه، حؤکملرئنه و شهادتلرئنه، موسانين شرئعت کئتابيندا يازيلديغي کئمي، عمل ات کي، اتدئيئن هر ائشده و گتدئيئن هر يرده اوغور قازاناسان.

او واخت رب منه وردئيي بو سؤزو يرئنه يتئره‌جک: «اگر اؤولادلارين اؤز يوللارينا دئقّت اتسه‌لر، بوتون اورکلري و جانلاري ائله منئم حوضورومدا حقئقتله يِرئسه‌لر، ائسرايئل تختئنده سنئن نسلئندن بئر کئشي اَسکئک اولماياجاق.»

سن صِرويا اوغلو يوآبين منه نه اتدئيئني ده بئلئرسن: ائسرايئل قوشونونون ائکي باشچيسي نِر اوغلو آبنِرله يِتِر اوغلو عَماساني اؤلدوروب، صولح زاماني حرب قاني تؤکدو و بِلئنده‌کي کمرله آياغينداکي چاريقلاري قانا بولاشديردي.

سن اؤز حئکمتئنه گؤره رفتار ات، قويما اونون آغارميش باشي اؤلولر دئيارينا سالامات ائچئنده اِنسئن.

لاکئن گئلعادلي بَرزئل‌له‌يئن اوغوللارينا محبّت ات، قوي سوفرَنده يمک يئيَنلر آراسيندا اولسونلار. چونکي من قارداشين اَبشالومون قاباغيندان قاچديغيم واخت، اونلار منه کؤمک اتدئلر.

باخ، بَخورئمدن اولان بِنيامئنلي گِرا اوغلو شئمعي سنئن يانيندادير. او ائدي کي، مَخه‌نايئمه گتدئيئم گون منه برک لعنت اتدي. لاکئن سونرا منی پئشواز اتمک اوچون اوردون چايينا گلنده، من اونا ربّئن حاقّي اوچون آند ائچئب ددئم: «سني قيلينجلا اؤلدورميه‌جيم.»

ائندي اونو جزاسيز قويما، چونکي سن حئکمتلي آدامسان و اونا نه اده‌جيئني بئلئرسن و اونون آغارميش باشيني قان ائچئنده اؤلولر دئيارينا اِندئرَرسن."

داوود اؤلوب آتالاري ائله ياتدي و داوودون شهرئنده باسديريلدي.

.10

داوودون ائسرايئل اوستونه پادشاهليق اتمه‌سي قيرخ ائل سوردو: يدّي ائل خِبروندا و اوتوز اوچ ائل ده اورشلئمده پادشاهليق اتدي.

.11

سوليمان، آتاسي داوودون تختئنده اوتوردو و اونون پادشاهليغي مؤحکم بئر شکئلده برقرار اولدو.

.12

خَگّئت اوغلو اَدونئيا سوليمانين آناسي بَتشِبَعئن يانينا گتدي. بَتشِبَع اوندان سوروشدو: "آيا خيئرله گلئرسن؟" اَدونئيا جاواب وردی: "بلی."

.13

سونرا ددي: "سنه دئيه‌جک سؤزوم وار." بَتشِبَع ددي: "دِه."

.14

اَدونئيا ددي: "سن بئلئرسن کي، پادشاهليق منئم ائدي و بوتون ائسرايئل منئم پادشاه اولاجاغيمي گؤزله‌يئردي، آمّا هر شي دَيئشدي، پادشاهليق قارداشيمين اَلئنه کچدي، چونکي ربّئن طرفئندن اونون ائدي.

.15

ائندي سندن بئر خاهئشئم وار، منه «يوخ» دِمه". بَتشِبَع اونا ددي: "دِه."

.16

او ددي: "خاهئش ادئرم، سوليمان پادشاهلا دانيش، او سنه «يوخ» دِمَز، اونا ده کي، شونِملي اَبئشَگي منه آرواد اولماق اوچون ورسئن."

.17

بَتشِبَع ددي: "ياخشي، من سنئن حاقّيندا پادشاهلا دانيشارام."

.18

بَتشِبَع سوليمان پادشاهين يانينا گتدي کي، اَدونئيا باره‌ده اونونلا دانيشسين. پادشاه اونون پئشوازينا آياغا قالخدي و اونا تعظئم اتدي، سونرا تختئنه اوتوردو. پادشاه آناسي اوچون ده بئر تخت قويدوردو. او دا پادشاهين ساغيندا اوتوردو.

.19

سونرا ددي: "منئم سندن کئچئک بئر خاهئشئم وار، منه «يوخ» دِمه." پادشاه اونا ددي: "سوروش آنام، من سنه «يوخ» دِمه‌رم."

.20

بَتشِبَع ددي: "قوي شونِملي اَبئشَگ قارداشين اَدونئيايا آرواد اولماق اوچون ورئلسئن."

.21

سوليمان پادشاه آناسينا جاواب ورئب ددي: "نئيه شونِملي اَبئشَگي اَدونئيا اوچون ائسته‌يئرسن؟ پادشاهليغي دا اونون اوچون ائسته، او منئم بؤيوک قارداشيمدير، اونا، کاهئن اِبياتارا، صِرويا اوغلو يوآبا!"

.22

سوليمان پادشاه ربّئن حاقّي اوچون آند ائچئب ددي: "اگر اَدونئيا بو سؤزو اؤز حياتي باهاسينا دِمه‌مئشسه، تاري منه بله و بوندان بَتَرئني اتسئن.

.23

ائندي منی مؤحکملَندئرئب آتام داوودون تختئنده اوتورتموش و ددئيي کئمي منه بئر اِو قورموش وار اولان ربّه آند اولسون کي، اَدونئيا قطعن بو گون اؤلدوروله‌جک!"

.24

سوليمان پادشاه يِهوياداع اوغلو بِنايايا امر اتدي. بِنايا دا گدئب اَدونئياني ووردو و او اؤلدو.

.25

پادشاه، کاهئن اِبياتارا ددي: "عَناتوتا، اؤز زَمئلرئنه گت! سن اؤلومه لايئقسن، آمّا بو گون سني اؤلدورميه‌جيم، چونکي سن آتام داوودون قاباغيندا پروردئگار ربّئن سانديغيني داشيدين و آتامين چکدئيي هر عذابي سن ده چکدئن."

.26

بلجه سوليمان اِبياتاري ربّئن کاهئنلئيئندن قوودو. بونونلا دا ربّئن شئلودا عِلي‌ اِوئنئن ضئدّئنه ددئيي سؤز يرئنه يتئشدي.

.27

خبر يوآبا چاتدي. يوآب اَبشالوما قوشولماديغي حالدا، اَدونئيانين طرفئني توتموشدو. بونا گؤره ده او، ربّئن عئبادت چاديرينا قاچدي و قوربانگاهين بوينوزلاريندان ياپيشدي.

.28

سوليمان پادشاها ددئلر کي، يوآب ربّئن عئبادت چاديرينا قاچيب و ائندي قوربانگاهين يانيندادير. سوليمان يِهوياداع اوغلو بِناياني گؤنده‌رئب ددي: "گت، اونو اؤلدور."

.29

بِنايا ربّئن عئبادت چاديرينا گلئب يوآبا ددي: "چيخ! پادشاه بله ديئب!" يوآب ددي: "يوخ، بورادا اؤله‌جيم." بِنايايا پادشاها خبر گتئرئب ددي: "يوآب بله ددی و منه بو جاوابي وردی."

.30

پادشاه اونا ددي: "اونون ددئيي کئمي ات؛ اونو اؤلدور و باسدير کي، يوآبين سببسئز تؤکدويو قانين تقصئرئني منئم و آتامين اِوي اوستوندن گؤتوره‌سن.

.31

رب اونون قانيني اؤز باشينا دؤندره‌جک، چونکي او اؤزوندن داها صالح و داها ياخشي اولان ائکي نفري قيلينجلا ووردو: آتام داوودون خبري اولمادان ائسرايئل قوشونونون باشچيسي نِر اوغلو آبنِرله يهودا قوشونونون باشچيسي يِتِر اوغلو عَماساني اؤلدوردو.

.32

بلجه اونلارين قاني همئشه‌لئک يوآبين و اونون نسلئنئن اوستونده قالاجاق، لاکئن رب داوودا، اونون نسلئنه، اِوئنه و تختئنه ابده‌جک اَمئن-آمانليق وره‌جکدئر."

.33

بلجه يِهوياداع اوغلو بِنايا گتدي و يوآبي ووروب اؤلدوردو و اونو چؤلده‌کي اِوئنده باسديرديلار.

.34

پادشاه يوآبين يرئنه يِهوياداع اوغلو بِناياني قوشون باشچيسي قويدو. اِبياتارين يرئنه ده کاهئن صادوقو تعيئن اتدي.

.35

پادشاه شئمعئني چاغيرتديريب اونا ددي: "اورشلئمده اؤزونه بئر اِو تئک و اورادا ياشا، اورادان هچ يره گتمه.

.36

اورادان چيخيب قئدرون دره‌سئني کچدئيئن گون، بئل کي، قطعن اؤله‌جکسن و قانين اؤز اوستونده قالاجاق."

.37

شئمعي پادشاها ددي: "بو سؤز ياخشي‌دير، آغام پادشاه نجه ديئب، قولون دا اِله اده‌جک." شئمعي اوزون مودّت اورشلئمده ياشادي.

.38

اوچونجو ائلئن آخيريندا شئمعئنئن ائکي قولو گَت پادشاهي مَعَکا اوغلو اَکئشئن يانينا قاچديلار. شئمعئيه خبر گلدي کي، قوللاري گَتده‌دئر.

.39

قالخيب اِششه‌يئني پالانلادي و قوللاريني آختارماق اوچون گَته، اَکئشئن يانينا گتدي. شئمعي گدئب قوللاريني گَتدن گتئردي.

.40

شئمعئنئن اورشلئمدن گَته گدئب-گلمک خبري سوليمانا چاتدي.

.41

پادشاه شئمعئني چاغيرتديريب اونا ددي: "ربّئن حاقّينا مگر سنه آند ائچدئرمه‌دئم کي، «چيخيب بئر يره گتدئيئن گون، بئل کي، قطعن اؤله‌جکسن؟» مگر بو باره‌ده سنه ائخطار ورمه‌دئم؟ مگر منه «اشئتدئيئم بو سؤز ياخشي‌دير» دمه‌دئن؟»

.42

بس نئيه ربّه ائچدئيئن آندا و سنه وردئيئم امره عمل اتمه‌دئن؟"

.43

سونرا پادشاه شئمعئيه ددي: "سن آتام داوودون ضئدّئنه اوره‌يئنده ساخلاديغين و اتدئيئن پئسلئيئن هاميسيني بئلئرسن. پئسلئيئني رب سنئن اؤز باشينا دؤندره‌جک.

.44

لاکئن سوليمان پادشاه موبارک اولاجاق و داوودون تختي ربّئن حوضوروندا ابده‌جک برقرار قالاجاق."

.45

بلجه پادشاه يِهوياداع اوغلو بِنايايا امر اتدي، بِنايا دا گدئب شئمعئني ووردو و او، اؤلدو. بلجه، پادشاهليق سوليمانين اَلي ائله مؤحکملَندي.

.46

← 1Kings 2/22 →