| ← 1Chronicles 20/29 → |
| باهار گلنده، پادشاهلار موحارئبه‌يه چيخان واخت، يوآب قوشونونو سفره چيخارتدي. او، عَمّونلولارين اؤلکه‌سئني وئران اتدي و گلئب رَبّاني موحاصئره‌يه آلدي. لاکئن داوود اورشلئمده قالدي. يوآب ربّه‌ني ووروب داغيتدي. | .1 |
| داوود اونلارين پادشاهينين باشيندان تاجيني گؤتوردو. تاجينين چکئسي بئر تالانت قيزيل ائدي. اونون اوستونده قئيمتلي داش وار ائدي. بو تاج داوودون باشينا قويولدو. داوود بو شهردن چوخلو قنئمت آپاردي. | .2 |
| او، شهرده اولان خالقي کؤچورتدو و اَللرئنه اَره، دَمئر تئشه، کولونگ و بالتا ورئب آغير ائشلره قويدو. داوود عَمّونلولارين بوتون شهرلرئنه بله اتدي. سونرا داوود و بوتون خالق اورشلئمه قاييتديلار. | .3 |
| بوندان سونرا گِزِرده فئلئسطلی‌لرله دؤيوش اولدو. او زامان خوشالي سئبّه‌که‌ي رافا اؤولادلاريندان سئپّه‌يي اؤلدوردو. بلجه فئلئسطلی‌لر تابع اولدولار. | .4 |
| فئلئسطلی‌لرله داها بئر دؤيوشده ياعئر اوغلو اِلخانان گَتلي گولياتين قارداشي لَخمئني اؤلدوردو. اونون نئزه‌سئنئن ساپي، توخوجو دَزگاهينين اَرئش آغاجي بويدا ائدي. | .5 |
| گَتده گئنه دؤيوش اولدو. اورادا اوجابوي بئر آدام وار ائدي کي، اَللري و آياقلاري آلتي بارماقلي ائدي و جَمي ائيئرمي دؤرد بارماغي وار ائدي. بو آدام دا رافا اؤولادلاريندان ائدي. | .6 |
| او، ائسرايئله ميدان اوخودو. اونو داوودون قارداشي شئمعانين اوغلو يِهوناتان اؤلدوردو. | .7 |
| بونلار گَتده رافا نسلئندن ائدئلر. اونلار داوودون و اونون آداملارينين اَلي ائله قيريلديلار. | .8 |
| ← 1Chronicles 20/29 → |